2022年12月31日 星期六

移英日記(卅三)適應與否全在乎自己

 睇日本漫畫「火影忍者」,講到鳴人與佐助的羈絆,以字面解是約束、束縛,顯然是錯誤,正確意思是彼此間深厚的關係及情誼。

同樣道理,蘇格蘭人講:pop in,以字面解pop是指流行音樂或物體爆破的聲音,in是指入去,加埋都唔知點解。正確意思是非正式探訪,跟某NHS護士到我家探訪的visit不同,Pop in some time if you’re ever around! 聽到這話,不論是客套也好,真係當你朋友也好,也是有善的表現。

每個地方文化也不同、語言也不同,只有融入當地文化才能理解其中意思。我有一個弟兄,聽覺沒問題,但對於音調歪少少就聽不到,去到英國,要人人好像BBC英語咁字正腔圓,根本不可能,漁村聽一些講唔正Cantonese的天朝人也聽不懂,何況蘇格蘭英語?我都唔好得幾多,孩童時耳朵塞了,到了小學上堂被老師要求驗耳,醫生才將塞物除去,但大腦分辨語音能力受到影響,聲音係冇問題,但變為意思卻困難,因此經常聽唔到英國人講甚麼,自己文化水平低,好像文盲一樣。

我們這麼困難,也在這個陌生國度爭扎求存,或甚有的完全唔識英文,也來到這裡。唔識,就上網查字典找答案,再好一點問人,只要你真的決定要去英國,你就會盡一切力量解決問題,登記GP睇醫生,登記NI找工作,登記nusery入學…等等。

(Nusery裡英國人、印度人、非洲人都有,根本就是一所國際學校,駕車送子女上學,漁村想也沒想過。)

(當然,一樣米養百樣人,我見到唔識英語也找到工作,一把年幾也靠自己勞力養活自己,也有一些人有氣有力,卻流落街頭,埋怨政府。)

(我晚晚有飯食,乞食留番俾只懂埋怨的人吧!英國,博士都係整餅、校長都係執房,我地這些文盲凡人,不是應該更積極努力嗎?)

2022年12月27日 星期二

英國要免稅投資,可開IB的ISA

 大家都知英國稅率高,又全球抽稅,即使漁村開了IB,仍不是真正安全,保障跟國際版差天共地。

英國政府為了鼓勵國民儲蓄,推出了ISA(Individual Saving Account),放在ISA的錢,賺了錢、收了息都唔洗抽稅,有四款戶口:

Cash ISA,現金個人儲蓄戶口,較銀行高息,可存現金或債劵。

Stocks and share ISA,股票個人儲蓄戶口,可買賣股票,啱晒河車,你明㗎喇!

Innovative finance ISA,創新金融個人儲蓄戶口,私人借貸收取利息或眾籌投資。

Lifetime ISA,終生個人儲蓄戶口,40歲或以下,每年只可存4000鎊,英國政府每年會送25%或最高1000鎊俾你,最多供至50歲。

四個ISA,Lifetime ISA表面最著數,當你20歲開戶至50歲,假設每年存4000鎊,每年政府最多都係俾1000鎊,第一年好正,有25厘,第二年12.5厘,本金越來越多,但俾的錢一樣,利率只會越來越低,係咪著數?自己想想,再者你存的錢及政府俾的錢,最長放了30年,英國一年通脹都十幾%,25厘兩年都被通脹消化晒,何況幾十年,自己想想。

Cash ISA表面最穩健,但別忘記,卓慧思當首相,英鎊跌到8.2,滙率、債劵仍有機會跌的。

至於Innovative finance ISA,就限止了投資類別,點解唔讓自己放眼世界,故此我仍會首選Stocks and share ISA。

英國要開股票ISA,我當然會選我的投資老拍檔IB,並非賣廣告,如果有更好選擇,請告訴我,我會毫不猶豫轉陣。

英國IB開ISA優點:

一、線上開,快、批、易。(IB冇人服侍你)

二、沒有最低存款。(每月扣3鎊,不能冇錢)

三、長期投資不收託管費。

四、低佣金,倫敦交易所買賣股票3鎊。美股每股0.005美元。大公司一概1美元。

五、閒置現金有利息收。(美元有三厘幾)

六、無敵兌換外幣滙價,手續費2美元。

七、投資保障,若執粒賠最多50萬美元。(香港IB沒有)

英國IB開ISA缺點:

一、每月最低手續費3鎊,即使完全沒有買賣,都要收。其實在倫敦交易所買賣一次股票已經要手續費3鎊,並不困難,但對那些唔理戶口的人,一年白白俾36鎊,不化算。

二、股票、債券、外滙等投資,需要花心力研究,用心去管理。

三、資產價格及其收益,可升亦可跌,嚴重甚至可以損失所有。

ISA存款每個稅務年度(每年4月6日至下年4月5日)可存2萬鎊,不必報稅,賺錢不必交稅,假設你今年入了2萬鎊,賺了5千鎊,你提走2萬5千,則今年便不能再入錢投資,所以提款要小心,要入夠20萬鎊便要用10年。

若有18歲以下兒女,可幫他們開JISA,每稅務年度可存9千鎊,住英格蘭、威爾士、北愛爾蘭的人士,可幫子女儲定大學學費,蘇格蘭大部分免費,幫他們儲定買樓首期、電動車,也是一種美事。

(投資有風險,資產價格及其收益可升亦可跌,甚至可損失所有投資,敬希留意。)


2022年12月25日 星期日

英國完全買車手冊

 在英國,車是必需品,冇車,等於冇了對腳,即使我的居所可步行十分鐘左右去超巿及接送返學、放學,我仍然覺得駕車有好處,愛丁堡冬天,又冷又凍又大風又落雨,孩子凍親都不化算。

有錢,有地屋可裝充電樁,買新電車。有錢,住Flat,買新電油車,除非你打算駕車送貨,可買柴油貨Van。

冇錢,或者被股巿捆綁,買二手電油車,首選「D拿」的Approved Used Car 網址,任君選擇,價錢較貴,但做得Approved Used Car,都經原廠保養、原廠機油、原廠零件,再經過原廠嚴格檢查,質素有保証,通常都有一年保養及一年roadside assistant,壞車有人打救。

BMW: https://usedcars.bmw.co.uk/

Mercedes-Benz: https://www.mercedes-benzretailgroup.co.uk/mercedes-benz-cars/used-cars/

Toyota: https://www.toyota.co.uk/used-cars

Ford: https://www.ford.co.uk/shop/price-and-locate/approved-used/approved-used-cars

Volks Wagen https://www.volkswagen.co.uk/used-cars

KIA: https://www.kia.com/uk/used-cars/about-approved-used-cars/

Mazda: https://www.mazda.co.uk/used-cars/

Nissan: https://usedcars.nissan.co.uk/en/home

Hyundai: http://used.hyundai.co.uk/home

Audi: https://www.audi.co.uk/approved-used-audi.html

Suzuki: https://ucl.suzuki.co.uk/cars/used

Lexus: https://www.lexus.co.uk/pre-owned/

Honda: https://usedcars.honda.co.uk/en/home

再cheap一點可選大型二手車行,佢地都係流水作業,收車,然後執好架車,再放巿場出售,佢地都專業,但不可能好像原廠過百項工序咁嚴謹,亦不會全部用原廠零件,故不能像Approved Used Car可保養一年,有壞包整,但都會保養三個月。

最cheap是私人放盤,價錢最平,俾了錢,就過咗海就神仙,一切問題都唔關佢事,中伏機會大。若非有熟悉汽車的弟兄幫助,我決不能買這類車,即使不能像漁村交俾車房上架檢查,也要用電筒照車底,打開引擎蓋,驗屍咁驗,睇下有冇生銹、漏油等,你都知有雪落的地方,政府都會用鹽去溶雪,令溶雪點去到負三度,故此如果駕車的人唔儆醒,好天沒有用高壓水槍洗車底,等於讓海水浸車,好易生銹,要過政府每年Mot,都要用不少維修費。

以下是某弟兄找過的私人放盤車,表面ok,睇過真車,全部唔得。















咁多架都唔得,你就明買二手私人放盤有幾困難,如果你只有自動波車駕駛執照,更是難上加難,放盤更少,質素更差,價錢更貴。


2022年12月24日 星期六

英國道路交通(二)

 漁村曾是大英帝國殖民地,這是無容爭議,漁村開埠比天朝、寶島更早,1842年南京條約簽約,1843年生效成立(天朝1949年才成立),第一任總督砵甸乍,最後一任被天朝稱為「千古罪人」彭定康,已是179年了,這個世界,那有子女比父母年幾更大?

因此,在交通、法制,許多都跟英國,都係右軚,交通標誌大致相同,但不代表唔需要再學。

以上交通標誌的意思,大致一樣。


因此,學校區,見到這標誌,一定明,紅圈是你一定唔可以做,圈中有電單車、私家車,有列出時間,即是上述時間電單車、私家車不准進入。

有些路,漁村一定不會這樣設計,因太心急,一定出事,但英國駕駛較禮讓,可以容許。


這條突然左右收窄,我實地考察,並非屋宛門口,沒有必要加闊行人路,你睇下行人也沒有好處,我估計是差不多進入學校區,迫你減速或停下。由於有一段路只容許一架車過,有這標誌,要讓對頭車先過。其實你已在地面寫明限速20英里,若要司機嚴格遵守,只要加測速相機即可,唔明英國人的思考方式。
車速限制,你一定明,唯一不同是英里,不是公里,不過英國出的車一定改晒,冇問題,唯有那個白圈斜黑,真係俾佢玩死。佢叫National speed limit,要視乎路段決定,冇街燈路30英里,同方向單線行車60英里,雙線或以上70英里,我真唔明,寫清楚幾多,就不必估估下,你都掛得標誌,唔差在寫埋車速,不是更好嗎?


(電影Interstellar(星際啟示錄)子女年幾大過父親,因為父親在太空執行任務,速度越快,時間越慢,結局是父親最後見一位老太婆,正是自己女兒,十分感人。漁村開埠,今日的天朝還未出現,馬克思都未寫好佢的理論,何來回歸?真係奇點!)

英國應否掛P牌?

 英國不像漁村有強制新牌掛P的規定,你考到牌,就一定係正式牌,可合法在道路駕駛,又或者持有漁村牌,不換英國牌也可駕一年,換了英國牌就更加冇問題。掛了P牌,只是讓人知道你是新牌,或是長期冇揸車,讓其他道路使用者多加留意、忍讓,多些包容,也無可厚非。

然而,我在漁村已是接近廿年牌齡,雖然係雪藏牌,但也曾幫公司兼職架豐田Hiace,三條過海隧道行晒,一般人唔會去的船廠、管制山路入海洋公園內部、港島有錢佬屋宛等。

只不過我的漁村棍波牌,除了考牌時駕過棍波車,加上知道要幫公司駕車補了兩個鐘(實際得一小時半),跟住公司架Hiace都係自動波,模擬器唔計,實際棍波經驗係有限公司。因此,剛到英國,某弟兄幫助下買了棍波車,又唔熟悉英國道路,又唔熟悉棍波車,掛P牌係冇問題,係冇違和感。

然而,最初冇買冇print個P牌,駕了成個月,村民都見我出出入入,去超巿,接送返學、放學,某弟兄堅持我要掛P,今日才掛,十分不自然,亦令我有點抗拒。

我承認貨van的棍波與私家車係兩回事,貨Van係行柴油,預咗要負載一噸貨,故扭力大,放極力子(離合器)也不易死火,但私家車難度大很多,開始時要俾油加大轉數,才不易死火。另外貨Van高身,睇位一流,十分有信心,私家車視線有限,車頭距離感及轉向也不同,要需要時間適應。

聖經說,是就說是,不是就說不是,說多就是出於邪惡者。既是正式牌,卻掛P,交保險卻俾跟牌齡相同,俾最低的保費,名不符實。

聖經說,凡不出於信心都是罪。既冇信心駕,無論你有冇掛P,都係有問題,掛P並不是護身附,也非意外能脫罪。

漁村大部分車都係自動波,巴士都係自動波,棍波車係陌生,貨Van棍波轉私家車棍波係需要時間適應,第一個月掛P係合情合理,但長期都掛,真係要考慮是否應該駕車了。

(有位弟兄因掛P長期在屋宛練泊位,反而因此有禍,有英國人說佢部車整花人地部車,幸好買車已影相,部二手「錢七」本來就全車花,加上環境因素解釋,才不致被人誤會或屈錢了。)

英國道路交通(一)

 許多人以為漁村以前是大不列顛殖民地,又係右軚,許多路牌、道路設計也差不多,因而掉以輕心。

漁村不過是彈丸之地,英國係一個國家,路牌及道路設計多很多,若不小心,輕則罰款,重則造成嚴重交通意外,性命難保,唔係同你講笑,許多去外國自駕遊的漁村人,自持駕駛技術了得,莫視每一地方的不同法規,因而客死他鄉。

漁村路邊只有單黃、雙黃線,英國有單紅、單黃、雙紅、雙黃。

雙紅線:任何時間,不准停車。
單紅線:部分時間,不准停車。
雙黃線:任何時間,可靠邊上落,司機要在車。
單黃線:部分時間,可靠邊上落,其他時間可停。

基本上超巿都有免費泊位,要停車上落都係接送子女上學,學校周邊道路管制都較嚴,一定要小心!
單白粗線:通常是分隔特別車輛,如巴士專線,通常有相機,一進入便會收到告票,雖然有的會指定時間,但不像漁村寫在路面,而是藍色細牌,未必睇得清楚,若不清楚,可免則免,尤其B路有雙行線,中間都有單白粗線,左線是巴士專線,我遠遠見到,就移至右線便算,不會見到藍色牌,時間不允才右移,因為當你去到咁緊,人人都去到才右移,減速都未必走到,局入巴士專線等罰款。


我自問眼力有限,這距離睇唔到藍牌限制時間,右移車線係最好選擇,跟前面銀色車冇衰,尤其很少車入左線,肯定有伏,唔好搏。(除非你眼力好)

首都倫敦,更有這些Congestion Charging,遲些其他城巿都有這些「獅鬆」,自己要計計數了!

(超巿雖然大都免費,但要小心條款,佢地亦有攝錄鏡頭及相機,電腦記晒所有入閘及出閘時間,這是私人停車場,有權向你收錢,如上圖超巿可罰你70鎊。)


2022年12月23日 星期五

英國駕車全自助

 以往在漁村,去油站入油,不必離座,停車熄匙,俾油咭俾服務員即可。去到英國,冇人會服待你,自己插咭,自己開油蓋,自己攞油槍,自己打滿油肛或入到自己認為容量或價錢。

除了入油自助,一般簡單維修,也是自己攪掂,靠的是原廠汽車手冊,或網上的示範,或熟悉汽車朋友幫忙等等,因為去得車房,一定過百鎊,不化算,而且一定不會立刻幫你整,又要預約,又不準時,工作傲慢,得啖氣。

二手「錢七」,一定係甩皮甩骨,駕到就算,如果少問題,整下也是好的,離合器的腳踏膠都冇,剎車的腳踏膠又甩皮。


換了腳踏膠,可以防滑,確保安全。


倒後鏡的指示燈。


好多零件,eBay都買到,有埋塊膠工具拆。

後波雷達,要後波燈攞電,要熟人幫手。


好彩漁村帶了Makia幫手。


零件都在ebay買的,有限錢。


燈泡在Tesco超巿都買到,2鎊。



有原廠汽車手冊,一定冇教錯你,但網上要小心買到正確零件,才能維修,而且二手「錢七」許多時汽車手冊及維修紀錄欠奉,唯有找熟悉汽車的弟兄幫手。

2022年12月22日 星期四

移英日記(卅二)依靠神冇野解決不了

 現在英國生活各事也攪得七七八八,本來應該部署買樓,不過股市跌到咁的環境,即使有好盤,也無能為力,現在可以做,係守,要守得越耐越好。

最近聽了某弟兄說英國工作,不是單為錢,也是融入英國生活文化的好方法,這個說法很觸動我心,隨著股巿唔惦,更多了誘因去重出江湖。

BNO講人要在英國工作,首要申請NI。


英國都是做最低工資9.5鎊的工作,博士生、大學生都係去工廠整餅,咁我這些文盲的草根又可做甚麼呢?一係駕車送貨(要自己出埋車、油、保險),一係做低技術勞工之類,每個月賺一萬餘港幣也是可以的。

做人係要能屈能伸,冇野話處理唔到,只要保持積極正面,好多問題都可以解決。

愛丁堡有五間華人教會,EH9、10、12都有,任均選擇,多返教會,每日讀經、祈禱,多依靠神的心,去到世界那裡都是一樣。

2022年12月18日 星期日

英國買日本車最安全?

 這個安全,不是指歐盟五星安全,而是你所駕的車,會否受賊人喜歡,成為偷竊對象。

數據就最清楚:

賊人最喜歡都是歐美車款,不竟英國處於歐洲,我不感到意外。其中,德國三大汽車:Benz、BMW、Audi全部入圍。

福特Fiesta是高銷量細車,多人買,賊人要散貨也容易,但更要留意有些品牌有兩架車入圍,Land Rover、BMW、福特。

當然報告或有盲點,多人買的車,巿面的數量多,自然被賊人偷竊的機率也按比例較大,並非保安系統有問題。而貴價車,賊人轉售賺取更多,自然也吸引賊人偷竊。

日本車太耐用,十幾萬公里仲行得走得,這些「錢七」,年期長、里數高、手數多,二手價不高,自然難吸引賊人了。

最近有賊人在愛丁堡專偷Hybrid車的Cat,首當其衝當然係豐田的Hybrid混能車,Cat全名係Catalytic converter,轉換器點解咁值錢?因為其中兩隻貴金屬:鈀、銠,銠的價值更是黃金的六倍,一些舊車轉換器的銠含量較高,比整架舊車更值錢。

有目擊人見過賊人偷車經過,好像一級方程式賽車的維修速度,十分專業、快速,比整車佬仲勁,數分鐘就拆下converter,豐田客戶都大怒,除了要俾錢維修,保險也急升,要急急加裝Cat lock,方保平安。

2022年12月15日 星期四

英國不要買柴油車

 按著我過往認知,除非你有自置地屋且安裝充電樁,否則首選柴油車,次選電油車。因為以往在漁村搭架,有時要幫手駕車,就是豐田Hiace,扭力好、省油、少維修,所謂麻煩,只不過加尿素,若尿素不足,會強制限制汽車效能,因此,我一直認為柴油車最好。


即使英國柴油價格比電油貴,但柴油效能比電油高差不多三成,油價卻沒有高三成,很明顯柴油車仍然有優勢。

直至某弟兄告之,才真相大白。始終不能用漁村的商用車去比較。

首先英國的私家車,很多都是柴油車,雖然脫歐,仍然某程度跟歐盟標準,要達至歐盟嚴格要求,絕對唔係入下尿素、冇黑煙就過關,因為他們最終極是用電車取代,故過渡期的柴油車,加裝了許多電子零件去監察,越多電子野,壞的機會也越多,維修費也昂貴。

另外,柴油車更要有DPF,碳微粒過濾器,必須高轉數去行才能燃燒去除,若在漁村,上東區走廊、西隧、西九龍快速公路,由港島去一次九龍都除晒。但我都講過愛丁堡巿區啲路,幾多麻煩野,日常使用,係無法除碳,B路都唔得,除非A路,漁村人用美帝話的Highway,高速公路,英國人稱之為Motorway,但問心,有幾可駕一轉去格拉斯哥、紐卡素?

我同大家計計條數,每升電油149.9便士,每升柴油172.9便士,貴15.3%,柴油效能多兩成幾,接近三成,油價已扣一半,每年換一次電子野,一積碳又要去Motorway飛一轉,時間、油錢都用咗,仲有甚麼著數呢?講句唔好聽,分分鐘心急除碳,俾大油唔小心超速,罰款都唔止嗰條數了。

2022年12月14日 星期三

移英日記(卅一)人生有何缺欠?

 移民要適應語言、文化等等,不過最先要涯得過冬季才講…

今早溫度係-7度。勁打詠春日字衝拳都冇用,仍然超寒。


旅遊心態:嘩!大雪,好浪漫啊!落大D!

移民心態:大鋪!大把野整,做餐死!

當水變為冰時,體積會增大9%,全屋喉管會爆裂,可以好大件事。當然這是無人住的屋才會發生,因為只要有人住,室溫也不會零度,不必過份擔心,只是室溫未跌至零度,也要開暖氣保暖,有些錢冇得慳。


香港的物資已送到,起初預算要三個月,最後兩個月鬆少少已收到。英國並非不毛之地,許多物資都可買到,甚至節省千里迢迢運費,全部買新也可以,提醒移英人士,只運有記念價值的東西,我的詠春八斬刀,即使明知英國冇,但武器不能運,割愛送了別人便算。


天氣好,有陽光,也會帶個仔去公園玩,生活總算過得去。


去了Tesco買了19鎊電飯煲,晚晚有飯食,跟漁村Hong Kong沒有分別,人生有甚麼缺欠呢?


移英日記(142)公義不一定今生可以看到

 最近我重看「包青天」一回,雖然知道這劇集不過是小說「七俠五義」改編,並非歷史事實,但仍然大快人心,吐一口烏氣。(如果今日法官係咁就好了) (某移英弟兄說希望死前能見到公義,我坦白說當日猶太人都等唔到復國,也等唔到耶穌再番黎。) 原來人人心裡都想公義昭彰,所以某地的人去包公廟哭訴...