移英日記（179）悠長假期（十四）

 經歷了兩星期悠長假期，倒要嚟一個總結。

錢就用了，初步估計郵輪加自駕遊用了約四萬港元左右，究竟值不值？如果以未有小朋友嘅成年人來說，可以玩盡一切郵輪設備，每到一個點又可深入了解風土人情，是完全值租。

但一加入小朋友因素，任何時候成人都要睇實小朋友，我去泳池都冇游水，純屬浸水，陪小朋友玩，就是郵輪嘅大型水上滑梯、競技活動，完全冇玩過，每晚嘅show，第一次太夜，小朋友在咁勁嘅音響下都睡著，要抱著返房，第二次早一點嘅show，冇book嘅情況walk in，要站著睇，也投入及精彩，唱歌一定好過「終年好聲音」，跳舞一定勁過「各褲成」，扮Michael Jackson嗰個可以做斜45度前傾動作，除了對鞋有機關，核心肌群都要練到好勁，我們晚會活動更不會參加，因小朋友要睡覺。

幸好有托兒服務，讓小朋友在職員帶著情況下玩，成人可短暫甩身，我同「歪芺」去了「劇鮮勞」玩了老虎機，純為娛樂，因為我知道自己嘅戰場是股壇，不是賭場，第一次平手離場，第二次輸了四舊，當去了機鋪或去了「冒險樂團」推銀都使了去。

每晚可去指定餐廳用膳，只去了兩次，因餐廳用膳要等待上菜，小朋友冇耐性忍耐，食嘅野又未必適合小朋友，雖然有小朋友嘅菜單，但又唔想佢食太多熱氣野，所以大部分時間都係自助餐，早、午、晚三餐，真係好悶！

兩次落地法國，兩次西班牙，小朋友行不遠，倦又要抱，又要去厠所，又扭計要買玩具…你都可以想像個場景係點，走馬看花便算。

一星期郵輪，2次show、2次餐廳、2次「劇鮮勞」，去唔盡、玩唔盡、食唔盡、冇得玩、常要抱，小朋友就真係開心，但大人就…

自駕遊嘅情況也有類似，落腳點附近也不會太遠，或駕車食飯附近。每個城巿除了布里斯托嘅酒店留了三日，其餘：雷丁、伯明翰、列斯，都只留一日，駕車加上中途休息站入油、食野，已用了時間，所以去到酒店整頓，跟著出外吃晚餐，順便行下，明早酒店吃早餐，執整行李都差不多又起行，遊覽時間實在不多。

自駕遊一定要中途站入油，不會入城找，浪費時間又塞車，中途站嘅油錢一定較貴，而且一定入滿，避免冇油或影響行程。去到酒店，有的泊位免費，有的要收錢，都要照俾，其中一間一晚收15鎊，一間收20鎊，去食野，巿區停車場或街泊一定要收錢，除了大型超巿嘅停車場免費，但去到巿區，肯定冇。

英國表面風光，實質貧窮，這可分物質及屬靈層面，物質方面，貧富懸殊嚴重，酒鬼、毒販、露宿者隨處可見，我去列斯巿場，猶如七十年代巿政街巿及熟食中心，賣嘅二手玩具，我嘅兒子都不屑一看，二手衫、二手工具、電鑽等，猶如鴨寮街。至於屬靈層面，極權國家會將領袖邪惡極大化，民主國家會將普遍人民邪惡極大化，以人權為名，實際是任意而行，墮胎合法化、大麻合法化、電子煙合法化、同性婚姻合法化…偏行己路，最終走向滅亡…。

講番正題，從大人角度，一定唔值，但從小朋友嘅角度，一定值得，投資在大人，唔知仲有幾多時間，但投資在小朋友，前途無可限量。