天朝、漁村仲值得投資嗎？

 有句說話叫：「不言自明」…

今上永續，星洲變富。

國中上下，趨炎附勢。

是非不分，公義無存。

牛鬼蛇神，胡言亂語。

利令智昏，一鋪清袋。

移英日記（十四）轉換英國車快到你唔信

 今日收到好消息…

終於收到DVLA的信，終於換了英國車牌。有網民說打了四次回頭才成功，攪到我填表尤其緊張，黑筆填寫、全英文大階、簽名不過界，內容我也再三想清楚有冇填錯…總算一次pass，好像考車一樣。

22號寄，24號到DVLA，26號出牌，29號收到牌，咪話英國冇效率！BNO港人的簽證一定過半年，落地可立刻寄表，不必等半年，一星期收到牌，真人成功示範。

跟著的時候，是買車，2030年禁售新燃油車，似乎應該買電車，不過做任何野都係計成本。

電車幾乎充電唔洗錢，先決條件你不計較用幾多時間代價，去Tesco買野，泊足三小時，免費充足三小時，因係慢充，充不足，跟著轉場去第二間，你只要夠無聊，慢慢就可掌握幾時有空位充電，但人生不是為充電，沒有私人住宅及安裝充電樁，不能買電車。

再者電車比燃油車貴，電池壽命大約七年或十萬公里，商家佬冇死錯人，保養的條件正是壽命的極限，之後電池效能日差，十年也不換不可，換電的成本足可買另一部二手燃油車。

英國柴油比電油約貴10%，但柴油卻比電油省接近30%，而且碳排放，柴油車比電油車少，牌費是根據碳排放來決定，即柴油車會更化算，又或者低引擎容積電油車也是考慮之列。

移英日記（十三）英國飲食平貴隨你選擇

 英國除了最低最平的生活，39便士一大條方包（吃足6餐）或者鎊幾一大盒Muesli（吃足16餐），Iceland的1鎊系列，用得幾多錢？也可以間唔中約親戚朋友出街食，或者自己煮也可以。

（Iceland的1鎊系列，飯、意粉、Pizza都有，9元港幣吃到甚麼？Tesco更有75便士飯，不過只有甜酸雞、咖哩雞，很快吃悶。）

（去某中式自助餐，四大一細，小朋友唔知有冇計錢，七十幾鎊埋單。大把鬼佬去食，排到出街，所以只要你有才華，去到邊度都吃香。）

（「歪芺」用Teriyaki整豬肋骨，香港怎會有閒情逸致這樣做？）

不能只是報喜不報憂，我也講下英國D衰野。

英國許多超巿都要1鎊才可取購物車，我所在地的Tesco旁邊有平價超巿Lidl，財大氣粗的Tesco，一概唔洗入1鎊都可取，以致停車場周邊又有，甚至去到屋宛都有，所以唔好以為只有來自天朝的強國人才會這樣，「天下烏鴉一樣黑」。

人人話香港人急，其實愛丁堡也是一樣，以步行速度計，與香港人冇分別，若身材較高者，一步等於我們步半，比我們還快。駕車也不算禮讓，巿區車速30英里，跟香港50公里差不多，但狼死程度不下香港人，尤其英國車道經常有車停泊，變成單程路，爭車場境日日出現，真係要小心！當然越城巿就會這樣。

早前網上有人說英國人很有人情味、禮貌，新入住，鄰居會送咭送小禮物，「歪芺」也擔心怎回禮等問題，事實上，差不多一個月，沒有這回事，帶小朋友去公園玩，我們英文唔好，蘇格蘭口音更難聽，難以主動打招呼，最多只是基本禮貌，他們亦沒有也不會主動打招呼，跟香港一模一樣。

其實，咁樣更自然一點，更城巿一點，我更覺舒服，因為香港也是一樣咁實際，遲些時間，各樣事情攪好，小兒入了學校，我們便會去council找些英語課程學下，早些溶入大不列顛的生活。

移英日記（十二）省錢有辦法淪落街頭實自取

 小兒Nursery攪掂，電煤轉台攪掂，Countil tax攪掂，登記GP睇醫生攪掂，上網delay（你知英國人效率），英國車牌等緊…可以做的，已做晒，等個英國車牌攪掂，可以買架車，去睇下樓，或周圍走走。

其實去英國，香港車牌都可駕一年，之不過保險一定比英國牌貴，雖然可買住車，交住外國人保險，待出了英國車牌，補交資料可扣減保費，不過你都知這裡效率如何，一交一退都很麻煩，正所謂：「財不入急門」，何必急呢？

既然現在已長租居所，去超巿、學校，全部都可步行可達，就沒有迫切性去買車，慳得就慳！這幾日開始試下冇開radiator（暖氣），只開熱水洗碗及沖涼，boiler用天然氣有限，用香港帶來的暖水袋，即或再凍，也買了電暖毯，一定可以慳到錢。

（英國能源費高昂，有四分一人不開暖氣。）

家電方面，慳得就慳，唔關股巿高低問題，去得英國，個個都要有半年生活費証明，故此慳錢係一種生活態度，要最有效運用資源，有的人食也冇得食，怎能浪費？

洗碗碟機，洗很耐，又耗電、又耗水，用都冇用過，儲夠衫才開機洗衫，英國焗爐很大，十分食電，放多幾款食物，調較差不多溫度，180度跟200度，唔會差很遠，一齊焗，始終我們這些草根階層，唔係廚神Gordon Ramsay，唔洗咁精準，有的可用微波，更快更省電。日間不開燈，用自然光即可，睡覺全屋關燈，暗燈、走廊燈都不會有，用充電電筒去厠所。

香港人冇野涯唔到，要淪落街頭，大部分都是人的問題。

（地獄廚神Gordon Ramsay要求甚高，經常爆粗。）

移英日記（十一）有智慧消費幫你慳唔少

 去到陌生地方生活，好多意想不到的使費，不過不同地方，價格有差異，有的貴，有的平，避重就輕，避實擊虛，就算詠春功夫也是咁樣玩法。

我絕不去貴價超巿，除了為買藍盒茶包去了馬沙，點知被「歪芺」催促，最終買錯，泡不出港式奶茶的味道。最多幫襯係「呢度」（Lidl)，其次係Iceland。

要用最平方式消費，首先要下載app入會，某些產品便會收會員價，例如平價方包標價係72便士，但實收39便士。在呢度，我已換過免費面包、清潔劑，另這段時間有推廣，買夠15鎊，可換不同禮品，十分進取，職員勁推廣，早知唔買Tesco股票。

（用呢度app免費換清潔劑。）

(呢度買夠15鎊，這期可免費換不同「甩屎」。我換了開心果。）

（男士綜合維他命丸，2.99鎊，足一個月用，平均每粒唔洗一元港幣，平到你唔信。）

（出前一丁要65便士，約6元港幣，可以接受，貴就食少一點。味道差不多，冇咁霖，但外國杯面就唔得碎濕濕，唔知點解英國人食碎杯面。）

（壽司3.99鎊，爭鮮外賣質素，都食下，解下鄉愁。）

移英日記（十）轉換英國車牌全攻略

 今日終於去了郵政局寄埋張表格換英國車牌。唔洗等183日，簽証夠半年已可換英國車牌。

星期六郵局12:30收工，為防有誤，冒著風雨行路去，谷哥顯示要43分鐘，香港人步伐，30分鐘足矣！

去到郵局你帶埋DVLA文件，話買43鎊Postal order，人地都熟晒，例牌話你知要俾12.5%手續費，買完Postal order，記得將最後那組數字填在D1 form中，將所有文件放在郵寄的公文袋中，郵局都有得買。

最後檢查：

一、完全填好的D1 form，用黑筆、全大階，簽名不過格等。

二、香港車牌。

三、43鎊Postal order或者支票。

四、Share Code列印。（好彩帶埋printer來英）

五、駕駛執照細節証明。（來英前申請）

六、已付掛號郵資回郵信封，如寄護照俾DVLA，有share code或BRP就不必了。（DVLA用second class post，不幸寄失，後果自負）

最後用最貴那款郵寄方式，叫Royal mail special delivery guaranteed by 1pm，用6.85鎊，但疫情加上擺工積壓，佢地做唔到guaranteed，但至少可追蹤，較有保障，有D錢唔慳得的。

可以做已經做晒，只有等DVLA了。

移英日記（九）免費幼兒服務太貼身

 今日終於收到校方接收小兒信件。

某些YouTuber 說英國有免費每星期15小時nursery，但蘇格蘭似乎不一樣，一年1140小時，假設假期無休，除番52星期，每星期也有22.15小時，何況英國一定有假期，聖誕節邊個仲開？所以如果返上午或下午班，基本上可返足。

古有劉皇叔三顧茅廬，請諸葛亮出山輔助，今有本座三次探訪某小學，才有負責人收申請表，幾次更是幫人睇完周圍環境、屋順便去埋，所以幫人等於幫自己。

「你們要先求衪的國和衪的義，這些東西都要加給你們了。」聖經馬太福音6:33

（英國教育如何？看看這些人就可知道。沒有國就沒有家，為何不去大灣區讀書呢？去埋那些邪惡國度學壞人。）

（神審判人，並不是睇你做了甚麼，而是睇你的心是怎樣想，效忠邊個，冇問題的，最要緊要是表裡一致。我很坦白說英王查理斯三世很好麼？卓慧思要下台豈能與戴卓爾夫人比較？至少可以講真話，講的話要跟心要一致，即或有差異，神也是用我們心裡把尺審判番我地自己。）

移英日記（八）買英國樓秘技

今日幫人睇樓，由弟兄托上托幫忙，我亦視為神俾我的工作，分文不收，最緊要完成神的工。戴定頭盔先，學耶穌話齋，「我奉差遣，不過是到以色列家迷失的羊那裡去」只服侍以色列家的羊，而且我未有車，能力所及只是步行可到之地，如果托上托都托到我家，你的弟兄即是我的弟兄，這是不能拒絕的。 

之前幾日已在周圍環境詳盡了解，某英國樓專家A撚 sir所謂專業人士盡職調查，凡人所可以做，已經做晒，結果就等佢概造化了。

（物業附近有商鋪唔係好事，無論食店、酒吧、賭場，都是一樣，避之則吉。）

（在繁忙大道，也是大忌，咪聽中介說很方便。）

（有鐵路，雖然方便，但噪音及多人流多，在英國並不是好物業。）

（近公園，可以加分。）

（近醫院、醫療中心，可加分，你明點解，急救車冇咁快到，住得太遠，有得救都變冇命。）

（house係一項一項計，有前園、後園、車房（係放唔到車，係用來放雜物）、加建、能源效益、係咪用gas的中央暖氣、校區等等。）

記住，如果可以，一定用「魔技」買，道理很簡單，你可以用魔技買，咁即係人地可以用魔技買，脫手容易，港人財大氣粗，cash buy中伏，死了都唔知原因，有銀行把關，佢借得錢俾你，資產一定冇問題，中伏機會較細。

移英日記（七）異地小心被自己人呃

 我知道有不少香港人呃香港人，正所謂：「黃皮樹了哥，唔熟唔食」，我都見怪不怪，最近我聽聞某香港人被某蘇格蘭佬過了一橦，佢老婆唔幫都算，更冷言冷語，因為他們以幫香港人自居，加上又自認基督徒，我都不敢相信，半信半擬。

不過活了咁多年人，加上在教會界咁多年，都明白一個道理，絕對的善良及絕對的邪惡根本不存在，人永遠都在黑、白、灰之間流走，到審判的時候，上天堂的人，黑、白、灰都有，落地獄的人也是一樣，否則耶穌就不會向奉衪名傳道、趕鬼、醫治的人永遠離開衪，即或今天，助紂為虐、是非不分，為政權塗脂抹粉的宗教人士，何其多！那一個才是他心目中的神，清楚不過。

買樓投資或自住，最緊要自己做足功課，某英國樓專家A撚Sir話齋，你當Agent係賊就得㗎喇！正所謂：「害人之心不可有，防人之心不可無」，千萬不要因對方的宗教背景或香港人背景，而疏於防範，YouTuber個個話幫香港人，事實上大部分找自己人著數，輕則嘩眾取寵吸引擊點，中則高價幫你睇樓，重則呃你錢買高水樓、垃圾樓。

以前聽說：「在家靠父母，出外靠朋友」，攞你著數、收得你錢，一定唔係你朋友，收得Agent錢，就係做生意，有冇要你額外20%VAT？咁益香港人幫你俾埋？有冇牌去經營？有冇交稅？如果投資貼士咁得，點解自己唔用IB幾倍槓桿壓重注盡買賺大錢，而要人去收費平台Patreon科水，賺這些蠅頭小利，咁冇出色啊？如果真係咁掂，洗唔洗叫人睇晒YouTube 廣告，連廣告汁的錢都要賺埋…

（英國生活，豐儉由人，早餐不吃39便士方包（可吃6餐），可吃「喵屎」（Muesli 香港叫「瑞士營養麥」）1.25鎊（按45g可吃16餐），牛奶差不多可以當水飲，你要飲有機奶都不過1.85鎊，香港聽到「organic」，走都走唔切。）

（咁樣豐富好多，也不算敗家，有限錢。）

移英日記（六）百物騰貴用錢要有智慧

 終於收到Chase實體咭，雖然網上申請早早已完成，但始終有張咭實在D，這個戶口，或許比當地實體銀行弱，卻比虛擬銀行強。

據我所知只有兩間虛擬銀行有存款保障，Monzo、Starling，港人喜歡的Revolut係冇英國銀行保障，我用來後備滙錢的Wise都係冇，Chase係有FSCS Protection的。

另外，我當然喜歡回水功能，任何消費可得1%現金回饋，實測下得唔得先。

去了Tesco買了15.79鎊，cashback了0.16鎊，果然成功，而且很快回水，日後盡可能用這張來消費，雖然優惠只俾新客戶一年，但賺了才算，到時再作定奪。

英國能源開支確實驚人，猛過「猛鬼雜差房」，本人住處的能源估算，一年電費1193.91鎊、天然氣1597.65鎊，加埋要二千幾鎊，除番每月也要二百幾鎊，相當於二千幾港元。

其實英國進口俄羅斯能源只有幾個%，主要靠北海原油，影響有限，但石油公司以國際價格計算，也沒有辦法，唯有自己慳錢。

暖氣用中央暖氣系統central heating，統一由家中的boiler煲熱水至全屋，發揮大規模經濟的好處，最重要boiler一定要用天然氣，因氣比電平。

我自己只有沖涼及晚上睡覺才開boiler，遲些再凍唔敢講，日頭唔開燈，全用自然光，遲些日短夜長唔敢講，晚上睡覺全屋關燈，要去厠所用充電電筒，咁樣做法，能源開支一定低過估算，講真香港熱的時候開多一點冷氣，電費都千幾元，加埋煤氣都要兩千，唔係差咁遠。

至於食，只要唔出街吃，一定平過香港。我很少公開挑戰，多年前某心理學家說經佢催眠，一個人放平，兩個支撐點，上面可站一人，我用武術認知及科學定理破解，可站兩人…今日如果再有說英國食野貴，無法生存，我以幾元挑戰，看看誰能生存，上圖麥方包，頂到肚餓，我數過有22塊，頭尾兩塊特厚，可當兩塊咁食，一餐吃四塊，可吃六餐，價錢39便士，以1兌9計，即3.51港元，英國可頂兩日，香港一餐都唔頂唔到。

我唔係要大家餐餐吃麥方包，咁dry，我也會整多士，加牛油來吃，早餐再加雞蛋及牛奶，十分滿足。你也可以買靚方包，都係1.2鎊，有限錢。

移英日記（五）英國未有車的生活

 今日跌到幾度…

幸好早上有陽光，氣溫漸漸回升，可以出去行行。

收到風KFC有優惠，5.99鎊20隻雞翼，3元港幣唔洗一隻，唔食對唔住自己。

叫多一個餐，午餐唔洗煮。

埋單十幾鎊，可以接受。

跟住周圍行行…

有不同商店…

Halfords汽車維修及單車公司，可謂男人聖地。

有各式單車，就是冇小輪徑，價錢很貴。

機油、電池、零件、car cam都有，早知唔洗帶過黎。

去到英國，一係你有車，否則去邊到也不方便，以前住屯門巿中心，屋宛直駁商場，家人唔打針，冇疫苗通行証，我天天做買手，日日買外賣，也無怨無悔，因為太近太方便。現在食個KFC，就行了半小時，冇直接車，又要等車、轉車，時間更長，當行下街，欣賞周圍景物，看看有甚麼野買，回程又半小時，大人冇所謂，但小朋友就要你抱，咁就會辛苦一點，見到有玩具又要買，又周旋到底，不竟小兒未返學，冇朋友，很可憐，但又不能無止境滿足。

要用最廉宜的方式消費

 本來有IB兌換神器，再加上Citi plus電滙神器，雙劍合璧，天下無敵。然而落地英國，卻發現這套武功並非完全體，因為代理交匙俾我，我要交埋尾數佣金，卻發現戶口英鎊唔夠錢，由IB過數至Citi plus要數日，再由Citi plus電滙去英國戶口又要數日，咁唔惦，人地實炸晒型，我局住用Citi plus兌換英鎊電滙過去，不竟我仍是海外人士，用電滙過錢也是理所當然，我能夠証明已滙錢，你也無法炸型。

自此，我便申請了Wise戶口，兌換成本比IB高，卻比銀行平，急的時候也幫到手，不竟IB每月只有一次免費提款，而且滙錢需時，Citi plus電滙免費，但不代表接收的銀行也免費，而且電滙需時，要做到即時過數，一定要英國戶口過英國戶口。

下載個app，填好資料，幾日就寄到張實體咭，效率跟香港有得比。有了Wise，就補了漏洞，急的時候都有較平的兌換，而且轉數去英國戶口也可即時。

不過，要消費再平一點，再申請埋Chase，一年內任何消費有1% cashback，再用埋Topcashback等再扣幾%，務求用最低成本達到果效。

許多人唔明點解咁麻煩，我都想一個戶口，最平、最抵、最快、最方便，但事實上這世上並沒有，要最有效運用資源，唯有花更多心思，千萬不要睇少這幾個%，商家佬算盡腦汁都為了賺多幾個%，如果連這些心思也不願花，怎做有錢人呢？

移英日記（四）你要做富監獄還是窮自由

 我地的領導人，蘇格蘭首長施雅晴發表講話，2023年要舉行獨立公投，倘若英國不肯，2024年大選也會以獨立為單一議題，變相公投獨立。她認為蘇格蘭與英國是partner，獨立可以雙贏。

未來會怎樣發展冇人知，但倘若獨立，英鎊一定下跌，有投資英國物業人士，以為物業升了十幾%，不過別忘記英鎊也跌了十幾%，物業只反映本來價值，只不過錢的購買力低了，投資一定要小心。

(投資物業，一定要親到當地，否則中伏機會極大。）

有些人常說英國甚麼都貴，作為過來人，都可以講句公道說話，英國租屋、能源費、巿政費，都要過萬港元，不過如果住套房、劏房，幾千港元租金全包，任你開暖氣，未有工作、沒有孩子，也不失好選擇。至於出街食飯，確實比香港貴，以下是某英國中式茶樓收費：

（茶樓質素比香港好，應是早期移民的中廚主理，四個大人、一小童，用了七十幾鎊，700港元左右，不會經常去。）

英國生活，日常飲食都是自己煮為主，入貨都是當地超巿，超巿有不同級數，馬沙屬高級、特易購（Tesco)屬中級、呢度(Lidl)、Iceland屬低級，一個Pizza，馬沙賣緊5.5鎊，Iceland賣1.5鎊，以下是Iceland購物單：

（除了Pizza賣鎊半，咖哩牛肉飯1鎊，9元港幣唔洗，香港都不止這價錢，無毅力、易放棄，就回流吧！唔好同我講生存唔到。）

（只懂埋怨人、埋怨政府，不住為生命找藉口，不懂自我反省，去到邊度也生存唔到。我最睇唔起這些人，整衰晒香港人。）

這裡，有嗰句、講嗰句，只要不歧視，你可以有任何觀點及意見，絕不會以言入罪，出入不必口罩、不必掃程式、不迫你打針，一針、兩針、三針…打到病毒消失為止(你消失，病毒都未消失），自由自在，點解仲要留在監牢裡？

（唔聽話，書都冇得讀。教育成為政治工具。）

移英日記（三）新地方多問題有決心能解決

 要融入當地，首要學習當地語言，以往在香港所學，一則悟性有限、水平有限，二則從來沒有實踐過，就好像在陸上學遊水，落到水就知自己一無是處。

蘇格蘭英語跟我們所學不同，有強烈口音，Receipt讀成Re-Ze，愛丁堡由於是旅遊城巿，多英格蘭人，已經好很多，如果是格拉斯哥，根本是聾啞人士，陰公！當地港人教我，首先要聽，開著收音機，不住播新聞，因為新聞報導員，一定字正腔圓，正如外國人如果學廣東話，聽埋那些「軟硬天師」，都唔知學到甚麼中文，一樣道理。

當地港人教我，你唔需要明，只要不住聽，入你潛意識，慢慢你就會在自己記憶庫認到某些字，越認越多，就會聽懂，中文都變為英文。原來某些極權國家，要思想改造叛逆國民，也是用疲勞轟炸之法，歪理都變為真理。

未移英前，我已買了不少英國股票，我以為民生股，應該穩陣，買了最大嗰間超巿Tesco，點知跌了兩成，原來當地人因通脹嚴重，購物轉去呢度（Lidi）的低價超巿，故Tesco盈業額反而下降，股價自然下跌，故股神巴菲特都要巡鋪、外圍視察工廠出貨，問問當地人，不是單憑數據投資。

至於財務安排，基本上如移英前推算一樣，IB兌英鎊移至Citi plus電子錢包，基本上一般消費也沒有問題，搭車、超巿都係拍咭，好像香港八達通一樣，極其方便。但仍要申請本地戶口，因citi plus基本上可電滙過數，但都要幾日，要支付房租、能源費，遲交就麻煩，「歪芺」有BNO，直接網上申請「巴旗」等本地銀行，特區護照就要再預約去分店處理，我就申請Wise及Chase，Wise是方便兌換及滙款，IB雖滙價最好，但每月只可一次免費提款，而且電滙需時，有多一間會幫到手。至於Chase，每消費有1%回水，英國有些本地虛擬銀行，申請也簡便，但小心有的入錢要收續費，咁我當然不用。

去到新地方，冇野解決唔到，只係睇你有冇決心解決及面對。

（英國巴士，收費貴、班次疏、站又遠，又唔準時，一旦脫班，等成粒鐘，我約人飲茶也預早兩小時出門，一點也沒有誇張，我一換到英國車牌，立刻買車。香港牌也可駕，不過保險俾人殺到一頸血。）

（愛丁堡教堂上的，不是英國旗，也不是蘇格蘭旗，卻是烏克蘭旗，你就知點解？）