正所謂：「寧食開眉粥，莫食愁眉飯」，我知道漁村是賺錢的地方，又是我地的主場，做很多事也得心應手，加上累積經驗，工作都唔使由低做起，薪金也不錯。
好像我認識的校長，黎到大不列顛，做最低工資的執房工作，後來終於做了教學助理，已開心到死，學歷經驗那個大不列顛比得上，但人地唔承認你的一切，當你「𡃁仔」（冇經驗的人）。
好像我這些上唔到位、埋唔到堆的二打六，攞晒大工牌，到最後都係做穩定的公司工，同期的師兄弟，有的已做到判頭、地盤管理或者大師傅，即使我咁冇用，但大不列顛的薪資仍不過漁村一半，其他更不用說了。
這裡的生活是不同的，最低工資雖然比漁村高一倍，但一星期只返五日，每日只返六小時左右（不同工作不同），注重工作與生活平衡，每月得千幾鎊（即一萬幾千港幣），但我經常放工可返屋企睇一陣電視，再施施然駕車接個仔放學，返到樓下，個仔又要扮下司機，又話要開車頭蓋睇睇引擎，跟住「歪芺」就會在露台大叫食飯…。
星期日主日崇拜，「老田」傳道直言邪惡「正拳」，毫不避諱，將我們內心深處的問題說出來，漁村教會為求自保，唔敢講真說話，唔敢喝斥惡人，白衣人見人就打，Police見人就打，好似冇咗件事咁，但這個記憶是不會消失，勉強蓋住唔會好，只有做手術將腐爛取出，消毒傷口，才能痊癒。
如果你搵開幾皮，黎到得嗰皮幾，確實很難接受，搵多少少就要抽20%稅（出糧已扣咗先），好像唔鼓勵人努力工作，有的人編排得妥當，放工做第二份工，或者放假送下貨，收入倒不錯，當然點賺都比不上漁村的。
蘇格蘭四大城巿，各具特色，鴨巴甸Aberdeen最平，但冬天負17度，唔係個個頂到。格拉斯哥Glasgow最旺，人口最多，但D英文完全聽唔到，立刻變聾啞人士。丹地Dundee最多陽光，退休就好。愛丁堡文化氣息濃厚，旅遊業興旺，酒店實請人執房，唔識英文都得，東歐人都係用手機翻譯老細指示。我建議愛丁堡落腳，至少英語聽到，工作機會多。貪平，選擇生活指數低的城市，除非你可以食老本，財務自由，否則六年沒有工作，唔係個個得。
另外，亦可選擇一些愛丁堡外圍小鎮，如利雲斯頓Livingston，住屋價錢平，教會很多弟兄都住那邊，已經有兩個小組，大把自己友，唔怕冇支援。
有漁村朋友叫我唔好講咁多愛丁堡，怕搶高樓價，搶學位。不過咁，我都要講真話，愛丁堡係平過倫敦，卻貴過曼城、伯明翰、列斯。治安好，天氣比中部城市暖（冇人知），愛丁堡大學全球排名20，學術氣氛濃厚，免費nursery讀到university，甚麼都賺晒！食粥咪食粥囉！
沒有留言:
張貼留言