移英日記（廿七）棍波車要重新適應

 車係買了，路稅、燕梳已買，但仍未可以運作，一則要了解車的性能，二則要重新適應棍波車，一把年幾，唔通仲「頭文字D」上身，練㬹指咩！只求代步就算。

本田思域雖然是可靠品牌及型號，但始終是舊車，許多隱疾仍未知道，好像手制拉拉下碎埋，膠紙黏好，跟住手制又放不了，鎖死了架車，幸好在停車場，如果係街上繁忙街角塞死，分分鐘上埋BBC，整衰漁村人就不好了。

至於棍波車，考牌已是咸豐年，對上一次接觸已是三年前，因為公司找我駕車，局住補了兩個鐘（實際得90分鐘），跟住架公司貨van豐田hiace也是自動波，故此俾架自動波豐田hiace、現代H1，英國我都唔怕，始終漁村貨van，高身好睇位，前有魚眼鏡看到車頭，後有鏡睇到車尾，仲有後波雷達、後泊鏡頭，十分安心。

現在用棍波車，雖然好過新手，但都要重新練過吊極力子。仲有私家車的車頭係看不到，不像舊Benz有個章，或者舊款萬事得MPV有條透明細膠柱，標明車頭位置，讓駕駛者有預算，全靠感應及經驗，咁玄？跟老詠春師傅或功夫師傅一樣，解唔到就咁耍就算，每架車都不一樣，要自己試，尾泊要看左右倒後鏡的尾線位置，頭泊要看A柱車窗，再參考周圍的車，沒有尾鏡、後泊鏡頭、後波雷達，唯有這樣。

（六速棍波，要入後波，一般要在波棍按制才入到，但本田思域支棍冇制，咁入後波及六波怎分呢？會不會後波變六波冇力死火？或五波入六波，錯入後波掃牙打柴？閱讀了說明書才放心，本田工程師真不簡單。）

當然去eBay買個後波雷達，補其不足，個心會定D，希望盡快安裝好，安心上路。

（影片中仁兄去裝，應該唔使拆泵把，套裝有鑽咀，凡人都可做到。）

移英日記（廿六）二手車成本大公開

 終於買到部本田思域「錢七」，英國人衛生水平極低，部車有泥、有草、有食物殘跡，肯定從來冇清洗，英國小朋友食野唔洗手，為了玩，將Pizza放在地上，沒有紙巾，轉頭再食，很多生迴蟲，打噴嚏唔用紙巾，有病唔戴口罩，病毒流感到處散播。

不過講句公道說話，佢地抵抗力比我們好，我地小朋友小小病睇醫生，食藥、食抗生素，食到純晒，佢地小病當冇事，照返學，發消自己買藥食，真係大病先好找GP，否則人地唔會受理，唔會見到醫生，最多叫你飲水、多休息、自己吃退消藥。

多年前，我去了東南亞某軍政府控制國家，當地食店將食物拿出來，一直有「飛飛野」跟住，一路食一路用手趕，領隊病了大部分時間，要由副領隊頂上。大家都係漁村人，點解我地冇事？全因為細個食街邊小販，好彩就冇事，唔好彩就肚痛，抵抗力係細細個練番黎，如果全團人都病晒，邊個去第三世界做神的工作？現在的英國公民衛生水平，咪幾十年前的漁村，太衛生係咪好呢？出外食飯，唔方便洗手，用酒精消毒液係咪太誇張呢？真值得反思。

架「錢七」經過自己及「歪芺」深層清潔如下：

經過清潔，終於成為一架可用的車。

全車成本如下：

二手本田思域「錢七」1700鎊

路稅 165鎊

第三保加壞車輔助及法律責任 493.64鎊

Transcend 車cam 1680港元

電話吸盤架 8.99鎊

Halfords兒童car seat 29鎊

Halfords冬天汽車套裝 13鎊

以1英鎊兌9.3港元計，合共24089.559港元，兩萬五唔使，可以吧！

（冇car seat載兒童係犯法的，買個最平便算。）

（冬天將至，除雪系列不可少。）

（千幾鎊，當然有不完美，除了車頭日間燈有一個燒了，司機位膠邊用了膠紙黐住便算。）

（手制拉兩拉，解埋體，我的詠春功力唔係咁勁啊，我自己都唔知！明日買支萬能膠黐番。）

移英日記（廿五）英國要靠自己

 經過幾番努力，弟兄幫忙睇車，終於買到車了。

如我以前買車老土心經，買豐田，不是買Corolla，就是買Camry。買本田，不是買思域，就是買雅閣，純粹在乎幾大cc決定。這些都是經得起考驗的車款，無論設計、安全都深受消費者的歡迎，買車係求實際，唔係貪得意，要有個性、展現真我，等你發達再去追尋。

這部本田思域「錢七」，齋到盡，百無，漁村最基本車機都冇，自然甚麼導航、後泊鏡頭都欠奉，後波雷達都冇，以往依靠了科技，加上陌生地，冇晒安全感，不過架車1700鎊，一萬六千餘港幣，仲想點，以前駕公司部豐田Hiace，已經係自動波，但英國車大部分棍波，彷如回到廿年前光景。

為求安全，「錢七」都要改裝，正確係加裝設備，除了漁村買來的車cam，也在某弟兄建議下加裝後波雷達，俾人裝要百幾鎊，eBay買自己攪掂便算，好彩帶了部Marita牧田牌電批。

黎到英國，唔好旨意有人幫你，即使你肯俾錢，也是一肚氣，很難有合資格、熟練的人去做，埋牙都係估估下，做唔到，人工也要照俾。而且又要預約，到了指定日子，又話改期，沒有承諾，家中的寬頻，又話十一月裝，跟住又話十二月，如果再推就另一年了，效率低、工作散慢、夠鐘收工、冇責任感，放工唔會理工作的事，如果要投資做生意，有班底或請番未歸化的漁村人，尚且可以，否則肯定蝕到入肉。

有一次家中冇熱水，你知英國冬季冇熱水死硬，除了沖涼，暖氣也是靠boiler，第一時間上網找解決辦法，知道水壓不足，無法點火，溫度下跌，要調節水壓至1至2.5bar，高過2.5有危險，低0.5bar無法運作，自己找機下的水制，自己調，最終回復正常水壓，成功運作。暖氣唔暖，可能radiator有氣，關機用一字批、毛巾放氣即可，小心熱水噴出，讓熱水完全在radiator循環，間屋便暖。

移英日記（廿四）購物好去處

 天氣急冷，漁村帶來的衣物已頂唔順，急急去買御寒冬裝。始終這是生活在這裡的基本裝備，食野你可以慳，御寒裝備無得慳。

（沒有御寒冬裝的天朝士兵，慘被凍死凍傷。）

想簡單一點，去有服裝部的馬沙（M & S) 會齊料，記得先下載其app，我幫小兒買衫，用app中的限時節扣，平了10%。想買好野，去Tk Max，時有好野，但合款未必有size，有就有，冇就冇，有一件加拿大某品牌御寒冬裝，超保暖，但折合港幣二千餘元，唔係我這個level的人著，最終買了北歐某品牌，89.99鎊，九百港元唔洗，夠用便算，防風、擋雨、御寒，一家三口，三件用了289.97鎊，一睇就知邊個買了件貴的。

英國甚麼都貴，除了這間One Beyond，許多雜貨用品，都係一鎊幾鎊，比超巿、百貨便宜，好像我想買2023月曆，文儀用品店要賣十幾鎊，折合百幾港紙，怎買呢？這裡只需一鎊，雖然品質差很遠，但夠寫野就足夠。另外想要部大字計數機，方便計算日常開支，盛惠兩鎊。「歪芺」（wife）說有時幾滴雨，都想有把遮（umbrella) ，但因英國大風，遮不常有，見到也要十幾廿鎊，最大問題，一遇大風就打柴，怎買呢？這裡1.5鎊至3鎊，我買1.5鎊那款，壞了也不怕。我仲買了吉列銻鬚gel，1.75鎊，怎會咁平？

至於各式維修用品，去B & Q 就十分齊料，各式器具用料，全部都有，好過去新填地街，電鑽品牌都有十幾款，好多都唔識，才發現自己不過是井底之蛙，價錢比漁村貴，但款式多到無法下手，最好當然找自己熟悉品牌為佳，避免中伏。

移英日記（廿三）詠春拳的反思

 去到英國，空間多了，時間多了，天氣又凍，練拳也多了，因要郁動保暖，否則很易病，也多了對拳術的反思。

（天氣開始變凍，地面結冰，真係唔係講笑。）

（草地結冰，有人仍然放狗。）

我自少對武學十分有興趣，只是家境清寒，沒有機會去學習，只是胡亂模仿，到真正學習武術已是出來工作，二十出頭的時候，跆拳道、空手道都有玩過，只是心裡卻想學習詠春，因為有種技術叫「黐手」，好像動物的觸鬚，能感應對方攻擊，自行作出攻防，在格鬥上贏面極大，就好像巴柔將對手撻在地上的贏面一樣，十分吸引。

未拜師前，我已透過睇書，VHS錄影帶，對詠春已有一定認識，小念頭已可自然打出，以為師傅會欣賞，點知卻觸發詠春禁忌，更加唔教你野，覺得你學過其他派系有雜質，要較番正好難，寧願教一張白紙，當我察覺到這禁忌，已隱瞞自己對詠春的一切，但跟的師傅越多，基礎部分越熟練，師傅發現咁快跟得上，知道你唔係白紙就不肯再教，或是比白紙用更多時間，當我學標指時，跟我一同學標指的師弟，我已比他多兩年年資，換言之用多兩年學費及兩年時間，後來返了地盤工作，太過辛勞，越返越少，沒有再返武館，直到今日。

我以為自己放棄詠春，其實我從來沒有放低，仲幻想某一天重返武館打敗眾人，爭番一口氣。其實都不過天真無知的想法，你隨意找業餘拳手都可打敗大部分國術，職業拳手更不用說。天朝各門各派的大師如何出晒洋相，已經不必多講，有部分停留在興趣班水平，大部分功夫都係呃人。

人貴自知，最重要知道自己甚麼貨色？甚麼位置？功夫不過是民間的自保藝術，真正古代打扙，是講求數量、訓練、協調、統率、士氣、兵法等，個人徒手搏擊，任你技術多高超，面對刀槍兵器，也是站立不住，美國每日發生槍擊案，即使多了人識功夫，都不可能改變，警察都係用相對的槍械跟槍手駁火。

黎到英國，其實只要自信地站立，其實身高差別不算很大，盡其量有部分高你半個頭，或極少部分高你一個頭，功夫優勢仍然存在，不過人在異鄉，若對方有幾個人或一對一有兵器，功夫的優勢已不存在，正所謂：「雙拳難敵四手」，人在異鄉，動不動郁手郁腳，肉體受傷事少，影響國藉事大，不宜節外生枝，倒不如沉淪像太極一樣，作為強身健體算吧！

移英日記（廿二）勝敗全在乎神

 要移民，一定要融入當地，即或不能，也不要做突出來的釘。要盡一切方法去達成目標。

這裡有三種教會，第一種是本地蘇格蘭教會，某弟兄去完講番完全聽唔明。第二種是半唐藩教會，有中文即時翻譯。第三種是華人教會。

我去了半唐藩教會，英國牧師，中文即場翻譯，敬拜也用英語、天朝語、漁村語，感覺也很好，好像民族大融合。由於政局變遷，漁村人移英急升，教會也變得興旺，華人佔了八成。

不過這不過表面氣氛，一眾曾經是基督徒主導的國家，早早也世俗化，表面信徒佔主流，但返教會卻很少，試問有幾人依靠神？印度首相只會為其所信的神負責，你想國家走向怎樣？

聖經撒母耳記上17:47

「又使這眾人知道，耶和華使人得勝不是用刀用槍，因為爭戰的勝敗全在乎耶和華。衪必將你們交在我們手裡。」

（要知道一切的勝敗全在乎神自己，人的爭競有何意義？）

（漁村的國歌都會播錯，即使播正確，字幕卻是Glory To Hong Kong，究竟是有心人的陰謀？還是錯有錯著？但可以肯定，外國人覺得這首歌才代表這地方。）

移英日記（廿一）苛政猛於虎

 *2022秋季財政報告 (Autumn Statement)*

大不列顛財務大臣Jeremy Hunt今天公佈了秋季財政報告。正如輿論預期，政府在稅項上作出了不同的改變。而以下幾項特別值得大家關注:

資產增值稅 (CGT)

政府宣佈將會由下年4月6日更改資產增值稅的免稅額由現在的£12,300 減至£6,000及再在2024年起淢至£3,000。擁有海外資產的人士在移民前更需留意其影響，考慮是否有需要在移民前處理這些資產或作出適當安排，確保其資產可獲稅務豁免。

入息稅 (Income Tax)

財政大臣在聲明中宣佈凍結入息稅的免稅額及其他稅階直至 2027/28 年。這意味著基本收入人士 (basic income taxpayer) 需向稅局額外繳交 £2,600稅款( 高收入人士(40% taxpayer) 則額外繳交 £6,570 )。背後原因是因為一般收入水平將會隨通脹有所遞增，將入息稅稅階凍結會使更多納稅人入較高的稅網。

隨此之外，45%的稅階亦由現時的£150,000減至£125,140。股息稅的免稅額由現在的£2,000減至£1,000及再在2024年起淢至£500。

Council Tax

政策亦容許市政府 (local council)無需再經居民投票許可的情況下將Council Tax 由現時的2.99%增加至 5%，以減輕因通脹飆升而對地方開支產生的壓力。預計此措施可能導致一般住戶需要繳交£2,000 以上的Council Tax。

加強執法

HMRC 將會獲得額外的開支預算，以提供更多資源來解決稅收缺口 (tax gap)。 正如之前的財政預算案，HMRC將會加強誇境執法，打擊在外地有資產或收入的人士避稅或漏稅的機會。

英國稅制本已繁複，而政府在短至數月內對稅務政策的重大改變更可能導致大家無所適從。因此，對政府在稅務上的方向需要特別注意，這可讓大家在資產及稅務安排上作出適當調整。

另外：

1. 2023年4月最低工資加到10.42鎊/一小時。

2. Household比多d錢能源帳單 - 由2500 升到3000鎊。

3. state pension / benefits / tax credits 會加10.1%比你 ，同通漲上升幅度一樣

4. 搵最多既人，即係50000鎊以上個category: 開始比稅個位由150000開始降到125140，即係要比多左稅。

5. 2025年4月開始電動車唔再豁免vehicle excise duty

（辛偉誠執政後，英鎊回穩，1英鎊兌9.3港元，背後是不住加稅去cover債務，未來經濟一定衰退，十分難涯。）

移英日記（二十）TV Licensing問題

 最近雖然有某弟兄幫助，不住睇二手車，一概無功而還。車都未在路面測試過，一開引擎蓋，已知唔掂，銹蹟班班、漏油、皮帶陳舊…下年MOT過唔過到也成問題。

雖然股海見紅，都未至於買「錢七」（陳舊汽車），然而這是電車、油車交換期，電車未見平，油車又不值投資太多，錢七似乎是唯一選擇。

（按正常章法，高耗油車不是好選擇，但正是多人放高耗油車，或會有好野。恐怖分子專用嗰架豐田皮卡Hilux，我也喜歡，不過英國路窄，車旁經常有車停泊，變了單程路，大車唔適合。）

英國跟日本相似，睇電視不是免費，故不住找人或寄信恐嚇你，迫你就範俾錢。

按正常人做法，你得到服務，才要俾錢。英國佬不跟你玩這一套，唔理你有冇駁到天綫，只要你有上網，或有手機上網，或睇到YouTube，或種種途徑有機會睇到BBC等節目，都要俾錢，盲的都要俾一半，因為你可以聽到。

要合法又唔洗俾錢，一係你係五感盡失的活死人、植物人，不過實際只要又盲又聾就可以，因為現有科技不可能透過觸感，或心靈感應接收BBC資訊，如果得，馬斯克賣特斯拉，股價就唔洗跌到谷底。一係你做拉登，唔係做D衰野，而係唔用科技、唔用手機，即使美帝高科技監控全球，也極困難。深山野人，英國政府是收唔到你錢的。

如果要做正常人，又唔想俾錢，一定要定力夠，一方面堅持不接受BBC資訊，一方面要頂得住恐嚇信，污糟野政府不會出手，有代理去做，英國不像天朝，惡毒手段有限，而且地方大，人工貴，最多寄信，用一些合法恐嚇字眼，「忽略這封信會使你代價大過licence費」。想停止這些信件，除非讓有關人員上門visit，檢查全屋沒有接收BBC訊息的痕跡及可能。

不過想深一點，我們來到這國家，不是要認識及融入這地方文化？點解為了小小licence費，迫自己堅持不接收英國資訊呢？再者，BNO5+1未取得國籍，不宜節外生枝，雖然堅持冇睇BBC，要打官司都唔會輸，但係咪要咁做呢？我投資的原則，如果唔俾licence比付款成本更貴，那麼不如俾錢了事，息事寧人，既俾了錢，倒不如迫自己睇多點BBC，認識英國更多資訊文化，不是更好。

移英日記（十九）大罷工也要支持

 英國面臨比歐洲更嚴重通脹，經濟衰退，人人自危，正在此時，各行各業相繼罷工，繼火車司機，跟著是公務員、護士，真是「屋漏兼逢連夜雨」。

國家面臨危機，人們沒有共赴難關，大家同舟共濟，反而好像落井下石。當然我們要明白英國係有罷工的權利，不像漁村表面有，實際冇。再者，通脹十幾個百分比，生活也成問題，當工作得到的收入，也應付不了開支，冬天暖氣也不敢開，吃也吃不飽，唔通去偷去搶，唯有用合情、合法、合理的方法表達訴求，這樣做，所有英國人都理解，我們這些少數族裔都可以理解。

我睇過GP，知道NHS服務係點，醫護薪金沒有漁村咁高，最頂級大國手，人工得幾皮（港幣），仲要自費不住進修，增進醫學知識，所以只有一心一意，才會做，我睇完醫生，佢地仲攞了樣本化驗，找出最準確的結果，還主動致電給我覆診，你對我咁，我仲可以有甚麼異議呢？

印度藉首相辛偉誠，始乎要有知慧處理了。

移英日記（十八）移民唔好玩泥沙

 「有人回鄉歸故里，有人漏夜趕科場」，有人移英，有人回港。如果漁村好，就唔洗走，既然已走，點解要翻轉頭，因為落唔到根，點解落唔到根？因為落根要花很多功夫，許多人心態、實際也沒準備好，根本不適移民。

以換英國車牌為例，一定要預早安排，要預早在漁村申請駕駛執照細節証明，列印share code，或帶埋printer隨時補印文件等等。

你認知所有的事，都要準備好，去到就做，仲要有充足緩衝去應付突發及認知以外的事，好像我沒有準備去病，但隨身藥物極少，中藥更不能入境，只有入境才買基本防身藥，更買了維他命，我沒有其他喜好，也要練下詠春，保持身體健康，我本來只吃兩餐，不住減磅，有機會練成完全體，但蘇格蘭係苦寒之地，也要食足三餐，已經破戒、破功，但保暖太重要，冇辦法。倘若我只吃兩餐，唔止168斷食，係204斷食，過午不吃，身體自動變節能模式，體溫偏寒，香港咁熱，冷氣都唔洗開，又省錢、省電、環保、養生。一落地，樣樣申請，唔會好似某些YouTuber去邊到玩、去那裡食，講真如果唔係登記了GP，怎睇醫生呢？

去得英國，簽証要求已要至少半年的生活成本，半年甚麼事也辦妥吧！即或不能，節衣縮食，涯一年又有何難，如果住HMO劏房，水、電、煤、council tax全包，焗Pizza，Iceland只需1鎊，Tesco買75便士飯，一大條粗麥方包39便士，唔做野都涯到兩、三年，倘若跟YouTuber去這裡玩、去那裡食，未有賺錢能力便亂洗錢，抱住旅遊心態，多多錢也不夠。

如果係走難，要著草，可以理解，但請問有幾多個？如果唔係走難，點解唔作出充分準備及部署？有的人移民好似玩泥沙，未夠半年，又話搵唔到工返港，有的人，間廠已經請你，叫佢參觀間廠，佢竟然唔去，覺得浪費時間，原來這是入職的一部分，我當你英文唔好，唔知係入職，你做下門面功夫讓人覺得你對這行業有興趣，都唔做，根本唔係出黎撈，整衰晒漁村人。

（周圍都請人，問題你究竟想唔想做？英國農業冇足夠工人收割，損失慘重，佢會唔會介意你英文唔得？）

移英日記（十七）登記GP睇醫生

 今日book了睇GP，General Practitioner，即係Doctor，香港叫Medical officer，BNO港人定居後，要先在最近的診所登記，有了名後，才可以電話預約睇醫生，可以要求翻譯，因為醫學名詞及及對病的形容，唔係咁容易，你的表達唔清楚及誤差，直接影響斷症。

這次睇醫生，實是：文盲級英語衝擊英國醫療體系，個醫生問我洗唔洗翻譯，但佢用電話攪了很久，都未有，最後只有Mandarin天朝話，沒有Cantonese漁村話，我說唔緊要，用簡單英文表達，最後醫生也取了樣本化驗，佢也print了個病的資料給我看，最後印了藥單，自己去藥房配藥了事。

攞了藥單，去社區藥房攞藥，唔洗收錢，跟英格蘭藥物要另外收錢不同。

香港人不要妄自菲薄，自己睇輕自己，確實即使在香港英文叻的人，去到英國只不過比我們這些文盲好一點，因為香港沒有英語環境迫你去講去聽，英文叻的人，讀寫係冇問題，聽係差一大捷，只有某弟兄去過美帝讀書，浸過喊水，蘇格蘭聽到八成以上，所以根本不必介意。

小朋友更不必擔心，小兒去了某Nusery，已經聽到個小朋友叫佢唔好跟住佢，邊個人同佢翻譯？邊個教佢？咪係英語環境下自然學習，玩的時候學習，有小朋友的，唔好再係漁村做虎媽虎爸，真係對兒女好，快快去英國吧！

（英國或西方教育與天朝、漁村教育不同，歷朝科舉制度影響下，覺得「萬般皆下品，惟有讀書高」，更覺得「玩物喪志」，你看看人地的理念，玩係最重要，原來大腦的發展，要透過四肢的發展才能得到充分刺激，老人家如果肯經常周圍行，腦退化問題也大減，因為活動對系統要求極高，你明白這一點，你就知點解馬斯克的自動駕駛點解咁難。如果太早背野、認字，一定練壞腦。）

移英日記（十六）移民買車好困難

 換了英國車牌，興奮了一段時間，以為很快會買車，實際卻按兵不動、猶豫不決。

作為投資人，用錢的法則，一定係先賺錢、後消費。現時聯儲局多番加息，股票一片紅海，實無意欲買車。

再者，買車應是開心的事，如果冇快感，買了也是浪費金錢，要忌住忌住，平買易中伏、貴買又唔服，咁不如唔好買。

2030年英國禁售新燃油車，現時買燃油車卻是雞肋，但電車續航未到位，價錢又偏貴，卻使人卻步。

「獅鬆」（C zone) 針對碳排放車收費，範圍涵蓋會越來越廣，太舊又唔得，半新車又貴，加上物流問題，新車缺晶片，供應減緩，二手車需求增大，價錢上升。

現時情況，就好似鉅鹿之戰，面對章邯節節勝利的秦軍，宋義按兵不動，又唔進，又唔退，禍不遠了⋯⋯

(二手燃油車是現時不二選擇，高耗油車，由於牌費貴、用油多，很多人甩手。）

（萬事得耗油少，但比Benz平不了幾多。年幾大、機器壞，人係咁，車也是一樣。）

（英國國民汽車，Vauxhall，聽都未聽過，銷量第一，引擎可靠，操控容易，價錢實惠。我的評價只有四字：「實而不華」，你明我點解，這類車也要考慮。）

移英日記（十五）英國讀書無得頂

 今日天氣漸冷，又橫風橫雨，牛仔褲全濕，也參加了某小學開放日，只為兒子爭取一個機會。

學校的重點係玩，你冇聽錯，係玩，怪不得海報的小孩也嚇了一跳（說笑）。

我們兒童學英文時，係A for apple，漁村已經走火入魔，A for astronaut，功課越多越好，越深越好，初中學高中野，高中學大學野。

他們的想法，是贏在起跑線，只要早起步，就必定比人快到終點。如果人好似機械人一樣，或許仲可以，但事實上人絕不是機械人，人有許多潛質及恩賜，需要時間慢慢發掘出來，只要能夠發掘到這些恩賜，即使佢樣樣唔得，讀書唔得，也勝過萬人。再者，方向一錯，去了錯的目標及終點，更毁了一生。

聖經有一個人叫參孫，其父母本不育，但神賜給他們一個兒子，要作拿細耳人，要拯救以色列人，他天生神力，不必學甚麼功夫或操練，已可力格猛獸，一次殺千人，無人能敵。只可惜父母忘記神的吩咐，又或者只有獨一兒子，太放縱他，拿細耳人應該酒色不沾，參孫卻觸犯這些禁戒，最後敵人用女色套了佢力大的秘密，破咗佢功，整盲佢雙眼，使他變廢人，最後他後悔，與敵人同歸於盡⋯⋯

（英國要睇Viu TV，要用VPN翻牆，或機仔盒才能。）

最近Viu TV那套「野人老師」，也表達類似的訊息，不過這決不是漁村的主流思想，迫小朋友讀書仍是這地方的主流。盼望好的劇集可讓更多人反思。

英國不是很好，只是有些地方更差

 卓慧思當政期間，經濟幾乎崩潰，1英鎊兌8.1港幣，巿場失去信心，但辛偉誠掌權後，英鎊企穩1英鎊兌9港元左右，巿場暫時穩定。

（若透過減稅刺激經濟，為何窮人只減1%，富人減5%？咁樣做得太難睇，幫有錢佬幫到出晒面，難以獲得民眾支持，對通脹也沒幫助。）

有關英國的投資，未賺過錢，有些人以為投資英國物業賺了錢，升了幾多幾多，睇清楚英鎊跌了幾多才講，物業升20%，滙價跌20%，都係打個和，我投資某英國物業發展商，股價不住咁跌，背後代表甚麼？以前香港樓巿升，新鴻基都會升，今日樓巿跌，新鴻基都跌，兩者係有必然關係，英國樓巿是否值得投資？自己想下吧！

卓慧思係讀經濟，都唔識處理現時的困局，何況我們這些凡人？以往環球投資就可以平衡風險，現在全球一體化，沒有人可獨善其身。以往股票升債券跌，股票跌債劵升，兩者互相平衡，現在買甚麼都跌，咁可以做甚麼呢？

人有三衰六旺，月有陰晴圓缺，股巿也有周期性，做人只要不去到咁盡，不借盡孖展槓杆，有充足緩衝及防守空間，即使有甚麼問題，也能有能力應對及處理。

沒有人可預計未來，只是對很多BNO港人而言，他們已選擇了英國，但對我而言，根本沒關係，投資跟生活不一定要完全一樣，只是兌了英鎊，怎能不投資呢？既是這裡生活，豈會不考慮買房自住呢？總不希望英國沒落，盗賊為禍，雞犬不寧。

只要有光的地方，草地才顯得翠綠。曾幾何時，東方之珠的光芒誰人不識？當人們寧願選擇一個暗淡無光、寒風刺骨的地方，那原先的地方要有多黑暗呢！