我想，我跟許多對武術志同道合嘅人也一樣，對武術充滿熱情，希望能夠學到一身好功夫、好武功。
黃作、黃淳樑、李小龍…嘅詠春功夫係打出嚟，唔係黐手黐出嚟，就好像有人不住在泳池邊練動作，練到幾靚都冇用，一跳落水才知唔識遊水，數以百計、千計翻車嘅武術師傅，學咗幾十年功夫，以為找個幼嫩嘅業餘拳手，就可打贏，打完才知自己根本唔識搏擊，太極師傅嘅痛，唔係身體嘅傷痛，而係幾十年的價值及信念，一次過毁滅，根本冇辦法面對自己。
我奉勸年輕嘅，趁後生上擂台，武聯嘅散打賽又好，泰拳理事會嘅拳賽又好，拳擊總會嘅拳賽也好，你上過擂台，你就知搏擊三寶係乜嘢？速度、力量、耐力。技巧係要，但都要在三個基礎下才有意義，就好似起樓冇根基，起到幾高都冇用，所以齋黐手係冇用的，我強調唔係詠春黐手冇用，這不過是其中一個功法，不是全部或大部分，打吊包、打壁包、打速度球、打木人樁、遊水、跑步、自由搏擊…同樣重要。
至於我地呢啲半退休人士，都收晒水，隨時主懷安息，仲有甚麼盼望呢？搏擊世界已經唔屬於我地，只不過一日仍生存，路仍要走下去，武術係一生嘅追尋，郁唔到就冇得講，郁得到就會練下去。我奉勸詠春門人唔好齋黐手，基礎拳法、腳法更重要，我每日戴著拳套練拳擊，練三樣就夠：直拳、勾拳、下勾拳（上擊拳），腳法也是練三樣就夠：直踢、側踢、旋踢，我自己屎忽痕練埋後旋踢，因為我覺得連環腳法好型好優美，你話我詠春叛徒，又拳擊又跆拳，又如何？到了我這個年幾，仲需要介意人點睇麼？我淨係知道這些功法對我有幫助，就算我唔打四字拳，打番詠春嘅日字拳，個力量已經好唔同，再者詠春除了埋肘拳，也有飛肘拳，只不過齋黐手嘅詠春係唔會識，明明唔需要咁窄角度嘅拳，也要咁做，人地外線拳如入無人之境，最終互中，倒地一定係詠春，除非有更廢嘅國術。
至於做師傅嘅，收得人錢，唔該交足貨，帶著徒弟操下體能，大肚腩好易糖尿、心臟血管疾病，載著拳靶操拳，練到啲人攰為止，手痛腳痛嘅，就買支活絡油搽吓，賺錢都賺得心安理得。啲人拳又重、又有體能、核心肌群又結實，唔會揸得去邊？好多詠春師傅齋教套路、黐手，唔使流汗，手法又甩漏，食屎喇！
沒有留言:
張貼留言