IB投資系列：短炒是零食，長線投資才是正餐

 剛剛窮遊德國，雖然只用了一皮，但網絡問題，加上旅遊期間經常撳手機，又俾「歪芺」盧嘈，投資上做唔到野…

網上經常有人說「肶阿敵」超越「突屍拉」成為第一大電車，早前數據是加埋油電混能車，真正純電車超越是有的，但極依賴天朝單一需求，當天朝經濟走下坡，形勢立刻逆轉，當電車需求整體下降，太依賴單一巿場嘅「肶阿敵」立刻兵敗如山倒。

車股真係掂是「吐郁他」，令我深切反省，我仲言猶在耳佢係電車發展呆滯，不夠進取，分分鐘在神壇掉下來。但隨著電車環保謊言打破，傳統車企再度發威，擁有領先混油能科技嘅「吐郁他」，股價上升。不過股價上升不代表佢嘅氫能源車已經成功，除非在綠氫等科技有突破性發展，否則股價難有突破發展。

（我唯一支持是身體力行，買我認為得嘅產品。我買得嘅產品，都會同一時間買佢嘅股票，不過如果錯過了機會，就算吧！唔好勉強。）

美帝又話2024年頭會減息，跟住又話三月會減息，跟住又話六月會減息，跟住又話今年都唔會減息，都唔知邊句真，我已經沽了貨、還晒日圓、去槓桿化，賺少許多了，日圓繼跌至1美元兌151日圓，我都唔好講其他，隻「抬漬典」沽完之後升了40%，寶島地震後也沒有明顯大跌，只能說「唔係你財，唔入你袋」，人地賺到一層英國樓，我只賺到生活費，一個天、一個地，不過咁，你可以贏英國樓，亦可以輸身家，如果今上有膽量，係未有充足準備下突襲寶島，亦合乎兵法所言：「出其不意，攻其不備」，成唔成功我唔知，但「抬漬典」就唔止跌四成。

風險跟回報是正比，風險越大、回報越大，唔好單單聽YouTuber 贏幾多，如果佢地真係掂，有絕對把握，何需教你？何需叫你訂閱、撳鐘仔、「披闖」課金、開課程，賺這些雞碎錢，將整個身家再槓桿放晒落去，世界首富都做到，對不對？就算股神巴菲特，或者新派的木頭姐，都係幫人投資賺手續費，你算老幾？投資要自己下功夫，睇資料、吸資訊、日日睇新聞，長時間監察股價，如果你唔係一朝望發達，願意長線投資、擺上時間、節制消費、持續學習，何愁唔會成功。雖然我都會短炒，但只不過零食，讓自己開心一點，正餐才是最重要，如果你只吃零食，不吃正餐，會健康嗎？

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。