IB投資系列：有料唔傳承，冇料專呃錢

 經歷過郵輪衛星上網，在公海投資，我明白投資嘅專注是十分重要，唔需要任何家庭責任，唔需要理會吃甚麼，去邊度，確實是一個優勢，但始終人要返回現實世界，我嘅投資又未至於成功到可以有管家、工人料理，說到底賺唔賺到錢係講機遇。

投資要用幾多時間？你從我網誌更新速度就可知唔多，但係也可以說唔少，好像炒日股，以歐洲時區計，一定係睡眠時間內進行，我唔會刻意較時間起床炒股，但晚上突然醒了，或去厠所，倒會撳一撳手機，有得炒就set好價錢等，冇得炒就繼續瞓覺，個人醒了瞓唔著就寫下網誌，夜深人靜，有邊個同我吹水？唯有自娛，又或未到價要等，又再寫。中文打字都係咁樣自學，以前正規用電腦，現在單手在手機打字，慢少少。

搭雞棚，我就唔使了，現在英國時間早上4:06

（真實嘅手機原圖，用單手入倉頡輸入法，今日係星期六，我半夢半醒以為可以炒日股，人都醒了，咪寫下網誌吹水…）

因為我唔理解，我嘗試代入搭雞棚者的心態，佢哋當然想成功，問題係點樣成功，股評人出名後，也可透過出書、上電台、電視台分享、辦課程、甚至有金主注資開証劵公司，靠收取佣金圖利，確實最成功嘅投資者、基金都係靠收取管理費。

（樓價急跌，「屍生」生意大減，但總比不上波叔個仔立即仆街，這就是收佣金與自己炒嘅分別。）

換言之，當中有真係識投資好像股神巴菲特又有，齋吹四萬點，亂咁噏當秘芨又有，正如我所說，識投資，要少成功容易，要大成功卻是困難，就好像學功夫，基本防身自衛容易，要做拳王，難了！再者YouTube 100萬view才賺五皮，「講冬話」有幾多觀眾？再者地道一點則只限漁村人，要出名，要觀眾多，應用天朝語，要國際化應該用大不列顛語，單單向漁村人，五皮都唔容易賺，仲要sell各種理財金融產品、証劵、VPN，差在直播未帶貨…汁都撈埋，好似乞丐咁。

得嗰幾皮，攪咁多場大龍鳳，一係好似講股佬，靠講股為生，不是真有投資，反正要申報自己冇持有該股票，以顯示所謂客觀性。一係好似我呢啲二打六，三更貧五更富，股巿一失威就要重出江湖，如果有輔助收入幫手，股災個心都定啲，也守得耐一點，除此以外，我想唔到其他可能性。真係掂嘅投資者，唔使講多，穩定賺得十萬八萬，都不屑日夜拍片、整片…view數唔夠，人工、皮費都蝕埋，嘥氣啦！

正所謂：「真人不露相，露相非真人」，咁簡單道理，竟然冇人明白，如果我有發達秘芨，誠哥用長和跟我換，我都會斷言拒絕，披闖俾嗰啲雞碎錢會有堅料？會唔會太天真？我學詠春，師傅未到死嗰日都唔會將最重要秘芨、要訣和盤托出，跟我學詠春都係徒然、嘥氣，我都係得二打六功夫，我都等唔到嗰日㗎啦！就是宗師唔去到臨死前一刻，也不肯將整套詠春錄影，留存後世，奈何冇氣冇力，手法、法度不夠精準，嘥氣！中醫、功夫，每代人都收起一啲，幾代之後已變垃圾。有料唔傳承，冇料專呃錢。這是民族悲哀！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。