本人有以下幾方面分析：
讀書：小兒讀Nursery，英格蘭每星期15小時免費，蘇格蘭以全年1140小時免費，扣除假期，每星期約30小時，基本上星期一至五可返足上午班或下午班，時間更長，小兒更多時間跟其他小朋友玩，適應更快更好，「歪芺」有時間買餸、做家務，勞嘈也較少。至於免費讀大學，係有少少條件，第一移英居住三年，第二以蘇格蘭為永久居住地，小心留意，如果移英三年不住蘇格蘭，沒有租約、工作佐証，如何証明你係以蘇格蘭為永久居住地呢？(我一落地就係愛丁堡，住屋、工作、返教會、小兒讀書等全在愛丁堡，肯定証明係永居地）
天氣：我的認知，北半球越北地方越凍，當然也要考慮其他因素，馬來西亞比漁村更接近赤道，但雲頂高原卻比漁村涼快。鴨巴甸冬天負17度，不過我住愛丁堡卻比英國中部暖，冬天只落兩次小雪，車用除雪劑只買了一次，雪也不厚。曼城大雪時，這邊冇雪，那時住semi我跟小兒在花園跑跑跳跳，令我大感意外，不能將加拿大、俄羅斯比較。
水：愛丁堡是軟水，不是硬水。巿政稅加埋水費、排污費，沒有水錶，俾了錢任你用。住house有著數，花園種花、洗車也要用水，住flat，同區可能交一樣錢，冇著數。
NHS：蘇格蘭睇醫生包埋藥費，英格蘭要9.15鎊。
住屋：蘇格蘭的house、flat全部都係永久業權freehold，投資有保障，英格蘭尤其是flat，一定係leasehold，中伏機會大。
能源：蘇格蘭有北海石油，雖然係尾水，但有勝於無，而且地廣人稀，要發展再生能源也有條件開發，擁有全英六成以上陸上風力發電，全歐25%海上風能和潮汐資源，冇油都係英格蘭死先。
說到這裡，人人都知點選擇。不過蘇格蘭獨立聲音從來未停止，獨立後未必咁順意入歐盟，有一些不可知的因素，不過大不列顛冇了蘇格蘭亦不會好得多少，威爾士一直爭取與蘇格蘭同等的權利，北愛問題等，也會因蘇獨而誘發，王國四分五裂也難免。
沒有留言:
張貼留言