投資怎樣成功，我簡單做了以下方程式：
絕對理性（滅絕人性）+ 絕對資訊 = 投資成功
資訊牽涉權限，你係甚麼level，就得到甚麼資訊，「Sing哥」點解做甚麼投資都快人一步，很早期已沽售某國資產…因為資訊，你哋今日睇我這個咁cheap的網誌，因為大家都是同一個level : layman喱民，如果某一天我升了level ，我也不會在這裡出現。（這機率極細）
要成為馬會會員都咁難，要成為XX會，甚至甚麼level會員就更難了，不單有錢、有權、有影響力，就算你肯出賣自己靈魂，甘願死後落地獄，永遠受苦，也未必得到一個席位…所以要得到絕對資訊的可能性係零。
只不過有些人不住跟有錢佬交往，當中不乏這些會員，或許醉酒唔小心走漏風聲，唔小心講了少少，由於內幕交易係犯法，佢哋都會很小心，但聰明的人或會明白其中玄機或暗示，所以上巿公司高層、投行交易員、基金佬都有唔少油水。當資訊去到最下個層，我地這些喱民都知道，等於全世界也知道，股價已完全反映，無利可圖。
既然資訊係全輸，就只有「絕對理性」這方面，做得更絕，更冇人性，才有少少機會，接到唔小心漏到最下層的幾滴油水。不過做到咁理性，我話埋俾你聽這套「神功」怎練，你也未必想要。
我講講我的故事：我的雙親早已離世，理性上知道生老病死是人生必經，對比疾病的痛苦，死亡甚至是一種解脫，反而是更好的選擇，靈堂上哭哭啼啼都不會改變事實，倒不如早早完成程序，唔好阻住人哋收工。我告訴「歪芺」，我死後屍體棄置在荒山野嶺即可，如果不能，用最便宜那款方式即可，屍體唔洗認領，唔洗上位，亂葬崗也可以，無謂浪費金錢在死人身上。係咪好冷，係，甚至是寒，好似我身處的蘇格蘭咁寒。
我曾經以為我這種「絕對理性」、「滅絕人性」而自豪，以為人可以理性客觀看待事情，做事一定最好，但後來我發現我經常失憶，起初以為是早發性痴呆，原來沒有情感的經歷，就好像沒有調味的飯餸，只會功能性讓你飽、俾你營養，但你永遠忘記曾經吃過甚麼，因為一切都淡而無味，沒有分別。
以前某創會牧師死了，甚至某些弟兄死了，由於我冇去靈堂（那時認為去也沒意義），今日我感覺他們還沒有死，只是理性提醒我他們已經死了。咁係咪好事？我仍然靠失憶忘掉人生一切痛苦，甚至人生許多重要的事也白白經歷，一一遺忘。
絕對理性是謝絕感性，所以係滅絕人性，唔理嗰隻股票持有幾耐，都不會有感情，知道勢色唔對，都會全部沽售。唔理你對這個地方有冇感情，這個地方預期唔掂，全沽股票、資產，現金大部分兌換美元，人都走埋！
（某股評人在滙豐跌到33元，即場哭了起來，佢做唔到絕對理性，最多靠講股呃兩餐飯食。）
正所謂：「各人前因莫羡人」，你睇人好，人睇你好，人人都隱惡揚善，講自己點好點好，移英港人，夜夜笙歌，並不能反映真實生活。我老實一點，我喺英國都係飲膠囊咖啡（冇去Costa飲咖啡），夜晚去厠所用電筒不開燈省電，開少D䁔氣，用暖水袋，爆了軚，用個舊軚補上，45便士一條方包，85便士叮叮飯…cheap到你唔信，只有省錢才聚到財，你願意過這些生活，就跟我富起來吧！我繼續教會奉獻，俾錢乞丐，真正的富有係你俾到幾多，唔係用到幾多。
(出街飲咖啡係儲唔到錢，一定窮到最後。）
（愛瑪屈臣講得對，著冇牌子衫及平衫不代表你窮。）
免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。
