詠春拳嗰種無招勝有招，專攻破綻嘅拳法，怎不令人心動，我都係咁樣俾人呃咗入局，耗費了大半身，最後一無所有。
不過呢啲興趣班水平，又想得到甚麼呢？俾你去到極致，咁好似我啲師兄，攞到泰拳理事會嘅業餘拳王及武聯嘅業餘散打冠軍，一到疫情，經濟就困難，以為雨過天晴，又遇到意外，生計都有困難。
炒下股，玩下三十年前嘅世嘉超級大戰略，已經夠開心，我唔需要最新遊戲機。當年二手咭帶都要300元，仲有一本好厚嘅說明書，玩完遊戲，了解到除了海軍唔夠英國打，德國嘅陸軍係領先世界，嗰架對空戰車砲，又可打戰機，又可打坦克，靈活度甚高。
詠春之道都係咁嘅啫，避實擊虛，英國海軍勁，就不正面交鋒，用潛艇伏擊，用陸軍嘅優勢輾壓。當大家都擺好樁頭戒備時，係完全沒有破綻，只有在進攻或防守（特別在錯誤防守時），破綻才會出現，因此宗師最初所傳嘅打法，係以靜制動，等待對方先出手，露出破綻，然後可以圖也！詠春已經沒有叱咤威猛嘅動作，仲要咁被動，自然難以吸引人，生意淡薄，慘淡經營，學嘅人也不多。這種等人先出招嘅方法，空手道稱之為「後之先」，我哋稱之為「後發先至」，高手甚至雙手垂低，引對方出招，好像有一次拳賽，泰拳拳王羅唐，就係勞氣對手左閃右避，想用點數贏，要求對手拳來拳往分勝負。
我哋唔係要做全方位搏擊拳王，要體能、抗打、搏擊技術等等完全精煉，係冇可能，坊間99.99%師傅將黐手當作核心做訓練，打埋啲飛機拳都唔理，掂到人就當打倒人，最終套拳睇得唔打得。我告訴大家，古人在搏擊功夫，練到練無可練，要在近距離糾纏嘅反應都唔放過，才鑽研出黐手技術，應對近身搏鬥嘅處境，這叫錦上添花，今日嘅詠春，衫都冇得著，雕花又有乜嘢用？
你做得師傅，冇可能唔知，既知問題，繼續容許問題，繼續收錢授徒，咁即係點？
一個對詠春沒有興趣，只對錢有興趣嘅人，冇屈佢，鬼拍後尾枕，或者食了「誠實豆沙包」，講晒出嚟，這類師傅會教到你好嘅詠春拳麼？自己諗吓啦！
沒有留言:
張貼留言