IB投資系列：借日圓買日股，適可而止

 今晚零晨三點半起床，要開夜車展開英格蘭自駕遊及郵輪之旅，今日係最後準備。將倉鼠交俾朋友照顧，執好行李。

入滿油，檢查好呔壓，充電寶充滿、過江龍、補呔寶、水，公路塞幾個鐘，有水，有水樽去小便，點都唔會死，擺放AirTag防偷車，做人要計劃周詳，投資也是一樣。

美帝割韭菜並非第一次，當你威脅到佢霸主之位，定必對付，廣場協議係對付東瀛，制裁及關稅係對付天朝，唔係仲盲舂舂衝埋去，咁笨呀！美帝怎樣用「吸星大法」盡收天下財富，重唔知麼！你以為東瀛股巿升咁多，東瀛人就富起來嗎？通脹咁溫和，你就知唔係。

東瀛人投資很保守，大部分揸現金，揸住日圓等貶值咁低智嘅！保險產品佔三成，股票、債劵只有16%，故財富轉移，由東瀛轉到美帝。

現在過了高峰期，我都唔建議買日股，點知幾時冧巿，但可IB低息借日圓買收息穩健收息股，賺取息差。小小玩下，冇問題。都係嗰句，當資產跌至零，對你嘅生活完全冇影響，就可以了。

買10股，廿幾皮，無傷大雅，收4.8%息，孖展利息1.5%，賺3.3%，有數圍咪玩下，唔想等賺幾舊水走人亦可，悉隨尊便。

（借日圓，借得越多越平，最平0.5%，半厘都賺唔到，就唔好投資。）

借日圓買日股嘅好處係免除滙率風險，日圓跌了咁多，一反彈就死得人多，我都係咁還晒借了幾球港紙價值嘅日圓，佢一標上去，真係會死人，但將所借日圓買番日股，就不必怕日圓升了，重賺多啲。

（炒股跟練詠春一樣，唔使理人點睇，又話奪刀、奪槍、破泰拳、破巴柔，發夢早啲唞啦！今日賺10點，3870元，唔理你用甚麼手法，打倒人就係好功夫，唔理你點炒，賺到錢就係好投資。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。