在賭場，點解一定係賭場贏？你解得通個道理，係股票、投資巿場都可以賺錢，反之，你最後都係輸錢。
賭場有所謂莊家優勢，意思就係贏嘅機會率比輸嘅機會率大，所以只要時間及次數夠多，這個優勢就會出現。所以遇著有些人極理性，贏輸都即走，賭場係冇優勢，為了讓賭徒磨爛蓆，要留住佢地，唔係甚麼風水局，只是冇窗、冇鐘，唔知時間，好多燈，令人好精神，冇出路指示，好像迷宮，有野飲、有野食…總言之讓你留底，賭場就一定贏。
投資你會唔會學賭場嘅比較優勢，投資贏嘅機率比輸嘅機率大嘅產品呢？要做到這優勢就要做功課，幾時係出手機會？又係要冇窗、冇鐘，唔知時間去留意個好價，當年我在漁村買美股係要涯眼瞓，現在英國下午兩時半開美巿，人夠精神先有得玩，另外，要儲好資本，賭枱、賭廳，三間輸、七間贏，賭場都贏，同樣十隻股票，唔會隻隻贏，贏多過輸就叫贏。好像我以前做快餐，個區域經理叫我計晒區內分店嘅數俾佢，所以我係最遲放工，分店唔會間間賺錢，賺多過蝕就叫賺，但老闆總希望間間賺錢。
今日啲人點炒股？要回報高、易發達。賭過錢都知，賠率高即係冷門，意味輸嘅機率比贏嘅機率為大，咁豈能唔輸錢？買埋啲「迷因股」、「妖股」如GameStop，大上大落望發達，唔死都冇用！
投資，時間也是優勢，你只要知道政府不住印銀紙，錢嘅購買力只會越來越少，購入資產，只要冇買錯野，道理上都唔會蝕錢，我好簡單咁講，英國通脹早前十幾個百分比，100鎊嘅物品，加到110鎊，如果我買了這物品，最基本已抗通脹了，當然要真係賺錢，就要多功夫了！
免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。
沒有留言:
張貼留言