我有時咁諗：我點解咁挑剔「詠春師傅」，固然學拳時期被他們呃過，會不會妒忌他們嘅成就呢？我工都唔使返，工都好返嘅！要我間唔中教下冇問題，錢唔收都冇問題，但要好困身咁困五年、十年，我卻不願意，可能做慣乞兒懶做官。
我覺得做人應該有原則，明買明賣，我好坦白咁講，就算你個套詠春幾正確都好，都只能對付普通人，如果對方識其他功夫，或者爛仔，更是未知之數，輸嘅機率也相當大。至於業餘拳手、職業拳手更加不可能。但往往sell這些課程都誇張詠春嘅威力，忽略自身身體素質嘅基數，不住強調以弱制強，好犀利之類，但如果你在叢林只是老鼠，俾你加對翼，作用有限，如果你係老虎，如虎添翼，係完全兩回事，這個原則放在太極、形意之類功夫，也是一樣，空有技巧都係花拳繡腿。
所以學功夫嘅重要嘅邏輯，係點樣令自己成為叢林嘅老虎，而唔係學甚麼招式、方法、技巧，因為一隻老鼠，就算能夠使出完美嘅招式、方法、技巧，也是沒有作用，或者再準確一點，你只能對付老鼠，當你遇到一隻完全唔識功夫嘅貓時，你仍然會輸，因為你就算所謂幾勁，都只不過一隻老鼠。
我舉個例子，可能詠春門人不滿，but I am not care，因為我完全唔需要靠詠春搵食。假設梁相跟招允大戰，梁相必敗招允，但如果純黐手計，結果又可以完全唔同。因為黐手練習係本門獨門訓練，只能反映黐手嘅手法及反應，但在實戰環境，招允打中梁相兩拳，可能無事，但梁相打中招允一拳，已可KO，搏擊比賽都知，就算點數贏幾多，最後被KO都係輸。詠春有言：「同門忌力忌手長」，身高、手長、力大，係有壓倒性優勢。
身高、手長都係天生，DNA決定，除非你營養不良。力氣係牽涉體能及肌力，屬於後天，要做老虎，一係泰國咁窮，靠打拳出身，一係好似日本人咁堅毅，這兩個選項都唔係普通人做到，不過，你要做招式有限嘅貓？還是招式滿滿嘅老鼠呢？倒是可以選擇的。
這些詠春需要妒忌麼？要練功，先學馬，我免費教大家，練馬三寶：深蹲、臀橋、跑步，我呢啲退休人士，跑步就避免，行下山便算，費事傷膝頭，我嘅大髀，兩手掌係圍唔晒，我買牛仔褲要腰圍大一點，否則大髀係穿不下。你教得人，就算係康體嘅興趣班，不是真打嘅擂台搏擊班也好，都不應太離譜！「孽種」又係咁、「孽政」又係咁，全部人都扮師傅，但全部都唔跟劇本、台詞，亂咁嚟！仲話「詠春傳正統，華夏振雄風」，雄風就振唔到，積弱就肯定有。
（外國詠春一樣咁離譜，攤手不攤，伏手不伏，攤伏本可互相制衡，現在互可攻擊，玩咩？果然「天下烏鴉一樣黑」！）
沒有留言:
張貼留言