IB投資系列：冇咁大隻蛤乸隨街跳！

 有許多人想投資，但本金不多，以下會否是好方法：

「勾洲」有間公司，只要考取他們交易員資格及投資考核，就可以幫人投資，八二分帳，唔洗出資，賺到錢，投資有80%分帳，究竟咩葫蘆？買咩藥呢？

首先，商家佬冇死錯人，雖然考試成功可退還費用，但陣亡率超過七成，賺考試費已夠皮，正常人都冇可能一take成功，換言之必賺考試費。妨間有考試訓練班，賺你學費再加回佣，你賺唔賺到錢，關佢叉事，但錢就袋袋平安。跟住係咪賺大錢呢？如果順風順水，賺100元，分80元，好禾味！但只要每日損失5%，或戶口損失10%，立刻踢你出局！

我話俾你聽，做生意一定有賺有蝕，有上有落好平常，不過要控制每日平倉止損不超5%，你買任何AI股都必死，至於總損不超10%，假設之前已蝕損已達9.9%，便必須贏，做生意嘢點講得埋？投資也是一樣，變相每次都要極小心，次次穩賺，咁樣投資，俾你分八成，都唔會賺大錢，一不小心就踢出局，你玩埋我嗰份啦！

我哋一定要清楚知道成個局，基金公司賺錢是靠管理手續費，並不是投資了得，「忠圓」地產「屍生」炒樓很叻嗎？佢係靠賺取買賣手續費，所以佢要求資訊透明，有利買賣嘅營商環境，有人炒樓佢才發達。八二分帳係要保佢自己穩賺唔輸，賺錢係靠更多人入局嘅考試費。

你想清楚，考試點解咁嚴格？考試成績好就代表投資了得麼？我以前中學economics阿Sir，經濟好勁，但股票卻常輸錢，所以考試跟投資獲利與否，沒有關係。再者，八二分帳及5%、10%虧損就打靶，你一定極小心投資，賺10%已算不錯，公司分得2%，比放在銀行存還少，即或有些勁人賺20%，公司也只分4%，買尾債好過喇！又或者開法一套AI投資系統，賺錢更多。

你以為自己真係咁重要，發掘投資人才，局嚟㗎咋！做人唔好咁天真！冇咁大隻蛤乸隨街跳！光棍佬教仔：「便宜莫貪」，我警戒所有人，千萬不要輕易信人，我也不要信，信你自己，信耶穌就可以了！

（以現時情況，投資甚麼都死，「突郎浦」就係想迫人買美債。）

（我都蝕「一球」，做生意有上有落好平常。）

（只要有淨現金流就唔會死。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：企業俾佢玩殘

 美帝總統「突郎浦」日日有新動作，投資者根本冇時間消化，唯有靜觀其變…

「怠跡殿」本來是數一數二嘅企業，護城河又大又闊又深，要死都很難，今鋪都攪到剩返半條人命。

「突郎浦」迫「怠跡殿」於尾國設廠，轉移技術，加大尾國晶片生產，寶島嘅工程師可以24小時standby，尾國佬薪高糧準，夠鐘收工，電話都不可打俾佢，試問尾國設廠怎可能賺錢，根本係放血自殺，如果「突郎浦」再迫「怠跡殿」投資垃圾企業「嬰突耳」，加快收皮！

（「嬰突耳」係扶唔起嘅阿豆，執咗去好過，無謂獻世！）

（期權係綁手綁腳，期權完結後，仍未可以在盤後沽出，錯失時機，要較後時段才沽到。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：承擔到風險才玩！

 現時投資要小心，唔好貪心執平貨，高奴未郁手，我哋低奴切忌輕舉妄動。

作為尾帝總統，一定以尾國利益為最優先，如果尾元貶值，資金會撤走，但只要加關稅，別國滙率必跌，資金留在尾元。

至於「鵝污戰爭」，「鵝國」只不過紙老虎，「勾盟」GDP不知高過「鵝國」幾多倍，只要將軍費加至GDP5%，已等同尾帝軍費，有冇尾帝參與都冇關係，「勾盟」應當家作主，自己嘅事，自己負責，尾帝繼續以前嘅孤立主義，獨善其身。

作為投資者，你要預冧巿跌三成至一半，你承擔到風險，或者定投，價平買多啲，價貴買少啲，基本上仍然可繼續玩，如果係長期投資者，升升跌跌係好平常，牛巿升多跌少咪買多啲，股票多現金少，熊巿跌多升少咪買少啲，現金多股票少，個個都係咁玩㗎啦！

（最近賣了看升期權，雖然賺了千幾講元期權金，但俾佢綁死100股，本來100股升10點賺1000尾元（7800講元）為了千零元而不能賺幾千元，十分反智，期權就是兩刃刀，股價唔郁或郁很少，有人請飲茶係過癮，但個巿一郁，就阻住我發達，有錢都執唔到！）

（做人要實際啲，唔好咁㒼塞，要聽下人哋Andy哥經驗之談，X你即係塞錢落你袋，冇錢就去打工。我在股票跌兩百萬，我立刻躝去酒店執房，俾鬼佬呼呼喝喝，後生仔，腳踏實地先得㗎！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：投資不分散？

 在我投資初期，總有些幼稚嘅想法，就是全球分散投資，將資產分成十份，五份「尾元」，三份「勾蘿」，一份「嬰鎊」，一份「逸圓」之類，嗰陣時候，仲有「新嫁菠」REITs ，「家𢲡戴」股票等。

問心，全球都有資產，好似好威，其實根本無法管理，因為人係要睡覺，再者除了股價，仲有滙兌，一條友根本冇得玩。再者，我哋啲低奴，得嗰雞碎咁少錢，分到咁散，根本無意思，如果真係要咁做，買隻環球基金已經可以。

跟住嚟到「嬰國」，係咪都兌換了「嬰鎊」，又不甘賺嗰少少息，又多手買下「嬰國」股票，「嬰國」脫「勾」以後，經濟一落千丈，賺少蝕多，搵唔到食，嘥氣，倒錢落海。

冚世界只有炒「尾股」有錢賺，其他地方不要妄想。記住，詠春嘅連環日字衝拳係打在同一點，達至致命嘅傷害，如果分散咁打，就冇用了。

只是今年狂人上場，有更多不確定性，佢接呢個爛攤子冇可能keep得咁耐，左修右補都唔係辦法，最終可能把心橫，將巿場爆破，整冧個巿，以救巿之名，借勢減息、印錢，置之死地而後生。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：馬屍黑變法

 現時經濟係點，不言自明…

作為全球第一大經濟體都要做「船頭尺」，周圍度水，你都明點解。

（睇過「秋天的童話」就自然明白。）

明知經濟放緩，甚至硬著陸，都唔救巿，自然有其原因，係救都救尾國政府先，個巿唔冧，邊個買尾債？邊個借錢俾尾國政府？

這個時候，尾帝要全球亂，越亂越好，咁尾國就最穩定，資金就會流向穩定國家，尾股、虛幣都唔穩健，投資當然買尾債最好。

尾國係唔掂，就好像變法前嘅秦國一樣，商鞅變法成功，才讓秦國脫胎換骨，現在「突郎浦」係靠「馬屍黑」及幾個AI青年，如果變法成功，尾帝霸權可以延續數十年，「馬屍黑」嘅工作十分辛苦，吃力不討好，四面樹敵，如果沒有國君主力支持，係冇可能成功，佢間「突屍拉」，股價俾人質到半價，真係就離拉柴，「突郎浦」立刻話買番架「突屍拉」代步。

尾國唔掂，全球都唔掂，尾滙下跌，全球都會貶值，沒有國家可以獨善其身。

（每個國家也有他們嘅問題，秦國有秦國嘅問題，今日尾國有尾國嘅問題。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（222）保持健康

 始終年幾大，新陳代謝慢，又日日無所事事（人哋覺得），自然容易肥，加上麵包作為早餐主食，現代嘅麵包唔會有益，有益也不是輕易買到，高升糖指數嚇死你，為了健康把關，都要做啲野！

現在要將麵包先雪了，產生抗性澱粉，然後再焗多士，係用多了工序及能源費，但為了健康，唯有這樣，跟住又食牛油果，這種水果，脂肪成份高，容易飽肚，但十分難食，我會點小小豉油來食，有少少似三文魚刺身，較易入口，生酮就不應伴豉油，否則會破功，我純粹係想飽肚，食少一點。

運動是需要，但跑步並不適合，傷關節，遊水較佳，但要駕車去遊泳池，要日日都做到卻是很難，家中都可做才是王道。除了打拳打空氣，冇沙包，腳踢又係踢空氣，詠春散手練習，又係打空氣，不過保健最有用係深蹲，次之平板支撐，因為人體70%肌肉在下身，練到就可抗衡年幾大嘅股肉流失及基礎代謝率降低，如果喺健身室，當然負重深蹲，效果更佳，其實國術嘅扎馬，都有類似效果。

日常生活，不能太爛，才能襟用一點，每日要追聖經、追英文、追運動，日日要整野食、洗碗，日日都為生活追趕，我想除非熄機，才真正安息！

IB投資系列：唔貪心唔會死

 有關投資，總會有些道德家會話股票邪惡之類嘅話，甚至說貪財係萬惡，信耶穌嘅人應該遠避…云云。點知「強迫金」出現，嗰班宗教人士比我更雀躍去討論，錢嘅然咁萬惡，點解傾得咁開心？MPF這個照妖鏡更清楚讓我們見清真偽、善惡。

如果投資係邪惡，咁點解做基金經理嘅弟兄，教會為什麼唔譴責佢呢？如果股票係邪惡，點解宗教人士可以興高采烈去討論MPF呢？莫非強迫，就不算邪惡麼？這是什麼邏輯呢？

一樣野嘅善惡，不在乎投資係職業？還是法例嘅強迫？全在乎你自己個心，如果個心係善，做「扭記」都可得監販嘅尊重，個心係惡，做「差人」都可以做衰野，全在乎人自己。

以前做生意嘅人，都會俾人覺得邪惡，因為「逢商必奸」這句話，不過隨著社會進步，現在做生意唔會被道德家審判，不過對於投資，仍過唔到許多道德家嘅心。其實開鋪頭賣野，又係低買高賣，股票又係低買高賣，賺取差價，運輸公司會買期油來平衡油價波動嘅風險，股票也有期權。

冚世界賺錢法門，總不離：息差、價差、槓桿，冇商業活動，任何人都生活不了，道德家請自耕自織，自食其力，唔好俾世界污染！

當然投資也有所謂嘅貪，你係咪賺取緊唔屬於自己位份嘅錢呢？最簡單咁講，你有幾多本錢，才能賺取幾多嘅錢，就算聖經嘅比喻，拿了五千銀子嘅僕人賺了五千，兩千銀子賺了兩千，也是按比例，100%係好誇張，不過聖經冇講時間，如果分做四五年，20%利潤唔過份，牛巿好多人都做到。

有些人本金唔多，成日望發達，槓桿用到盡，投資在高風險類別，意圖在短時間賺取極多金錢，明明自己冇貨，卻賣出十數張看升期權，明明冇錢接貨，卻賣出十數張看跌期權，賺期權金係好禾味，但巿況一旦不似預期就立刻PK！

如果有100股尾股，就不怕賣出一張看升期權，如果你有買100股資金，也樂於儲股，也不怕賣一張看跌期權，賺也不過點點期權金，夠飲茶，如果唔貪心，根本唔會死。如果100股嘅能力都冇，就不應賺期權金，而是付出期權金買升或買跌，輸極也是輸期權金，根本唔使死。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：期權投資

 上兩星期真係好納悶，整個星期都冇買賣，咁即係冇錢賺，真係好慘！連飲茶、自助餐都冇去，消費係講興致，冇錢賺，用個錢都牙痛咁聲。

面對納悶嘅巿況，期權，或許是多幾個招數去應對不同嘅場景。不過要玩這遊戲，先要識專用名詞，股票嘅買叫揸，賣叫沽，期權嘅買叫long，賣叫short，升叫call，跌叫puts，其實我都唔明點解咁煩？買叫buy，賣叫sell，升叫up，跌叫down，不是更好嗎？

期權不過是一合約，議定好特定嘅時間及價錢去交易，當然後來變成投資、投機、避險、對衝嘅有效工具。

期權有買、賣、升、跌，因此分出四個情況：

一、買升期權：預期大升

二、買跌期權：預期大跌

三、賣升期權：預期小跌，升不穿

四、賣跌期權：預期小升，跌不穿

買升或買跌期權，係要俾「期權金」，一張合約等於100股，如果在特定時間升穿或跌穿行使價，回報可以係無限，損失不過是期權金。

賣升或賣跌期權，必賺取「期權金」，也代表100股，如果賣升，升穿行使價，你要特定價錢賣100股俾人，假設你賣了Tesla賣升期權，行使價250元，賺了期權金，但你根本冇Tesla股票，至到期日，Tesla升至500元，你即係要在巿場上用500元買貨，然後用250元賣俾人，蝕25000美元，即19萬5千港元，上述運作證券行會做野，你攞錢補倉就可以。

至於賣跌期權，必賺期權金，但跌穿行使價必須接貨，如果你冇能力買100股，或孖展戶口沒有足夠保證金，立刻爆倉。

買升跌期權，風險只係期權金，利益無限。

賣升跌期權，風險無限，利益只係期權金。

買升跌期權，表面著數，但除非有內幕消息，否則要準確知道升跌，其實難度係相當大，輸嘅機率係相當高，反之賣升跌期權，表面蝕底，但如果你有貨賣貨，有錢買貨，係長期、高機率穩賺期權金。

期權屬高級拳法，相當於詠春嘅標指，只適合有經驗投資者。

（我賣出某股票看跌期權，收1.52美元期權金，1張合約100股，152美元，即約1185港元，英國都夠飲茶了。至收巿未到行使價，我也不必接貨，這個係末日期權，即日到期，唔使等太耐。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：虛、假有分別嗎？

 無可否認，我哋呢啲垃圾低奴，或多或少也受到「富爸爸」嘅啟發，才有今日嘅光景。

不過「羅八突青旗」係超級老千，也是事實，必須小心演繹佢嘅說話。

尾帝欠36萬億係面數，若果加埋醫療及福利開支，加上人口老化，負債會超230萬億，不過咁，幕後玩家會讓你咁長命麼？病毒來自人類實驗室，還不夠清楚嗎？「役瞄」真係防到病？還是多咗病？藥物真係救你？還是害你？「澳爸碼」醫保真係幫到尾國人嗎？保費就識收，錢卻claim不了。

最近許多「嬰國」傳媒叫人補供NI，以便可獲得退休福利，真係咁益你嗎？「嬰國」將退休年齡由66歲加至67歲，佢可以不住推遲退休年齡，至68歲，或70歲，你有命工作至該年齡，或是你有命退休？或是可以攞到退休金幾多年呢？即或俾你，咁多年印銀紙也讓退休金實質購買力不住減少，最終也無法靠退休金生存。

「羅八突青旗」係超級老千，用「假幣」買「虛幣」，究竟係乜嘢葫蘆？買咩嘢藥呢？「虛」同「假」有甚麼分別呢？如果用字面解釋，假嘅野係冇價值，虛嘅野都有少少價值，正所謂：兩害取其輕，兩利取其大，棄假取虛，說到尾，只不過「富爸爸」重注虛幣，當然搖旗吶喊！

（誠哥係漁村最頂級高奴，華麗轉身避一劫，仲賺千五億，學野喇！我冇買「講股」，「詳禾」都升了唔少，有錢都冇執！）

（如果唔醒，點做漁村首富呢！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

天下烏鴉一樣黑

 最近看到世界局勢，就令我想起以前歷史…

戰國時期，魏國攻打韓國，齊國靜觀其變，待韓國差不多亡，兩國國力被消耗得七七八八，才出手。今日「鵝國」入侵「污黑難」，各國靜觀其變，雖有支援，但又不足令佢贏，令戰事持續，消耗國力，待兩國國力差唔多耗盡，「尾國」才說要停戰，「嬰國」、「發國」才說要出兵，這個劇本以前已用過，十分熟悉！

最近又睇商鞅變法，秦孝公出了求賢令，希望招攬人才，改革國家，令國家富強。原來改革要成功，單靠商鞅嘅才華，仲要君主全力嘅支持，才能清除舊有勢力及利益集團，就好像今日「突郎浦」要全力支持「馬屍黑」，改革才會成功，國家才會強大，倘若成功，尾帝霸權或會因此延續數十年…不過孝公一死，商鞅即亡，這就是成語：作法自斃。

（「馬屍黑」受到前所未有嘅攻擊，工廠、商店受破壞，但只要仍得到「突郎浦」支持，就能夠涯過。）

我哋低奴所見到，只是一場戲，真真假假，無從得知，「擇蓮司機」本來就係戲子，演戲完全冇難度，大家扯貓尾，拉「勾洲」落水加入，「抱驚」如何再戰呢？當然「勾」、「尾」都唔係要「抱驚」下台，而係點攞最大利益，司馬懿從來唔係要諸葛亮死，因蜀國一亡，他也不能生存。

全球割韭菜，「尾帝」割全球韭菜，其他國家割自己國民韭菜，殺到你一頸血，「嬰國」首相「私己然」勁加稅，為咗「污黑難」、為咗「正義」！大家明㗎喇！戰爭嘅錢冇得計，任你噏！一個炮彈，幾萬元又得，幾億又得，無人會去戰場統計及研究，因為太危險，「鵝國」固然貪，「污黑難」也不會少，「勾」、「尾」也是一樣，俾你嘅武器可以係過期、失效、不合標準、退役，「寶島」用真金白銀向「尾帝」買嘅武器都咁垃圾，何況送嘅武器？所謂幾千億軍援，都唔知值幾多錢，換你五千億礦產，不知幾着數！

國際間從來都冇正義，有嘅只有利益，大家「圍威喂」，「攣闔角」投票，「尾」、「鵝」站在同一陣線，雖然政客都係演員，都係做戲，但這次真係做得好核突，西方民主與極權嘅對決，都不過演俾你哋低奴睇，「突郎浦」真係重視基督教家庭價值麼？佢跟幾多女星有關係，有幾多段婚姻，就已經有最清楚答案了。

IB投資系列：高奴玩邊科？

 炒股最緊要識抄功課…

某高奴最重倉係仍然係自己嗰隻股票「媚遠」，第二重倉係「爸運」，雖有減持，仍然係重倉。

這個高奴，非AI股比例較多，不過佢仍持有「焀哥」及「焀哥L」，加埋也有17.37%。

這個高奴，又係買「焀哥」，我知這間公司係全能，無人的士、雲端、AI，樣樣都有，但股價唔算突出，樣樣都有競爭。至於「尾國銀行」、「篩荒石油」、「平果」，好明顯係跟「爸飛突」，佢也持有「爸運」。

「爸飛突」持有現金上升並非重點，因為高奴越來越有錢，現金越來越多，並不出奇，重點係現金佔資產比例，不住上升，接近三成，就要小心！其實佢都想買野，但資產太貴，出唔到手。

亦有人留意「𡃁屍婆囉匙」，去決定投資去向…

不過佢知咁多人跟，就會跣大家一鑊，任何野，千萬不要盡信，資訊只能作參考。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（221）林弟兄保重！

 今日主日崇拜結束，「老田」牧師呼籲為林弟兄祈禱，並表示唔認同嘅可以離開，最後帶領會眾為林弟兄祈禱…

以前睇周星池嘅電影，九品芝麻官…

原告變被告，真係攪笑，點知真實世界竟然咁荒謬！

閱讀聖經，羅馬書第八章一節…

如今在基督耶穌嘅人，就不被定罪！即使人間法庭對你怎樣也好，見証唔係口講，而係用行動表達出來，珍重！

（直播，某程度係抽水，作為民選議員，做咗野一定要俾人知，增加曝光率及知名度，對日後競選也有好處，不過正因為直播，將整件事記錄下來，真真假假無從推諉。）

愛丁堡詠春：膀手衝拳

 今日讀聖經希伯來書…

你哋應該作師傅，點解仲飲奶，好似細路咁款！

確實，傳統嘅功夫，目標根本唔係要你做師傅，佢哋最怕教識徒弟冇師傅，所以佢哋只係想你長期做徒弟，長期交學費，好像車房，老闆從來都唔會教你野，你所學，全部或大部分偷師而來，髮型屋也是一樣，因為怕你成了師傅，跟佢爭生意。喺利益衝突下好難學到嘢！

再者，真係有料嘅師傅唔多，教得多，就冇料再教，怎向你多收學費呢？真正有料嘅師傅，佢有今日成就，也是自己有某些潛質、悟性，或者比常人格外勤力，所以他們也不會有耐性去教你，同樣嘅招式，佢打了過百億拳、流了過百升汗水，才明白，俾少少學費就想套招，冇咁容易！

所以，有料又唔想教你，冇料又教唔到你，學傳統功夫根本係浪費金錢、時間，一定要明白這些條件下再講下去…

真正嘅詠春，好像機關槍一樣，被擸嘅手，只要有反應變膀手，唔好俾人擸死就可以，擸人與被人擸也是一樣，大家都係少一隻手，另一手可化日字衝拳反攻，簡單直接，唔使下下「膀擸打」、「抌間打」之類咁麻煩。記住，手法並不是個型似唔似，而是包含整個動作嘅過程，如果該動作由1至10，做到5已經夠，就無需繼續做下去，好像告訴人自己手法有幾正宗，就好像美國封鎖古巴，已解導彈危機，就無需再派軍隊登陸。這招叫膀手衝拳，人哋嘅拳已如箭在弦，你嘅拳必須先擊中對手，而且有傷害，才能解對手嘅攻擊，圍魏救趙，軍隊一定會威脅首都大梁，龐涓才會退兵，一般詠春嗰啲叫「飛機拳」（容許我咁講！），摸咗當打咗，出了相應手法嘅型，而冇實在，對方個攻擊都會停，這純粹係「黐手練習」，讓大家在冇傷害下安全練習，唔好當真，亦唔好以為黐手叻就代表打交叻，橋手反應只不過其中一個條件，唔係全部。

傳統詠春，大都是牛皮燈籠，點極唔明，以前跟人辯論詠春轉馬，係腳中而非腳踭，重點係重心轉移，講到口水都乾埋，都要死拗，意氣之爭而非理性，浪費時間。講到底，黃公唔可以錯咩！宗師唔可以錯咩！梁贊唔可以錯咩！嚴詠春唔可以錯咩！五枚師太唔可以錯咩！孔子一定冇錯咩！「君要臣死，臣不死視為不忠，父要子死，子不死視為不孝」，時代唔同㗎啦，搏擊也經過咁多驗證，係人係鬼其實都知，冇得掩耳盜鈴，不過咁，這裡不過申述自己觀點，你認為自己啱，咪當我廢噏就算吧！

移英日記（220）窮鬼早餐

 現時每逢星期二早上，都有窮鬼聚會，一齊吃窮鬼早餐…

嚟到大不列顛，一定識去「喂打潘」Wetherspoon 食窮鬼早餐，兩塊多士，茶啡任飲，只需1.99鎊（20元港紙），但係我哋班餓鬼，又似乎唔夠，再加個「自由早餐」，不包飲品，2.99鎊（30元港紙），連20%消費稅，合共5.48鎊（55元港紙），十點幾先食，晏晝都慳返！

上述參與人士都有車有樓，只是我冇樓，但架車較貴，以前我揸1700鎊嘅Honda 思域，真係冇問題，合我嘅身分，只是壞得太多，又要網上買零件，又要攞零件去打磨，又要麻煩人幫忙，自己英文又唔好，千幾鎊嘅車，每年又要千幾鎊去整，雖則整過嘅地方，幾年都唔會有問題，但十幾年車，七勞八損，下次又壞另一部分，永無止境，局住買幾年嘅Approved car。

其實貧窮定有錢，全在乎心境，你覺得滿足，便是富有，你不覺得滿足，即使擁有許多，仍是貧窮。

靠外表，一般人很容易誤會。

你身邊是Loser friends？還是Rich friends？唔係歧視窮人，而係你嘅財富係咪應使得使呢？你係咪真正滿足呢？

我部「埃瘋11」虧虧地，我仲考慮緊買唔買「埃瘋16e」，「平果」嘅股票梗係唔買啦，都冇出過好嘅產品，全部都係食老本，好像漁村咁，遲早都係死路一條，「平果AI」，垃圾！「疊竊」，好好多！

IB投資系列：跟股神實冇死？

 兵法有云：「虛則實之，實則虛之」虛虛實實，世人無法猜透，就好像「突郎浦」多次稱「抱驚」、「今上」、「甘將軍」為好友，實際卻是口蜜腹劍，這次看似出賣「污黑難」，實際礦產一半在「餓萊屍」佔領區，間接讓尾帝伸隻手落去，成為命運共同體，亦讓「污黑難」得到保護。

未來經濟會點？硬著陸？還是軟著？基本上高奴也未必知，決定權全在乎幕後玩家，當然高奴會比我們估得清楚、準確，「揮撻」財報推出，人人拋售，因「突郎浦」加關稅，令巿場恐慌，股神「爸飛突」全拋售「彪浦500」ETF，更令巿場恐慌⋯⋯

「爸飛突」持有三千幾億尾元現金，佔了「爸運」差不多三成，有人解讀股神已預料股災已到，早作好準備炒底。不過要小心，可能這不過是「幸存者偏差」，別忘記仍有七成是放在股票，咁大部分資產放在股票為何卻看不到？佢係全沽「彪浦」ETF，不過佔佢1%投資都冇，係咪真係咁有指標性作用呢？反觀減持「平果」及一眾銀行股，就睇到科技股價格偏高及未來經濟或對金融產生衝擊及危機。

作為低奴，不會有第一手資料，也沒有水晶球，高的未算高，低的未算低，你只能分注揸、分注沽，期望獲取較低成本，賺取微利。

以前係借「逸完」買「尾股」，現在係借「逸完」買「逸股」，沒有滙兌風險，只要收嘅利息高過借嘅利息，就有息差，不過仍有賺息蝕價嘅風險，五大商社雖然穩陣，但股價也有上落，不竟全球經濟不明朗。

（某些地方經濟好危，投資要小心。）

（尾國嘅高奴，有錢到你唔信，尾帝財赤嚴重，不過要死都唔係佢死先。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。