移英日記（146）窮遊德國（八）

 這日是旅程尾聲，今晚便返愛丁堡。友人細女發燒，原先去參觀國會大樓取消，雖然我地都可獨自去，但係每日旅程，行到腳也攰晒，都寧可休息一下，不必最後衝剌。

我係自閉的人，可以獨自練功，獨自思考，獨自投資…去旅行對我來說是浪費的事，本來電話在歐洲是通行，但實際唔知要點改設定，因英國脫歐，不會俾你無縫接軌，最終上唔到網，要靠酒店Wi-Fi，或免費Wi-Fi，投資要睇資訊，落盤也要穩定網絡，撘輕鐵、火車，架車埋站就收到，一移動就斷線，想落盤也難，「歪芺」又盧嘈，去到德國就唔好成日掛住上網，不過對我而言，這是我的工作，就好像YouTuber 拍片是他們的工作，人人都要賺錢，雖然只賺到千幾蚊港紙茶錢，但只係郁幾下手指，好過冇，如果唔係邊有得去旅遊咁開心。

（旅行唔好期望賺大錢，賺些少茶錢就可以。即日買賣，叫即日鮮，唔炒港股炒美股，仲著數，買賣都係收1美元，一買一賣，IB收2美元，手續費低，1點都有錢賺。）

（這個雙層鐵路有人查票，要做有誠信的人。）

去到車站廣場，買了一盒壽司，13歐元，味道好過「爭鮮」，去到機場再叫Burger king兩個餐，10.43歐元，幸好賺到茶錢，不介意！

我自少受到受苦神學影響極深，耶穌在世也沒有好日子，跟隨佢嘅人怎會好過？故生活條件改善，也不敢亂黎，免得墮落。用錢，我唔係俾唔起，而係問自己是否用得合宜？去旅行，對許多英國人而言 ，學生放假，家長一定要去旅行，有的賣了自己搵食車，去完先算，咁真係太離譜。

（買某些車，只不過自我感覺良好，真係適合英國用嗎？兩門真係適合家庭用嗎？大家心照不宣。）

言歸正傳，這裡說窮遊，究竟係咪老吹？廉航機票幾叉野、酒店三叉野、現金使費兩叉野、交通四舊水，合共一皮港紙左右，兩大一細德國柏林玩足六日，仲想點。

經過旅行，我知道自己唔係做大事嘅人，以前某上司說去到某度假村，有一名管家服侍，有廚師任你差遣，想食乜嘢叫他煮就可以，食到食唔落…

正所謂：「同人唔同命，同遮唔同柄」，都無謂比較了！