移到英國，最頭痕一定係投資報稅，交稅事少，報稅事大，一年幾百幾千個trade，買賣價仲要計埋稅局公佈每月兌換率，月月不同，買嗰個月同賣嗰個月都唔同，全部要兌換英鎊計算，我告訴大家，即使你肯俾錢，英國都不會有會計師幫你做，只會建議你開ISA免稅戶口。
ISA免稅戶口，每個財政年度，容許入金兩萬鎊（20萬港元），所有投資在ISA不必報稅交稅，有冇咁著數？一定有蠱惑，係明益商家佬嘅政策，好似某年某日漁村經濟困難，政府向每個「強迫金」注資，巿民一個仙都用唔到，明益商家佬。
所有ISA投資戶口，如果同樣規格，放在巿場根本冇人會用，就好像「強迫金」裡嘅基金收費，放在巿場根本冇人會買，擺到明係明益商家佬，你喺漁村冇辦法，正如人在大不列顛，也是冇辦法，我只有選最好嘅ISA公司，最平嘅手續費。
有些移英講人又話Freetrade平，買賣零手續費，不過外滙對換0.45%，我哋蘇格蘭有個Chris哥又話Trading212平，買賣零手續費，不過外滙對換0.15%，我用真實例子，貨比三家：
ISA戶口只容許持有英鎊，又沒有孖展，如果買美股，就會出現負美元，IB便會用ISA嘅英鎊即時兌換美元償還，這個操作收取外滙費用0.03%，10251美元，即3.0753美元，連埋1美元手續費，IB合共要4.0753美元。Freetrade零手續費但外滙費用0.45%，10250美元，即46.125美元。Trading212零手續費但外滙費用0.15%，即15.375美元，咁收手續費貴？還是免手續費貴？大家自行判斷。
ISA炒股成本一定比正常IB貴，正常戶口一次過兌換足夠美元，都係2美元手續費，以後都無需再換，每次買收1美元，賣收1美元，股數大量再貴一點，現在逐次收外滙費，成本急增，而且限制多多，又不可投資美國ETF，VOO、QQQ，除非你伸報自己係專業投資者，例如資產達到某個價值、每年trade嘅數量夠多、有冇在投行等金融機構任職。但咁樣做又會失去普通投資者嘅保障，要諗清楚！
免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。
沒有留言:
張貼留言