西豐田做service，好揦脷！

 20/1早去了「西豐田」（Western Toyota)做每年service，買車時已買埋兩年service包MOT，372鎊，不過要換機油及損耗品另計，約了早上九點，要五點才完成，留又唔係，走又唔係，周圍偏僻，要返屋企又要撘巴士，又貴又等得耐，無謂，最後都係決定等。

知道原廠貴，但人生路不熟，車房表面平，跟住殺到你一頸血，條數一樣喺返度，以前架「錢七」Honda，車房執到過到MOT，都用了七百幾鎊，局住俾，因為車確實舊，揸係揸到，但唔俾你過MOT，也是冇得玩。

今日美帝登基，冇得炒股，以為安安落落，其實都很悶，「鄉講人」要慢下來，甚麼都唔做，也是很難，好彩帶了「尿袋」（充電器）、飲品、麵包，預咗幾個鐘。

美股回調，只係對「突郎浦」帶來不確定性嘅反應，仲未見真章，真正嘅「吸星大法」仍未施展，一旦施展，至少20-30%回調，若是如此，何不走得就走，等冧檔才趁低吸納。我估計「突郎浦」一登基唔會立刻冧檔，咁攪法會好難睇，但頂到幾耐？一個月？半年？一年？真係冇人知。

去得原廠，一定唔見一筆，早知就換了呔才嚟，因為Service連埋MOT，唔換就過唔到MOT，局住換埋，換一條，不如換埋，免麻煩，今日美股休巿，往後唔會咁得閒，正巿再加埋盤前盤後，十幾個鐘，錢可以賺番，要用錢換時間，我知道「高奴」都會咁做，但我不過「低奴」六百幾鎊，梗係有啲肉痛。

英國啲地咁爛，去完環島遊，一定有耗損，跟住避震都極大可能要換，加上冬天灑鹽，車底容易生鏽，等天氣暖一點，要用水射一射車底，英國用車成本較高，一定要準備好！特別係錢。

早上九點等到五點，跟住先話仲有問題整唔到，你第一次檢車報價，應話幾多就幾多，整好就得，臨到五點又有新問題，浪費時間，又要我撘巴士走，明日又撘巴士嚟…

換呔價錢已是出面兩倍，你要賺錢無問題，但卻提供唔到服務，好似漁村嗰間「人夫行」咁，我唔會懷疑豐田章男嘅車，但代理嘅唧牙膏式服務，並不理想，十分失望。

埋單皮半，舊車一年又係整咁多錢，approved car又係要咁多，原廠維修好似要整到出廠時新車嘅水準，邊有可能？少少瑕疵，正常人係可以接受，嗰啲錢七，爛到咁，生晒銹，都過到MOT，到你買嘅時候整到你昏才過到MOT，條呔，好主觀，部件小少崩，純粹外觀，講到尾都係為咗掠水！原廠保養係最嚴格嘅MOT，怪不得新車三年就有人放，就是怕MOT。