隨着英國打算改變移民政策，移英族群也出現分化，有人認為既然都嚟咗依度，點解唔學好英文，質疑反對者冇上進心。我想問吓你HK嘅菲傭，你會唔會要求佢考中學會考？中文要合格呢？現在仲要提升至A level嘅合格水平？我實在告訴你們，英國人考life in UK嘅問題，大部分都唔識，至於B2考試，你叫佢讀聽係冇問題，要考文法、寫文章，好多讀完中學，字都唔識串或串錯，接近文盲水平，讀到大學嗰啲當然冇問題。
如果本地人大部分做唔到嘅事，點解要求外國人要做到呢？分明係難阻，表面梗係話學好啲英文可以融入社會，背後嘅邏輯係掠水，各式嘅課程費、補習費、考試費，仲有考唔到要延長個簽證，所有野都係錢。更重要係一個政府嘅誠信，如果朝令夕改，咁仲有邊一個人會信呢？秦國可以統一六國，就係法家治國，一諾千金，殺敵一人，賜爵一級，於是人人都為國家賣命。今日邊個會為英國賣命？有能力、有錢都準備走人了！
B2嘅要求相當於以前中學會考（課程乙）嘅C級，以前都只有兩成人考到，想當年，我都考了4次才勉強攞到E級合格，今日已經一把年紀，記憶力大不如前，要達到要求，要用3年？5年？10年？還是延長簽證至65歳唔使考呢？又或者我哋呢啲低端人口唔適合大不列顛呢啲高端嘅地方。
我就照報B1考試，既然唔知，考咗先，在政策落實前做了，或在過渡期已考獲，也有機會的。我報嘅考試係三一學院，應是最易嗰間，150鎊，再加多30鎊，可補考一次，合共180鎊。
沒有留言:
張貼留言