大不列顛駕駛要小心

 移英差不多兩年，雖然唔敢講係老司機，但都差不多由北至南走過一轉，有一點兒心得分享。

大不列顛駕駛雖然沒有漁村咁緊張，但難度並不會比漁村少。因為兩地道路嘅概念大不同，這裡能力越大，責任越重，越要忍讓。大車讓細車，細車讓電單車，單車讓行人，所以這裡嘅行人係無敵，你撞倒佢，好大件事，一定係你錯，故車一定讓行人先過，即使並不是行人過路處也好，有的人甚至望都唔望就行出馬路，若無其事，施施然慢行，你駕駛睇漏眼就好大件事。

大不列顛迴旋處數量係全球之冠，一定要清楚自己去邊，第幾個出口出，進入迴旋處前，已入啱路線，左轉打左燈入左線，正行入中線，右轉出口打右燈入右線，臨出打左燈出。入啱線、打啱燈、望右車小心入，已經好安全，倘若入錯，除非冇車，否則不要夾硬改道，免生危險，兜多少少路，都可到達目的。

我試過8字雙迴旋，真係冇計，跟前車一齊錯，一齊出關，我自己知道出錯，前車都係咁行，我就知一齊錯，據我所知，更有些迴旋處成個萬花筒，好像火影忍者嘅寫輪眼，如果第一次，一定行錯，兜多少少路就算，千萬不要勉強。

高速公路更有蠱惑路牌，車速會變，我試過幾個路段都有變速路牌，你唔好以為50、60、70慢慢咁升，或者70、60、50慢慢咁降，等你好易適應，我試過高速，本來70英里，變速路牌60，冇問題，跟住第二個變40，跟住第三個又升番60，差成20英里，急升急降，倘若沒有睇清楚，會超速，或太慢速造成危險。

遇有響聲嘅緊急車輛，無論是警車、救護車、消防車，佢哋有道路嘅第一使用權，即使逆線、違規都會出現，也是容許，無論如何一定要讓路。如果冇響聲，就當佢普通車即可，不必刻意遷就，當然如果見到警車，當然要醒扒啲，20就行20，免招麻煩！

作為駕駛者，要做一切事讓安全系數提升，要買性能可靠嘅車，如果預算容許，買型號最貴嗰款，例如豐田Yaris，買excel版本，輔助安全最齊，有前後sensor、危險自動急停、路牌辨認（唔係成日認到）、道路偏差警示等等，雖然唔係叫你依賴這些東西，但至少好像多個人、多雙眼幫手，也是好的。

另外唔好怕清潔麻煩，最好買白色車，反光度最高，讓人睇到你，危險都可減少，另外，加裝前後車Cam，有時都可留証據，保障自己。