移英日記（371）要走要留睇你自己

 最近因英國醞釀加稅，又搵唔到食，有些人已忍無可忍要走。

你連夢都唔俾人發，各黨各派都針對移民，將合資格移民，跟坐快艇攞福利嘅非法移民，一同視之，又不住說要增加永居時間，增加英語難度，增加簽證費用，根本一般英國人嘅英語都達唔到嘅Level，BNO講人真係好氣憤，尤其放棄高薪厚職者，當然想回流。

我自己沒有回流這想法，因為有小朋友，信念會堅好多，至少讀埋中學、大學才走人。

作為低奴，以前「漁村」都係做低級野，住細屋，冇工人，最多係食「大加鉻」，現在住大一倍，有車出入，最麻煩係餐餐煮，餐餐洗碗，其實有洗碗碟機，有些人儲夠一日碗碟先開機，我唔儲，餐餐自己洗，飲食比以前更好，以前「大加鉻」快餐嗰個牛扒蛋早餐，牛扒又薄又細，用梳打醃到爛晒，食得多都冇益，自己煮又靚又好食，只係落胡椒粉及鹽，食嘅佢原本嘅肉味。

你睇下碗牛腩河，啲牛腩幾靚，係瘦咗啲，所以嚟英國唔係一定要降格，可以係升格，但一定要自己煮，我話俾你聽，雞蛋仔我都可以有得食，有八成似，不過「歪芺」整了一次怕麻煩，沒有再整了。

至於稅務問題真係好煩，一定要聽YouTuber 小魚爸，學識點報，點樣慳稅，用幾年將錢移去ISA，就可免稅，只不過ISA買唔到期權及槓桿，賺錢會少了。

其實任何地方，也有好，也有壞，在「天朝」你肯俾錢，就不必食預制菜。有些地方，你肯揞住良心，唔理政治，有些地方也不錯，問題係你搵唔搵到錢，嗰啲問題可唔可以解決，在英國，天氣凍，著多件衫、開暖氣就可解決。地方遠，駕車就可以。稅高就唔好賺咁多，攞個平衡點，政黨衰，下次大選就選第二個，想搵錢，揸巴士，都賺到三皮幫到手，問清楚自己，邊啲問題解決到？邊啲問題係解決唔到？然後作出判斷及選擇，留又好，走也好，都係自己自由意志下嘅選擇。