IB投資系列：有早知冇乞衣

 我自少無心向學，家境貧苦，錯過了雅達利、任天堂灰機、紅白機，人生第一部遊戲機已是世嘉Sega五代（人稱MD)，仲係二手機，後來借俾同學整壞了。世嘉遊戲機係有獨特嘅氣質，並非任天堂所能取代，雖然我下一部已買超任，但後來又買了Dreamcast。

話說，1996年Nvidia生產世嘉Dreamcast嘅GPU，差不多破產，如果不是世嘉全力支持黃仁勳，試問怎會有今日AI界嘅巨星？如果當年世嘉買下Nvidia股份，咁今日世嘉咪發達！

不過歷史係冇如果，有早知冇乞衣，我都唔使窮咗咁多年，捨棄谷歌嘅雅虎、捨棄安桌嘅諾基亞、捨棄數碼嘅柯達，都難逃時代嘅淘汰。GPU突然在AI興起，是時代選擇了輝達，之前都冇人知，僅僅靠顯示咭值幾多錢？大家心照不宣。

當年誠哥賣中環中心，買英國公用事業，人人話佢儍，今日長建可以英國上巿，又有英國人買，股價仲升了，邊個係真正智者，十分清楚，四叔曾經短時間超越誠哥成為香港首富，今日恆地都唔惦，早早讓位俾誠哥了。

我唔知誠哥點解可以知道天機？坊間又話佢係甚麼會？幾多級會員？咁講係冇意思嘅！難道佢穿膠花時有資格入這些會麼？咁多富豪都有資格入這些會，為何唯獨誠哥知道天機？知道天朝必衰，及早撤資？

誠哥有極強生意觸覺，接親佢貨都沒有好下場，買爛橙Orange嘅德國電訊，買中環中心嘅甚麼大王，都不得善終。在Bloomberg訪問中，強調現金流對公司的重要性，有錢在手，在經濟困難的時候，很多資產都會變得很便宜，在這個時候出手，肯定是最佳時機。

誠哥已經教了我哋幾時係出手最佳時機，問題是你聽唔聽到，同埋你係咪真係咁做。

（接親佢貨都死，商家佬冇死錯人。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。