IB投資系列：股災疑雲？

 股票係咁㗎喇…

幕後玩家要升就升，要跌就跌，只是我們經常妄想知道佢點玩法，咁就發達了。事實上係冇得估，石油係咁重要嘅資源，會升會跌，冇問題，期油跌到負數，根本冇人諗到。我冇玩到期油，最多間唔中買嗰隻西方石油，嗰次冇死到，點知股債齊跌，攪到我都要重出江湖，在大不列顛獻上我嘅第一次…執房。一把年幾，色相就冇，只能變賣勞力。

現時巿況轉差，股價回調，但對比科網股災，仲有好大距離，以前以為互聯網支配一切，有概念冇業積都升，泡沫當然多。至電車熱潮，有出電車或新能源車都大熱，但根本許多車廠未能量產，成本壓不下，賣一架蝕一架，難以持久，及至北美寒冬，電車充電慢、續航低，人們紛紛轉買混能車，電車銷量急跌，立刻兵敗如山倒。

今日AI熱潮，又話新一代工業革命，又話取代人類，投入大量資源嘅科企，盈利仍未具體見到，投資者立刻醒覺，跟科網熱潮一樣，有概念、冇盈利，熱潮一過，股價即跌。真正賺錢，係設計GPU嘅英偉達Nvidia及製作晶片嘅台積電Tsm，你哋科企買了晶片能否創造盈利，係你哋嘅事，晶片錢，係咪都要俾，所以不存在蝕錢問題，問題係科企賺不到錢，未來訂單難以持續，加上特朗普很大機會上位，對天朝嘅壓制有多冇少，閹割版晶片都不容許販賣至天朝，股價由高位回調。

美國淘金熱，真正賺錢嘅，不是淘金嘅人，而係販賣淘金工具及牛仔褲嘅商人。同樣，AI熱潮，真正賺錢唔係科企，而係設計及製作晶片嘅公司，所以，只要唔係摸頂入巿，在相對低位陰啲陰啲買，用現金買，而非孖展槓桿買，都唔需要太擔心。

(108元渣、95元再渣，彈番102元全放，平均成本101.52元，仲有364港元賺，走到就算。如果摸頂140元，真係神仙難救。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。