IB投資系列：高機率才下注

 我移民「嬰國」，我預咗治安差，「鄉講人」細粒，唔夠外國人臂展，我準備了鋼頭、鋼底嘅安全鞋，有賊人用小刀打劫，我都唔怕。

然而，我住這城巿治安好，區分又好，武力根本唔需要，反而輕身薄身鞋仲好，方便駕車。以前揸架「錢七」，忘記鎖車，咁cheap嘅野，人哋都費事去偷，完全冇事。

如果一件事發生機率低，過多嘅準備就是多餘，甚至浪費。有人話要儲金粒，因為黃金保值，金粒在災難時可換食物、食水，或者賄賂官員放行，增加生存機會。講真要投資黃金、虛幣，用ETF或相關股票就可以，金粒儲存失當、遺失、盜竊，損失更大。再講，走難機會有幾高呢？

賭錢係低機率操作，贏率低、輸率高，賭嗰個都白痴及妄想症，以為會發達，其實送錢俾人使，真正嘅投資人係唔會咁做。我都有俾錢給「歪芺」在郵輪（100鎊）、「劇鮮奴」（100講元）玩兩手，just for fun，我當去機鋪打機吧了！

呢個世界邊有咁多股神啊！我都係用平均投資法，如果係指數基金，不問價定投即可，如果係個別股票，一旦壓錯注，好易全軍覆沒，故有少少唔同，你永遠唔可以持太多，亦唔可以冇股，故跌少少就買少少，升少少就賣少少，因為係平均價，你唔會發達，亦唔會仆街。

至於期權，只會賣出期權合約，賺期權金，因為係必賺，在收期權金那一刻，但風險可以無限，如果你登記IB做專業投資者，你無貨都照樣可賣出看漲期權，收期權金，但一旦股票升爆，證劵公司會在巿場買入升爆嘅股票賠俾人，然後要你賠差價，真係可以破產。因此，有貨先會賣出看漲期權，有錢才會賣出看跌期權。

你只要維持高機率操作，贏多過輸就冇問題，「劇鮮奴」都係咁樣運作，賣期權，十次總會有一次要行權，贏十次都頂唔到輸一次麼？當然「不入虎穴，焉得虎子」，如果要唔中招係可以，你也冇肉食，正如有些人話食河豚，最接近毒素嘅肉最好食，唔知係咪真，但正好表達出吊詭之處。

自己衡量風險及回報嘅平衡，作出最好嘅配置，切勿孤注一擲。

（本星期蝕34512講元，即使期權金賺了，也蝕兩皮半。某電車嘅看漲期權在350元要行權，要強制賣出100股，收巿價也差不多，沒有蝕。投資就係這種上上落落嘅遊戲，一個月上落十幾萬也不出奇，承擔唔到壓力就好難咁玩了。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。