移英日記（207)不自由的自由

 英國要有啖好食，一係俾更多嘅錢出街食，一係自己煮，別無他法。我呢啲低奴，又係愚奴，未必有好大心思及廚技，好像移英Lesbian可完全複製漁村美食，只能整一些低能野自娛。

我在中超買到泰國魚乾，有九成似柴魚，決定煮柴魚花生粥。

甚麼都冇加，已經OK，若加埋瘦肉，不得了。

樣子並不好看，如果加啲蔥花，應該好好多。

我覺得唔需要100%複製，因為如要咁做，不如唔好嚟。最初落地，有飯食已經好滿足，75便士叮叮飯，後來加至85便士，現在已不太想買，唔想食，就算買，都係放在雪櫃Stand by，去飲茶、中式自助餐、日本野，已是每星期routine項目，現在叫做寒冬，實情雪都冇落，晚上不是煮飯，就係打邊爐。

現在係Termbreak，小兒唔使返學，去完格拉斯哥都要繼續周圍去，困喺屋企打機、睇電視，佢嘅一生就玩完，雖然都係玩，也是走出去，接觸人、接觸事，與友人一家一齊去sofe play室內遊樂場，四個人四部手機撳撳撳，友人炒幣、友人嫂接生意，我哋爛賭夫婦當然在IB炒股，我突然發現，靠炒股搵食，雖然有一定自由，如常周圍去，但根本不是財務自由，甚至個仔叫我睇佢點玩，我心裡其實不願意，覺得阻住搵食。如果想個仔出去接觸人、接觸事，父母卻是主力對住手機，雖然我哋唔係打機做無聊嘅嘢，係做正經嘅事，但係做了一個甚麼榜樣呢？確實值得反思！