IB投資系列：日圓升、日股跌

 以前借日圓買美債、美股，不知幾爽，當時我借了大約四球港紙左右價值嘅日圓，兌成美元賺息差，個個月肯定送你一萬大元，如果啲錢用嚟炒美股賺到錢，更不止此數，月月都幾皮…

不過好景日子不會長久，我早早還晒日圓，去槓桿化，就是怕日圓升，現在終於發生…

1美元兌152日圓左右。升得算急，一波完了，另一波又嚟，日本央行應該做緊野，加上美帝科技股跌，造成連鎖效應，日股也下跌。

我現時只有少少地借日圓買日股，避了滙率風險，但日股跌，也造成損失，五大商社也跌，也有蟹貨，只有房托由於係收息，守備力強，升跌不會太大，房托有4厘息，我IB孖展借得少，要俾1.5厘，息差也賺2.5厘，隻股票唔掂，咪放喺度，錢都係借，收息係額外賺，冇所謂，如果個價有升咪放咗去，完美示範：息差、價差、槓桿嘅投資方法。

你賺到錢，唔使請我食飯，蝕了錢，也無需怨我，X我老母，賺到錢係你嘅本事，蝕了錢係功夫不足，我住喺英國，日本喺地球另一面，日股我係冇精神睇嘅，係去厠所順便撳幾個制操作，你地身處漁村，又經常去東瀛，嗰邊情況及資訊，應該更清楚了解，更有條件去炒，但需要多做功課，錢唔會由個天跌落嚟！機會永遠留俾準備好嘅人。

（敵人露出破綻，你都冇能力使出致命一擊，有甚麼意思呢？捉到鹿都唔識得脫角，有甚麼意思呢？）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。