IB投資系列：沒有後悔

 投資沒有後悔這回事，做生意當然有賺有蝕，最重要係財務穩健，上巿公司如是，個人理財也是一樣。

特斯拉Robotaxi，不升反跌，俾佢跣一鑊，當然我早早知道有咁嘅可能性，重鎚出擊就唔會，小注總會落多少，跌成廿點真需要時間療傷。

賺錢、蝕錢，我嘅生活質素也是一樣，昨日跟友人去了愛丁堡巿中心吃火鍋加韓式燒烤，兩大一細，六十幾鎊，如果天氣冷一點，效果更佳，我熱到除衫。

做人最緊要中庸之道，富又唔會亂使，窮又唔會欠缺，攞條平均線就可以了。

正所謂：「人心不足，蛇吞象」，有的人不願工作卻生四個仔、養三隻狗，網上行乞，固然可恥！有的每月領25萬，有司機、工人照顧，仍然覺得不足，成日想打官師一筆過攞晒出嚟使，最終臨老過唔到世。

有的人係沒有自制能力，只不過抽咗支好籤，上一代不單留下豐厚財產，並成立信託基金，每月出糧，即使後人怎樣敗家，也敗唔到份身家，終身衣食無憂。

我幻想，月領2球，一半供Voo或者巴郡，已經係億萬富豪…不過咁，如果有進取心，就唔會做二世祖，父母都唔會成立信託基金，就係怕二世祖敗晒份家產去乞食。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。