詠春只有錦上添花，沒有雪中送炭

 這門功夫有個特點，你掂，就讓你更加掂，更加好打。你唔掂，你學咗照樣唔掂，繼續俾人打。

詠春好比一門專科醫生，要先修習普通科，成為普通科醫生，累積經驗，然後才修讀專科，然後才可以成為專科醫生。

如果一個從來沒有醫生資格及經驗嘅人，直接修讀醫學專科，結果會點呢？咪醫死人囉！如果沒有基礎嘅人學詠春，結果咪俾人打囉！理所當然。

宗師貴為落難富家子弟，點會有耐性由基礎拳法慢慢教起，一定係小念頭，學了基本手法就黐手，因此，倘若你唔識打架，學完詠春，都係繼續唔識打，對武壇起唔到一點漣漪，因此宗師都有一段時間慘淡經營，直至一些打仔：黃作、黃淳樑（黃公）、李小龍，將詠春技術發揮在搏擊之上，簡直如虎添翼、錦上添花，武壇何止有漣漪，直頭波濤洶湧，由沒有人識嘅地下拳術，變為人所共知嘅高級武術。

以前用街頭打鬥練拳，今日時代轉變，一定要用搏擊練拳，點解詠春師傅唔肯教搏擊？美其名戴拳套冇了黐手嘅感覺，讓我撕開這些師傅醜陋嘅面具，單單戴晒全方位護具，一對一幫學員餵招，學員一小時要消耗3500卡路里，師傅都唔會輕鬆得幾多，晚晚要用活絡油及照燈。都係俾一份學費，要付出十倍功夫及代價，你問下你嗰個師傅會唔會咁做？當然唔會，就算武館後期搏擊也非強制必修，要堅持一樣野係唔容易。

（某師傅是我師伯嘅徒弟，當所有人接受謊言，仍有一些人有俠義之心，不畏強權，講出真話，其他仆街師傅，教埋啲假拳，接受一切謊言，有甚麼資格批評佢呢？不過說實話，時代唔同咗，大家都要小心，有俠義之心係好，作為武術家去做行俠仗義嘅事也理所當然，也要考慮家人及身邊嘅人。）

（某師傅已得到師伯認可。）