IB投資系列：投資要靠自己不是靠別人

 用衛星上網於公海炒股，起初以為賺4780港元，臨收巿，標個尾會，最後賺5930港元，係意外。

郵輪衛星上網錢唔好慳，七舊幾水，買賣一次已回本。至於曾經有YouTuber在郵輪直播，要賺view數，對我來說都是一門生意，要拍好片，多人睇、多人訂閱，才能賺錢，甚至自己插入廣告，明明這些人自己投資都係用IB，又賣埋其他證券公司廣告，又VPN廣告，汁都撈埋，有幾富貴？我真係好懷疑。

（講自己幾富貴，咪又係搭雞棚，引人落疊。）

所以千萬不要信人，唔識投資就去銀行做訂期存款。

我真係唔明，點解會有人信？掂嘅人，佢姓甚名誰都冇人知，甚至都唔想人知，幕後玩家、金融家族，有幾多人會識？唯一解釋係：「利令智昏」，人太喝求發達。

財富是長時間累積，炒股，唔好話賺幾千蚊，俾你賺一皮，但成年才捕捉到一次機會，除埋每月得幾舊水，沒有意思。

教我釘板嘅師傅，教我唔好在意賺幾多錢，因為賺嘅錢係全年計，除番每個月，才是你真實人工，要長做長有，才有意思，俾你好高人工，返得幾日，跟人工較低，日日有工返，後者更有利。

其實投資都一樣，好嘅月份有幾皮，差嘅一個仙都冇，都係攞個平均數，如果唔係我早前就唔使重出江湖，去酒店執房，為嘅就係賺取時間要守到所持股票升番，人生活有成本，一個家庭就更大，責任更大更重，你就唔會all in曬冷。

美國淘金熱，邊個最賺錢？金你未必淘到，但賣淘金設備及牛仔褲，就一定賺到，亦最聰明。虛擬貨幣大熱，許多人都添置掘礦機，咁邊個最賺錢？你未必掘到虛擬貨幣，但賣運算能力好嘅晶片，才是真正贏家。

要投資，自己花心力時間做功課，資訊係重要一環，英文唔得咪睇翻譯，我都係咁低B，我都冇「富爸爸」教我（羅伯特清崎都冇，係佢自己老作），純粹係靠自己，這個世界冇人教你，教你嗰個都係搵你笨，基金佬、保險佬都係賺你佣金，理財策劃師退休後自己都要節衣縮食，還有面子接受訪問，厚顏無恥，咁先最可笑！汁都撈埋、雞碎錢都唔放過嘅人會教到你發達？唔好咁天真！係佢發咗好耐。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。