正所謂：「細個唔讀書，大個做運輸」，做咕喱（Coolie)係做粗重野的苦力，冇學識，得鋪牛力，冇辦法，以為在酒店執房，始終是室內工作，跟以前地盤冇得比，不過我主觀經驗看來，執房仲辛苦。
以前做地盤係辛苦，但係食飯一小時一定有，早上及下午茶一定有飲茶時間，所以可以回到氣，涯得住。這裡執房冇停手，扯晒蝦，1.5升水完全飲晒，記住是蘇格蘭，早上返工時負一度，室內當十度，都脫水，慘過做地盤，嘴唇長期乾，可能做得急，不自覺用口呼吸，中間話就話有半小時休息，但一落一上，中間又去員工室攞外套，咪得十五分鐘，我試過食野，係吞唔到，要飲水送服，再者功夫永遠做唔完，廿幾間房，有一半係全做，清潔及換晒所有毛巾、床單、被袋、枕袋，補充厠紙、茶包、咖啡…所以冇人會用盡休息時間，有的食支煙或朱古力，便上去繼續開工。
我自問涯得，年輕時在麥X勞、大X活做十幾個鐘，早幾年去地盤涯了八年左右，唔會係驕身慣養，只能說歲月不留人，自己不再年輕，加上接近一年部署移英，沒有工作，而工種又冇得停，回唔到氣，才變得格外辛苦。
但諗深一層，12鎊一小時，仍是值得，因為自駕車送貨，也只有十幾鎊，但要自付油錢、保險，除非係電車，在家中充電樁於非繁忙時間充電，才有著數，某網紅揸架寶馬送貨，只不過做俾你睇，賺取擊點吧！
工作係俾人有實在感，收入計到數，投資卻波動，三更貧五更富，有錢都唔敢使再投資，最後打回原型。有工作，5+1一定冇問題。至於想學英文，這份工做就學不了太多，因為冇英國人，東歐人的英文比我還差，最叻是菲律賓人及巴基斯坦人，阿頭是葡萄牙人，全部雜牌軍，最大問題是密密做，各自做，根本冇時間溝通。
沒有留言:
張貼留言