移英三年，小兒由Nusey讀到P2，人哋話英國讀書冇壓力，這是真的，冇功課、冇考試、冇排名，好嘅係冇壓力，自由學習，唔好嘅係死蛇爛鱔，一事無成，好取決孩子嘅質地及家庭教育。
學校在P1時教了拼音，在英語環境成長，識讀就識解，而且口音好準，我嘅仔跟某網紅Co Co哥嘅女同一年幾，人哋睇字典咁厚嘅書及彈鋼琴，我個仔睇漫畫咋，字都未必睇，陰公！
正所謂：「同人唔同命，同傘唔同柄」，不能夠比較。我偏重運動方面訓練，單車、滑板車很早識玩，現在玩埋roller，有晒護具保護，已經玩到。
星期五車佢學游水，星期六學Judo柔道。我嘅詠春拳，佢半點也沒學到，悲哀！不過有基本體能，加上有幾個同學由Nusey升到P1、P2，有朋友互相關照，我唔怕佢俾人恰！
學校有教材，要自己屋企印，你鍾意做就做，唔做就算，冇人迫你。有個App玩遊戲去學習，又唔會理你有冇玩。
「歪芺」也買了一些補充練習，得閒做下，佢專揀一些得意才做，悶就唔做，我都算㗎啦，費時佢頹廢一生，我之前教到3嘅乘數表，停了很耐，自己又要投資，好難分心教佢，現在我都迫自己教佢4嘅乘數表，另外，我想教佢理財，我每星期俾一鎊，如果佢儲夠十鎊，我額外加一鎊，10%利息，但未成功，佢得五鎊，想買十鎊野，想借錢，我說借錢要利息，借五鎊要五鎊利息，要十個星期冇零用錢，佢竟然願意，我立刻stop佢，要佢儲錢去買，如果唔識延遲滿足，只會一世做廢人。
跟住我又教佢科學，他在出面執到石頭，我告訴他這是石英，即係二氧化硅，就係下圖右邊嘅石頭，又買了教材做水晶，水晶咪即係二氧化硅。
在英國，最重要嘅教師唔係學校嗰啲，而係父母，因為公立學校唔會迫，主在乎學生自己有冇興趣，有冇自學動機，我自己教埋運動、數學、理財、科學、神學、中文…就算帶個仔去學Judo，我在家中要練習，示範「受身」及「鎖技」，埋身練習，右手揸住對手衣襟，左手揸住衫袖…
「郷講人」點解數學叻，因為操練有關，因此鄉講學生嚟這邊考數學，覺得極淺，但如果自細在這邊讀書，根本冇分別，因為學校Hea到暈，唯有家長幫仔女惡補，因此到了中學，有錢一點嘅都會送仔女入讀私立學校。
（愛丁堡私立學校，小學要萬三鎊一年，中學要兩萬四鎊，平均每月要一萬至兩萬講紙，可行少少，出面補下英、數便算。）
沒有留言:
張貼留言