移英日記（189）英國詐騙

 昨日我收到錄音電話，話來自HMRC，叫我跟指示操作，聽到太多詐騙，英文又水皮，立刻收線，免遭損失，果然去到HMRC真係講到有這種詐騙，敬希小心！

HMRC網站：https://www.gov.uk/government/publications/phishing-and-bogus-emails-hm-revenue-and-customs-examples

其實「天下烏鴉一樣黑」，去到世界邊到，唔好貪少便宜，凡事小心，可保平安！

IB投資系列：大孖沙已落注

 美滙指數下跌，意味大孖沙已落注，非美貨幣上升。估唔到咁快割韭菜，你賺到幾多美元，兌換回自己本國貨幣都要打個折，如果賺得少，仲要嘔突，不過以美股過往表現，我這些三流交易員都賺到錢，你只要夠年輕、敢冒險，打個折，都盤滿缽滿。

問題是我們懂不懂知所進退？急流勇退？炒樓炒鋪嘅投資者如「你巾馨」、「ball仔」之流，難道不比我們普通人更清楚行情麼？只不過對見慣風浪嘅人，會有比常人更大的自信，深信短時間守得住，不會賤價沽貨，但當大巿超出他們意料，分分鐘會一鋪清袋。

當我移英以後，仍持有相當比例嘅「講股」，最終我仍決定分兩階段沽清，第一階段沽清地產股，第二階段沽清藍籌股，埋單蝕三十幾萬。現在反思，第一階段沽清地產股係正確，但第二階段可善價而沽，這部分可平手或賺少少走人，不過你俾多次機會，我都唔會搏。

現在嘅情況也是一樣，你沽售美股？還是繼續玩下去？我唔怕坦白講，我有一半資產是現金，1/3英鎊、2/3美元，希望滙率好少少兌換更多英鎊，以便購買物業，長居大不列顛，反正要讓個仔讀到大學仲有十幾年時間，長期加租或迫遷都唔係辦法。其他資產有股票、收益基金、債券、REITs 等。

現在嘅情況係要小心，美帝一減息，等於公開承認經濟衰退，資產價格一定下跌，造成損失。只不過「狼來了」嘅故事講了太多次，次次話減，最後都冇減，錯過了不少賺錢嘅機會，正所謂：「阻人發達，猶如殺人父母」，講得太多，人習慣了，就冇作用，但正正是輕忽了風險，反而帶來致命嘅後果。

（黃仁勳嘅晶片，賺到盤滿缽滿，但投資佢嘅股票要相當小心，以免招致損失。）

（我是某電車嘅長期投資者，原來我都有資格參加Robotaxi發佈會，知道第一手資訊，不過我就唔會咁傻飛去美國，第二日啲人就會整理晒講出來。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：獅子銀行靠唔住

 某日我收到短訊有關驗証碼，跟住又收到銀行短訊，戶口封鎖，要我聯絡銀行。後來我致電，知道要去分行認証，成件事明晒。

銀行職員話有人致電銀行，但因為提供的資料不正確，懷疑欺騙，故封鎖戶口。

如果你係詐騙，你會向普通巿民著手？還是銀行職員？如果要欺騙銀行，要取得當事人幾多資訊，才能騙走金錢？如果你設定嘅問題，係你最喜愛嘅電影，第一個女朋友名字，怎會估到，你做賊都取易不取難，自己想想。

我一早叫人：「走得快，好世界」，怎會俾你封死？賊人要騙就騙，監管要封就封，一舊水都冇，點俾人呃？不過咁，如果要靠人接濟就慘了！「獅子」銀行嘅大股東係「駢補」，大家都明㗎啦！不需多講。

現在要呃錢好難，戶口名、密碼、手機認証、人面辨識…英國也有電騙，故仔都作得好精妙，好多人都上當，俾晒個人資料，但突然要你入戶口或咭資料，才醒覺中招，但資料俾晒人，人哋下次又有另一個劇本呃你，中招機會大增。我英文水皮，幾精妙都氹唔到我，因為唔識聽，幾舊水著數就想我落疊，咪玩喇！

「光棍佬教仔便宜莫貪」，要賺錢有很多方法，何必做犯法嘅事呢？

賺幾舊水又好、幾皮野又好，靠自己能力賺到錢，心安理得，見得人，拜得神。

(我的ISA免稅戶口，用英鎊結算，由開始兩萬鎊增至兩萬一千鎊，不足一個月已有五厘回報，所以我對收息產品不大興趣，手續費高冇問題，賺到錢咪得囉。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：炒股16小時

 美股正常交易時段：

夏令（3月至11月）

9:30pm至4:00am （香港）

2:30pm至9:00pm （英國）

冬令（11月至3月）

10:30pm至5:00am （香港）

3:30pm至10:00pm (英國）

當然炒得美股，玩埋盤前、盤後交易。

盤前：9:00am至2:30pm (英國）

盤後：9:00pm至1:00am (英國）

換言之，交易時間由9:00am至1:00am (英國）合共16小時。

當你見到炒美股嘅交易時間，你就知移英炒美股有絕對優勢，你夠精神，做足16小時交易也可以。

不過說實話，最多交易及最能反映股票價值，仍是正常交易時段，盤前、盤後交易量較少，容易有波動，這個波動係雙刃刀，有可能太睇淡執到平貨，也可能過份樂觀執到貴貨，最緊要自己知道股票個價值值幾多，唔好受巿場氣氛影響，到價就買或賣，唔到價就按兵不動，這個時候，定力好重要。

（IB可以進行盤前、盤後交易，只要根據指示進行即可。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

IB投資系列：又割韭菜了！

 降息已經講了咁多次，你以為美帝真係單單按經濟數據降息嗎？最重要透過貨幣政策，令資產轉移，盡收天下財富，所以佢哋背後自己已有許多數據，割韭菜割得七七八八，最後再嚟一次殺著，因此幕後玩家是先有決定，然後再用經濟數據將他們所作，變得合理化，資訊只不過用來愚弄我們這些下等人。

美帝透過加息，盡收天下財富，人人變賣本國貨幣兌換美元買美債，主動借錢俾美帝使用，美帝嘅有錢佬用強美元并購外國資產，盡收天下財富，美帝要還錢就降息貶值，用低息債冚高息債，你以為賺了五厘息，到最後兌回本國貨幣，比之前還少，跟住又瘋狂印銀紙，名為刺激經濟，實質讓美帝揮霍使用，然後將通脹交由全世界承擔，不住循環使用，建立不朽霸主嘅地位。

（單單模仿係無法超越，何況美帝嘅招數係無法模仿。）

有錢佬如巴菲特已賣蘋果、黃仁勳已賣輝達，高位獲利走人，但巴菲特又不能賣美元兌外幣，即使知道佢會貶值，咁於是買短期美債，鎖定利潤，又保留彈性，待股巿崩盤，立刻可以重錘出擊， 如果「大粒佬」都高位賣股套現，試問散戶怎可能賺錢呢？盡其量短炒高低位賺少少飲茶錢吧！

（北斗神拳奧義：水影心，能夠複製對方嘅招數施之於對方。）

（韓信「置之死地而後生」，只有佢自己可以做到，後世無人可以複製使用。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

搵錢唔好太難睇

 最近某偽人去大不列顛博物館，又話這件偷、那件搶，完全乎合天朝偽愛國主義，但原來佢唔知更多是來自私人捐獻，更不乏華人，講真讀歷史都知，如果唔係這些保育，文革早早破壞晒。

某偽人年輕時曾為東瀛運動品牌Yasaki賣廣告，年幾有番咁上下嘅人就會知道，如果按照今日天朝標準，血統就唔係好純正了。

人所以為人，就是：是其是、非其非，我唔介意你嘅政治取向，建造業有個朋友，佢真係愛國到不得了，佢話打貪成功，tiger及fly都唔放過，天朝有救，跟住我send了這些打貪嘅人自己都貪嘅消息給他，家屬資產全以億計，跟住佢就冇回應、冇聯絡。其實打貪不過權鬥嘅一種，排除異己嘅手段，正常人都知，只不過愛到入血入骨嘅人，喺無辦法將反對嘅意見聽入耳。愛到盲目係真愛，只是我太理性，以致一生都沒有經歷盲目去愛嘅感覺，真係可悲！

賺錢、搵錢都唔係罪，只是使唔使咁難睇！

（直播帶貨賣M巾唔可恥，問題係人的原則係咪一致。）

(機會主義者就很多，愛國者就死晒，或者被囚在監獄。）

IB投資系列：經濟衰退？

 受到非農就業數據不及預期，加上巿場對經濟衰退嘅恐慌，道指、標普、納指全線下跌，風聲鶴唳！

幸好昨日彈一彈賺番多少，今鋪頂得住。

做生意就係咁，有賺有蝕，有高有低，唔好大驚少怪！

已故巴郡副主席查理芒格早早已說，AI被過度炒作，加密貨幣是最蠢的投資。佢係舊派投資人，我尊重佢嘅意見，我反思：科網時代，又話改變全世界，5G物聯網，又話改變全世界，最終極只不過call車、叫外賣，用app下單，公司減少了人手，世界改變不大，AI有冇誇大呢？又話取代人類，我要十月看看特斯拉嘅機械人的士能否正常運作，再作定奪。

我深信有實力嘅公司，面對風浪，確實股價有回調，但真實價格最終極會反映一間公司嘅價值，反之，沒有實力嘅公司，面對風浪，會加速淘汰，被巿場嫌棄。

世界上某些國家，成日要超英趕美，成日想做一哥，做世界霸主，但僅僅是模仿，並無法超越，你看技術高超嘅已故球星高比拜仁，便可知道。

寶島總統極有智慧，指出天朝為領土完整，為何不追討北方領土，天朝外交部不敢回應。

（如果天朝追討外興安嶺以南、烏蘇里江以東、庫頁島、伊犁、唐努烏梁海，寶島總統應無話可說。）

世界立立亂，投資需審慎！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。