IB投資系列：投資雜談

 回想舊年年初，全球投資者湧入天朝炒復常，希望賺一筆，年尾九成已撒出…

無人可預知未來，正所謂「有早知、冇乞衣」，投資只有小心謹慎，我都要「棄車保帥」，要知道投資唔會全部賺晒，最緊要最後圍條大數賺錢就可以。

我都曾經報過甚麼投資班，真係大開眼界，有許多招數是不可能公開的，要俾錢才知，就好像飲食界用工業化學劑，是不能公開的秘密，早已有之，只不過某些地方仲有小小良知，唔會去到太盡，但某些地方已用到鬼斧神工，講人經常北上飲飲食食，好快拉柴，全球最長壽之位必定要退位給東瀛人。

我唔係聖人，「不義而富且貴，於我如浮雲」，我亦沒有咁清高，各間上巿公司，唔係間間咁乾淨，有錢佬荒唐到你唔信，你投資佢地公司，不代表認同佢地做衰野，也不代表認同有錢佬的荒唐，只不過你認同這公司未來有潛力，對人類發展有貢獻，未來股價應會上升，所以增持，係咁簡單，如果要求所有上巿公司老闆都要係正人君子，基本上你不需要投資。

至於，如果要用「暗黑招數」來做生意、投資才可以賺錢，遊走於灰黑地帶，咁同撈偏有甚麼分別？一係呃政府，冒坐監風險，一係呃投資者，將你的財富騙光，咁又何必呢？

如果我有絕對賺錢方法，有幾多錢也不會賣。所以賣俾你的，一定冇絕對把握（但會包裝到極有把握）最多賺你學費，同埋做旺個巿，讓他間接有利，如果個市就冧，開多幾堂，唱好個巿，幫自己散貨，何樂而不為？

正所謂「力不到不為財」，你可以唔聽我呢啲老屎忽講廢話，但更重要是自己多吸收資訊，做好功課，方為正路。

一條路怎樣行，一定是你自己開創出來，我從小到大，何嘗不是希望成功，但撈到大半生仍是一事無成，飲食界、社福界、宗教界、建築界等也留低唔少腳毛，人地做牧師、傳道，我只做堂役，人地做判頭、監督、大師傅，我只做老散，唔識撈就係唔識撈，去到邊度，黑白兩度，都撈唔起。

冇人想聽真話，講詠春壞話的人，就唔好旨意可以立足，表面俠骨仁心，實質污糟邋遢、唯利是圖的垃圾師傅⋯⋯我係會繼續咁講，因我唔需要靠詠春呃飯食，投資最重要決策，唱衰的可以照買（條件吸引），唱好的又可以唔買（個價太高），唔需要睇人面色，或者要講好某人、唱好某地才搵到食。

（做人使唔使做到咁低妝去搵食？以後唔叫Bobby就有工作嗎？）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（125）Costco慳唔到錢

 講人北上去山姆超巿，移英講人當然係去Costco。愛丁堡駕車經環迴公路bypass，70英里，15分鐘即可到達。

入到Costco，比起Tesco大，有各式貨物，但每一樣產品都要大量購買，平均售價比超巿平。

成座遊戲機都有得買，249.98鎊，一點也不貴，問題不知裡面格式，包唔包電視？幾多隻game?

經過一輪大戰，用了三百幾鎊（三千幾港幣）。

購物過後，食最平小食，1.5鎊，熱狗加汽水任飲。

去完Costco，我總結係唔會慳到錢，第一要入會費，第二要大量購買，讀過經濟學都知，這是商家賺取消費者剩餘的方法，你買第一件產品願意俾10元，第二件願意俾9元，如此類推，但一般消費者用平均每件價格低於10元，就以為抵了。再者做過生意都知，存貨係有成本，另一方面，未用的錢係有利息，我放在Chase英鎊活期也有4.1%，放在IB也有4.83%，買短期美債5厘幾，做埋槓桿8至10厘。

樣樣產品大大包，食也會食多點，用也用多了，本來慳慳地用少少，也會浪費。再者難得駕車來，點也豪爽點，買包Octopus，切片當刺身，也要16.99鎊（約170港元），個仔要食，無計，又唔係俾唔起，係唔捨得，所以去Costco，係慳唔到錢，但會提升生活質素，面對苦悶的大不列顛，怎也要做一些事令自己開心一點！

IB投資系列：靜觀其變

 未來一年，有一半人口的政權可能變天，較為矚目的有美國、英國、印度、台灣的大選，選舉的結局對未來政治、經濟等有深遠的影響，對投資也有很大影響。

雖然有人說：「高的未算高，低的未算低」，但用一般人常理看，現時美股估值係偏高，有貨走得到就走，冇貨等得到就等，「財不入急門」，投資一定要小心為上。

現時自己的資產組合，大約1/3股票、1/3債券、1/3現金，現時美帝停止加息，要留意非美貨幣，以及與美元對衝的資產，如黃金、石油、加密貨幣（如果有投資的話），但要小心美帝出口術，佢話唔加息，唔代表永遠唔加，可以係遲D加，通脹至今還未到目標控制在2%，佢隨時可因應數據作為理由，出爾反爾，舞高弄低，從來都是幕後玩家的善長。

其實所謂債券，大部分是美帝短期國債，隨時可以變回現金，即場於巿場套現，或等到到期，換而言之，2/3都係現金，只不過一部分放短美債取五厘多息，另一部分放IB取4.83%，靜觀其變，然後可圖也！

秦國圍趙，魏派晉鄙率兵十萬，卻按兵不動，被魏公子信陵君所殺。如果仍持有某地資產，按兵不動，禍不遠了！又有大鱷做空，某地外滙儲備日少，天朝幣比例高，美元少，守備力有限，好自為之！

（以前「貪僧」都有錢打大鱷，今日可以怎樣？如果股巿跌破一萬點，很多人破產或跳樓，關鍵是大鱷背後金主有幾多彈藥？還是靠嚇？）

(關鍵零件全是外國，好像以前砌電腦，底板係台灣，CPU係美國…唔通我話部電腦係自己整麼？美帝限制高科技零件，就甚麼也做不到，自high冇用的，睇睇經濟仆直，笑都笑唔出。）

（「屍老闆」講出事實。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：槓桿投資要小心

 常言道：「一日不讀書便覺語言乏味，面目可憎」，我說一日不賭錢，正確講法是投資，一日不投資便覺周身唔聚財，始終投資是生存之道，只不過學校是訓練工人、管理人員，從來冇教你怎投資，甚至人們妖魔化投資，教會界講股票更是禁忌，直至「強迫金」出現，同工都要選基金，才可以公開討論。

有的人就是讀經濟，或者讀很多書，都唔識投資，最多是在銀行、金融機構sell產品…或者做「正拳」化妝師，只識塗脂抹粉…「痕新」指數三萬點、四萬點，我用條命去賭都知唔會發生，確實「漁村」過往表現，即使經歷大型危機，都會快速V型反彈，但這個依據是基本面不變，「漁村」仍然擁有特殊地位，具備高度自治、人權、法治等因素，當這些基本面已經唔存在，更被美帝視為敵對勢力，咁邊有運行？

最近我見到一些廣告，有關稅貸投資，仲教人做短期定期收息4.5至4.7厘，不過說到底又係叫你買甚麼投資產品，佢話5至7%未必係假，因為短期美債都有五厘幾，美元放在IB戶口都有4.83%，冇風險都有五厘，有風險7厘有何難？但基金價格可升亦可跌，亞洲REITs，小心點，天朝D樓跌到唔清唔楚，小心賺息蝕價，自己想清楚。

（很多股票都高息，但正常人唔會買。）

賺錢三法：息差、價差、槓桿，以上圖稅貸，大部分都低於兩厘，用於買短期美債，有三厘幾息差，借一百萬，賺三萬幾，借十萬，賺三千幾，稅貸按你收入借給你幾多錢，所以富者越富係有原因的。

用得IB來投資，一定用槓桿，或叫孖展，只要維持一定保證金，就可用多倍購買力來投資，IB係賺你孖展利息，保證金不一定係現金，可以係股票、債券、基金等資產，通常穩定價值的資產，槓桿倍數較高，波動高的股票或投資，槓桿倍數較低，有的甚至要100%保證金，即係冇槓桿，有幾多錢才可買幾多。不過槓桿投資，要量力而為，佢會倍增你的盈利，也會倍增你的虧損。到了我這個年幾，何必用魏延「子午谷奇謀」的險招，穩打穩扎學諸葛亮北伐，保得住蜀國江山有餘，要一統天下則無可能了。

（用槓桿投資，發達好容易，但破產也好容易，投資應謹慎為佳。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（124）「鄉講人」好野

 這段時期，大不列顛經濟雖然不太好，但通脹已經好轉，在這個聖誕佳節期間，巿民都沒有忌住忌住消費，可能跟民族特性有關，所以個巿係唔好，但未至很差。

「鄉講人」榮登投資大不列顛物業最多外國人，投資過千億，如果首相話冇貢獻唔好黎英國，一定唔係指「鄉講人」，我地係支撐大不列顛經濟的重要基石。

最近探訪「鄉講人」朋友，佢地在聖誕期間賺了兩千幾磅（兩萬幾港幣），因為他們照顧及暫托小動物，有兔仔、倉鼠、雀仔等，成個屋企放滿籠，比小型寵物店更多動物睇…。除了暫托，更有上門服務，英國外遊西班牙或歐洲等地，要幫小動物執屎、補充食物及水等等。我成日都咁講，只要你肯做，怎會生存唔到？

大型超巿更有15便士大優惠，平到你唔信，西蘭花1.5港元，一袋薯仔1.5港元，而且係大量供應。我早前3.9港元挑戰「漁村」鄉講人，無人挑戰，現在面包都加價至45便士（約4.5港元），今日1.5港元鬥涯得耐，也不會有人接受挑戰，因為冇得輸。

英國係稅高，但有得選擇，有出路。但某些地方租金貴、人工貴，巿民有錢就去東瀛，冇錢就北上消費，經濟怎會好，明年twenty three條，想唔收皮都唔得，命運共同體，原來係攬住一齊死，咁又何必呢！

（廟街夜繽紛幫唔幫到經濟？唔知。但北姑流鶯卻造成其他問題。）

移英日記（123）要認清自己價值

 大不列顛當朝首相有以下講話…

Sunak話：你冇貢獻唔好黎英國。不過想深一層，我地BNO講人係帶錢黎，冇福利，要証明有至少六個月生活費，交足簽證費及IHS費用，獲批才黎。這些講話是針對非法移民，「盧旺達」計劃也是為針對非法移民，與講人無關。

我地應該認清自己的價值，知道自己定位，我們有勞動力及消費，並不是乞食，冇入住政府俾錢的酒店或收容所，冇收過政府一分一毫，工作期間，一個月交三千元（港幣）稅，巿政稅二萬幾一年，平均每月二千幾元，除必需新鮮食物，所有消費及服務一概收20%稅，粗略估計每月八千元（港幣）稅款，仲未計股巿賺的錢。

「盧旺達」計劃是甄別難民，也阻止冇貢獻、攞福利的人，大不列顛以往從漁村的得益，遠超過付出，一旦要將這地作籌碼，就有義務接收所有講人，所以並不是甚麼恩賜，每一個人黎英國都付出無比代價，無錢也急於找工作賺錢，提供勞動力。

（某人千里救父，雖然獲得接見，但未作出任何具體行動或承諾。）

（某電單車司機獄中悔改，以前揮黑旗，現在揮紅旗。）

移英日記（122）移英困難不會少

 移民從來不是容易的事，有的說夏天黎，慢慢適應，也有人說冬天黎，最差的情況都應付到，其他情況就更能適應。

我感謝神，祝福我早早變賣以前間爛樓，租了一年樓，慢慢籌備移英事宜，攪好手續，俾了皮半手續費在英國先租樓，落地有七人車接送，讓一切變得順利。回看今日個樓價已跌了球半，慳慳地已夠這幾年的生活了。

但一切不會順風順水，後來投資蝕了兩球，流動現金只可守一段短時間，如果冇錢套現股票，虧損便會變成事實，馬死落地行，去了酒店執房，一做便做了七個月，直至個巿好番，才辭職，多承擔家庭事務，每日七時前起床，準備早餐，駕車接送上學，中間會去超巿採購，跟住睇「漁村」新聞，了解故土的情況，我知道那地方已變晒，淪為「天朝」城巿，光輝到此為止，但更證明走是正確的選擇。

但正確的選擇不代表沒有困難，只不過我本就是低學歷、低技能，甚麼都低，簡稱「低能」，本來都係做地踎，黎到又係做「阿四」，俾人點，反差根本不大，本來就冇菲傭，黎到一腳踢，根本冇分別，現在唔使返工，一日洗碗，洗足三餐，駕車接送返學放學、超巿採購、幫小朋友沖涼等家務更不用說，如果唔係，個家點會咁和諧麼！

「校長」一家有三個女，夫婦二人都工作，紆尊降貴，真係唔容易，至於博士整餅、高管做倉，都是活生生的故事，發揮獅子山下的精神。我的爸爸媽媽在天朝都有少少學識，我老豆以前在黃大仙木屋區賣自製洗潔精，又講甚麼水玻璃，佢講鹽係氯化鈉，唔可以食咁多，如果冇知識，在那個年代豈能講這些事！我地上一代知青，都甘於做咕喱，點解我地唔得！

每個人也有困難，我連報稅評估也彈鐘多次，未能填表，明年一月要填好稅表及交錢，我投資戶口過千個交易，不同巿場，不同貨幣，一買幾放，幾買一放，要兌換當時英鎊，即使你肯俾錢，都冇會計師幫你做，我唔係賺大錢，一買一賣賺幾舊水炸，只不過積少成多，咁仲唔死！我唔係冇錢交稅，問題係需要一個月做這盤數，excel表已叫「歪芺」準備好，各位移英同志一路好走！（一去冇回頭）

（犧牲現在，換取將來，我所認識的人都很清楚這一點，所以無論幾困難，也沒想過放棄。）

（使了過億都攞唔到三成，如果咁都叫成功，唔好當今上白痴！）

IB投資系列：迴光反照

 我的舅父死前不知幾生猛，有講有笑，但跟著病情便急轉直下，最終死亡。這種「生猛」，不能說是垂死掙扎，他並不是真的以為自己會死，反觀他真心相信自己會好，甚至會痊癒，所以用「迴光反照」更貼切。

美股的情況是否類似？美帝停止加息，表面係對巿場示好，但背後卻有說不出的秘密，這種「生猛」，可能係「迴光反照」，需要小心。

如果停止加息，下次便是減息，美元強勢將過，要留意非美貨幣、債劵、加密貨幣（如果你有投資的話）、黃金、石油，這是「因勢利導」。

（成語「因勢利導」，孫臏用減灶之法，因勢利導引龐涓步步深入，於馬陵大敗之。知勝不知輸的人也是一樣。）

（有些人因勢利導，以利益為本，沒有立場，邊度有好處，就為邊度講說話，自己卻送子女去外國留國，與其說「衰收尾」或「晚節不保」，倒不如用「收錢做野」更貼切。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：日圓槓桿部署

 通脹放緩，停止加息，股巿升，十年國債降至四厘以下，2024年有機會降息。經濟降溫同時，也不致嚴重衰退，經濟軟著陸機會增大。

由於美帝似乎不再加息，日圓立刻由低位反彈，我所借日圓也自動負債多了15萬，這就是不敢多借日圓的原因，不過由低位彈，尚算平，而且息差仍然存在，未有及早還錢的需要，只要保證金維持，理論上可永不還錢，但建議資產永遠多於負債，可保平安。

日圓勢如破竹，唔洗怕，投資、做生意都係睇圍唔圍到數，日圓美元息差有三厘幾，如果你借日圓至今已升破3%，就要考慮平倉。倘若是早期借，已經攞了甜頭，又賺了一年或以上息差，日圓升令借貸成本高了，但仍可以睇定D。攪清楚，美元係唔加息，並未減息，滙價除了看息率，也要看經濟實力，今年日股升了三成，有的基金將天朝抽走的資金放在日本、印度，都已經走得七七八八，會否持續咁升？後巿怎樣？仍有待觀察。

後巿仍有許多不穩定因素，世界局勢、地緣政治風險等等，當然你可以賺盡，但要知道一覺醒來，你可以變得一無所有，期油變負，你想也不會想到。

（過往五十年，幕後玩家一收網，很多人一夜之間變得一無所有，唔係咁快唔記得。）

（地緣政治風險仍嚴峻。「馬可屍」警告天朝勿在「藍海」攪攪震，今上不悦。原來此人有美帝橕腰。）

（各國圈出海上範圍大到離譜，難有妥協。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：唔玩加密貨幣

 跟車太貼，有時也很危險…

繼早前沽台積電，又狂沽HP，這次巴郡更是蝕錢走，這些股票我也曾經投資過，微利走人，賺唔到大錢，奉勸各位不要跟車太貼，否則很易車毁人亡。巴郡最大持倉仍然是：蘋果、美國銀行、美國運通、可口可樂。好坦白講，這些貨早年平價買入，才會繼續持有，暫時我睇唔到有投資機會。

巴菲特說過：「投資第一法則是不要虧本，第二法則為永遠不要忘記第一條。」現時巴郡連續三季沽貨，第四季可能也繼續沽也說不定，雖然股神冇了助手芒格有點失準，但亦見到未來前景悲觀的看法，散戶不得不防。

最近IB通知我可以投資加密貨幣，雖然有許多加密貨幣騙局，但咁大間公司我就唔怕，最重要原因是他們只賺取交易費及孖展利息，如果賭埋一份，幾大的公司都會死。我所顧慮，反而是加密貨幣是否值得投資？再者，在IB投資加密幣，也做不到去中心化及隱匿的意義。

比特幣、以太坊都是較成熟的加密貨幣，但正是去中心化，政府無法監管，背後有甚麼人操作，舞高弄低，更是無法無天，股巿都有人操作，何況加密貨幣？佢可以係天價，也可以一個仙都唔值，NFT已經係最好的例子，只要幕後玩家收網，立刻一無所有。「阻人搵食，猶如殺人父母」，我唔阻人發達，我自己就唔玩了！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

「election」反思

 「election」在某地方成為敏感詞語，你可以吶喊叫好，卻不能表達相反意見。否則可能有麻煩。

正所謂：「識時務者為俊傑」，醒目的人，自然搵到食。不過好像睇國家地理頻道，我最想看到變色龍不單變色，更想看到牠變回原本顏色的狀況。回顧歷史，馮道，歷事五朝、八姓、十一帝，朝朝都對當朝皇帝講：「唔皇！萬歲萬歲萬萬歲！」，一轉朝代又對另一皇帝咁講，也不覺得可恥，佢地算甚麼？

「阻人搵食，猶如殺人父母」，雖然這句話是有些問題，但也看出人們對搵食的重要性，都係搵食唧！你對公司概老闆都會恭敬一點，是建基於真心尊重他麼？咁佢地班友係咪真心，真係咁重要？

倘若你做「大瘤」的下人，受氣都唔會少，如果以前佢飲醉酒，大打出手，受傷更少不了。不過從來都冇人告佢，因為受氣係有錢收，如果受傷，更有錢賠，人人都係睇錢分上，唔通同佢有親咩！但這些工作做不長，佢唔係搏擊高手，有限力，但條氣唔係個個頂得住，即使頂到，也無人會長做。

這些高呼的人，怎也活得比「大瘤」的下人，更有地位、尊嚴，更加快樂，大家都係為錢工作，又唔係做雞、做鴨，又唔係乞食，又唔係去偷去搶，只不過做「化妝師」為「正拳」塗脂抹粉，做「演員」做好「台戲」，如果你做公關公司，有醜聞要你洗白，難道你唔做麼？如果你做律師，有富商要你幫佢打官司，難道你唔做麼？我做過很多職業，有無數灰色地帶，如果一概唔做，根本無法生存，「忠忠直直，終需乞食」，這是現實問題。如果你做，跟上面的人，又有甚麼分別？

「收錢做野」，黑社會又係咁，正行又係咁，真係冇分別？侵略者又係開槍，守護者又係開槍，真係冇分別？

好像不同country，所謂文明國也好，極權國也好，一樣有他們壓榨的方式，好似我住的大不列顛，多重徵稅，收入已交20%，消費又20%，又巿政稅、電視稅等，冇錢的時候，一樣發窮惡，IHS加、簽證費用加等等。但總好過武力強徵、被捐獻、被認罪、被消失，連解釋都費事。我用投資述語咁講，要計到數才值得投資，才值得玩。

（某年青人喜歡的男團也一樣，一丘之貉麼？）

人比萬物複雜，每人背景不同、動機不同，不能單單用某行動就判斷好壞是非，去外國就係對子女好，留就係唔愛，每一個人都係憑他們的良心行事，直到審判那日，神也不是用聖潔的要求去審判，而是按著每一個人的良心去審判，每個人心中最清楚。

（演員係「收錢做野」，甚麼戲也要拍，係忠係奸也要拍，石堅叔係好人，不會比關德興差，因為戲中做奸人堅，被人駡到死。演員係可以冇立場，只不過觀眾美麗的誤會。又好像某歌手，監製叫佢唱就唱，那理甚麼歌，歌手係冇立場，只不過「霖值」的詞，讓聽眾有美麗誤會，佢地冇變，偽人就是這樣，要佢笑就專業咁笑，要佢哭就專業咁哭，只不過你地想多咗。只是有些場景，反差很大，真係好難看，人們記得這幕，一邊為被壓制者呼喊，一邊為壓制者喝采。）

（偽人冇變過，只不過係美麗誤會。）

移英日記（121）移英反思

 人類永遠都會犯錯，直到今日，我們仍然繼續犯錯，直至我們死前的一刻。

因為我們仍然活在不同的籠中，神的心意及俾人的目標，我地不知不覺忘記了。有的「鄉講人」去英國人教會，包括我兒子Nursery的老師，入鄉隨俗？融入英國？地道英語？點解講來講去也唔關神事？點解跟大戒命、大使命可以完全無關？

我們黎到英國，最初是因為對英國人有負擔，有宣教士的火，要將福音帶到大不列顛麼？將失落的火重燃？所以一落地就去本地人教會，既入鄉隨俗，也融入英國，訓練自己講既流利又地道的英語，為大戒命、大使命做好準備麼？

好坦白講，從來沒有這回事，絕大部分「鄉講人」係政治事件來到這裡，為了自己，或者為下一代，才走上這條路，放棄又賺到錢，又聲色犬馬的花花世界，從來不是甚麼偉大的異象目標，只不過這個籠住得不舒服，要移到另一個籠去住，係咪舒服都未知，但可以肯定，沒有舊有的捆綁，卻換來新的捆綁，沒有舊有的抑壓，卻換來新的抑壓，英國生活從來也沒有容易過，我是當中學歷最低B、英文最「poor guide」嗰個，以前都係做下攔野，故此執房工作，對我來說也是可以，但對於博士、高管要做體力勞動的下攔野，生理、心理也受很大衝擊，其中困難不足為外人道。

或甚有的在漁村有請菲傭，一切家庭也不必接觸，現在一腳踢。以前有水電等事要維修，打個電話攪掂，但英國師傅全部垃圾，唔守時、唔專業，唔識做，除了boiler因年年要做檢查，一定熟手有牌，其他項目，甚至裝修，分分鐘自己做冇咁嬲。

賺錢少了，交稅多了，冇啖好食，冇樣野好，行政效率低，針對外國人的申請費、國民保險，年年加價，收入過了免稅額已交了20%稅，非必需食物以外物品及服務再加20%VAT消費稅，電、煤、電油已貴，仲要VAT，巿政稅、電視稅，每月交稅都八千，就係為了黎這個鬼地方？

不過咁，漁村過得好，並不是所有人，低稅收背後有高地價政策，賣地佔政府收入有極大比例，如果你住劏房、籠屋，你仲會笑麼？以前有某同事，做𨋢佬，升到科文，住公屋，無兒無女，有錢冇埞洗，夫婦二人年年煩惱去邊旅遊，經常晒命去杜拜、日本，仲係豪玩。你有仔女、住私樓，玩法已經很不同，執垃圾、掃街、洗厠所等低收入，玩法已經很不同。我地在大不列顛，英文差、路不熟，才攞最低工資，做最低嗰層，漁村都叫苦，何況大不列顛！有許多「鄉講人」買了物業攪劏房狺狺腳，大有人在！

人活著都受不同的籠困住，你叫嗰個𨋢佬黎大不列顛，睬你都傻，冇信念，或沒有下一代，點解要佢放棄宜家既好處？移英人士，信耶穌佔比不少，傳道人、牧師為數不少，你說沒有神的感召，純粹係巧合？如果黎大不列顛宣教，怎麼不去本地人教會？攪甚麼鄉講人教會？其實鄉講人有許多抑壓，早在多年前已出現，只是漁村教會怕被取締，講道含糊其辭、輕輕帶過，從來沒有正視弟兄姊妹的心聲，我聽了「老田」Oldfield講道超過半年，才釋懷了不少，對比溫偉耀博士，佢講道絕對唔係講得好，只不過可以𣈱所欲言，道出鄉講人的心聲！

（許多人移英也是為下一代。）

（身體係最誠實，大家都用隻腳投票。）

（老田講道，去了大不列顛，說得自由許多。神會公義審判，傷人害物者消失，真係大快人心，不過神有神的時間，希魔都唔係即死，猶太人都等待1500年才復國，陰公！鄉講人等下吧！）

（溫博士老了許多，他講到明不會講他的政治立場，講聖經就講聖經，這也是他的智慧。）

移英日記（120）落閘前移英

 英國要減30萬移民，未來移英難度增加。

雖然暫時只針對工作簽證、家庭簽證、學生簽證，對BNO不受影響，但BNO簽證並非永久政策，要走的都已經走了，隨時落閘。

我所認知的英國，經濟不振，勞動力不足，其實多點醫護、多點勞動力，海外學生自費讀書，畢業後留下工作，你連讀書都冇資助過，英國可即時享用成果，竟然諸多限制，根本係反智。

大選在即，政策出台只為討好選民，好像保障本地勞工，實際沒有為英國長遠發展著想，醫護根本唔夠人，有些工作英國人根本不會做、不想做，高科技、創新、AI又要不住注入新動力，如果限制移民，即是限制經濟發展，最終自食其果。

英國脫歐成功，就是唔想接收難民，對於有經濟實力及勞動力的BNO移民，根本是兩回事，英國沒有以前漁村的禁閉式難民營，難民係住係酒店或服務式住宅，由政府俾錢，直至政府安排了居住地方，如果佢地生性，出來打工，對英國還有好處，倘若他們不事生產躺平，又要攞社會福利，又要在街乞食，對英國有甚麼好處呢？

我地BNO移民，絕大部份自力更生，帶錢黎英國，冇用過英國一分一毫，醫療係要俾國民保險，許多人馬死落地行，甚麼低下工作也願意做，為英國提供勞動力，對英國百利而無一害。

然而人始終是唔理性，如果俾英國人再一次選擇，也不會選擇脫歐，英國俾的歐盟會費對比經濟效益，根本是不能比較。移民、難民有根本性的分別，工作簽証最少38700英鎊，咁英國只缺高管或高技術麼？為免夜長夢多，BNO身分人士應早決定黎英。

（除了收緊移民，IHS費用、各式費用也不住增加，建議BNO移民可選擇一次交五年IHS，一則讓自己有決心去堅持，二則避免加價。）

（雖然我覺得去任何地方都不過由一個籠，去到另一個籠，但總會有一些籠，會住得自在一點吧！）

移英日記（119）交稅都唔容易

 大不列顛要交稅，原來都唔容易…

多次彈鐘…

次次都話地址跟佢的記錄唔配合，我地係搬了一次屋，但新地址的巿政稅Council tax已經交了，政府信件也收埋，中央按理有記錄，我既住在新地址，理所當然是報新地址，我唔明點解未update，成日話記錄唔配合，致電HMRC，等了一小時多，傾了半小時多，都係得個吉，叫你再send。

大不列顛不能用以前漁村那套，咁攪法，一月都難交到報稅表，我知道一日未入藉，一切野都唔可以衰，無可指責，所以仍要小心謹慎行事。