愛丁堡詠春：絕對埋㬹

 小念頭嘅「一攤三伏」要做到點才合要求？絕對埋㬹。

意思就係：攤手嘅中指或伏手嘅手腕，以及手㬹，要壓死在中線之上。

講到這裡，預咗冇朋友，所有詠春派都係我嘅敵人，要聽真話，就繼續睇，想繼續沉醉自己嘅幻想世界，就建議不要再睇下去。

按照這「絕對埋㬹」嘅要求，都唔係好多師傅做到，上圖最接近係「瘟師伯」，手腕至手㬹都壓得好靚，技擊係冇問題，但我貪心一點，既係套路，美感也有要求，手腕扭多了，如果手掌攤平，四指微微合攏，再扣埋姆指，咁就well done了。

小念頭第一攤手，我又稱之為「甩攤」，因為取其「來留去送、甩手直衝」之意，唔係吹毛求疵作啲專有名詞出嚟，只不過以此區分第二、第三攤手之分別，套路係要盡量做到「絕對埋㬹」，但實戰只要做到「相對埋㬹」就足以克敵。

「搏擊」嘅術數係好多，手法好，只是其一，我哋傳統嘅講法：一膽、二力、三功夫，膽量係指心理質素，力量係指肌力及心肺功能，功夫係指手法及技術，所以「絕對埋㬹」應屬第三範疇，埋到㬹也不代表一定好打，尤其黃種人對比白人、黑人在體能上嘅劣勢，要在各項手法及技術都做到巔峰，才有機會一較高下。

要將詠春推至搏擊水平係十分十分困難嘅事，好多所謂「師傅」嘅手法都咁離譜，講搏擊係好遙遠嘅事，不過咁，大家都係搵食啫，你知、我知、單眼佬都知，大家都係做戲，你交足戲，跟足劇本咁做，我係唔會無的放矢嘅，倘若戲都費事扮，我會毫不猶豫批評。「綜獅」嘅兒子不是「綜獅」，「港手王」嘅兒子得個「講」字，「岑喬王」嘅兒子不過是「沉橋王」，倘若做得唔好，要接受批評，你又怨得誰呢？

（運動員都係勤力到你想像唔到，高比拜仁如是，C朗如是，美斯更是，沒有例外，因此水平極高。）

（有的所謂師傅，懶惰得很，戲都費事扮，反正有人送錢俾我，使乜咁辛苦！有人說：人都去咗，唔好再講，以存口德，咁我哋唔使讀歷史啦！）