許多人都想成功，有人想要隻「奴力事」，有人想要「發拉脷」⋯但再問一問，點解要「奴力事」？而唔係「卡時奧」？點解要「發拉脷」？而唔係「瘋填」？你願意為這目標付出甚麼？犧牲甚麼？有甚麼具體行動達成這目標？
如果通通都冇，不過係空想，目標如果唔係化作欲望，好似對氧氣嘅喝求，唔好諗住會成功！
唔係個個好似「菜家文」未成年已開始接觸投資，擁有充足投資經驗，身家過億，唔需要好似「高高哥」等YouTuber 靠流量、「披闖」賺錢。
我細個見到父母工作努苦，我便開始思考一個問題：點樣可以唔使做？
我都克苦己心，三十年前，一萬元收入儲七千元，做零存整付，第二年八千元，儲夠一筆再做定期存款⋯後來事業失敗，變了生存模式，all in 「東瀛」基金蝕晒，已經沒有再想，後來到了教會工作，諗住終身事奉神，唔諗世間嘅榮辱，可是事與願違，人到中年，甚麼都做不了，入了地盤，做地盤佬，雖然沒有攞到師傅人工，但也較其他人工優越，開始有儲蓄，在一通開了證券戶口投資⋯。
（當年賣埋層舊樓，重搥出擊，過分集中地產，一隻16號，已差不多三球，真係黐線！）
開始都係交學費，但未至輸到仆街，勉強維持，後來一通收皮，轉倉至IB，後來「漁村」局勢轉差，蝕住沽，又蝕了不少。
由地區投資變成全球投資，一開始又係唔識，諗住要分散全球，度度都沾手，但其實管不了，又輸了不少，移民了「嬰國」，又覺得要投資「嬰國」，點知「嬰國」又唔掂，又輸了不少，最後得出結論，你只需炒「尾股」。
最初靠買賣「尾股」賺錢，但我trade得太多，計稅又困難，要計每月滙率，用「嬰鎊」結算，無賺咁多錢都可計到你賺到天價，我逼住蝕讓股票，又蝕了許多錢，這是兩刃刀，可以賺好多也不必交稅，但買賣係講時機，如果考慮埋滙率，冇得玩。最後只玩「尾股」期權。
好啦！玩「尾式」期權，賣了超過一年嘅看跌期權，如果到期輸錢，我都心甘命抵，點知佢預早行權，割禾青，冇仇報。年期並不是叫你守到最後一日，而係要識止賺、止蝕。
投資都唔知仆幾多次街，望著目標繼續努力！「菜家文」係成功例子，我算是反面教材，邊炒、邊學、邊仆街⋯。
免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。
