IB投資系列：風光不再！

 我現時既處境，就好像負資產人士，收入增加，但資產下跌，表面風光，但有苦自己知。

當「拆掠」MSTR下跌至130元，已減持一半，一方面避險，一方面冇錢交稅，要做蝕錢數。新財政年度，戲碼又重新出現，又係好似賺好多錢，要交幾十萬稅，但「拆掠」再跌至85元，佢嘅借錢優先股STRC也跌至75元，即係冇人敢借錢俾「咪膏死喇」，我嘅資產再一次下跌，基本上交稅係可以，但本金咁跌法，孖展保証金經常發警告，好難再賺大錢。

「俾突幣」由高峰12萬幾，跌至5萬幾，「拆掠」由395元，跌至85元，如果資產最大筆是「彪浦500」追蹤基金，今日就不會如斯地步。

劉邦能夠打敗項羽，除了韓信幫佢打江山，也要蕭何幫佢穩住大後方，補給兵源及糧草。今日期權好似韓信一樣攻城掠地，但大後方「拆掠」卻頻頻失守，江山也守不住，咁點玩呢？

仆街嘅人，係有仆街嘅樣，就係洗腳唔抺腳嘅人，有些人未富先過富有生活，一定冇將來。我慣常以「低奴」、「窮鬼」自居，未窮先窮，搵緊十萬八萬，仲帶緊爛鬼膠手錶，「歪芺」已經睇實盤數，後欄起火，唔俾使錢，先是酸種麵包，後是希臘乳酪、咖啡，飲茶，去中超買家鄉野大幅減少，如果永居冇錢，車都要賣埋，大丈夫能屈能伸，有甚麼做唔到呢？上一次係重出江湖，今次係節衣縮食，應該冇問題嘅！

本星期神話不再，期權只賺521尾元，約4063講元，今個財政年度最差，強制接貨也不少，真係屋漏兼逢年夜雨，雖然傳奇不再，但炒股係咁㗎喇，三更貧五更富，人有三衰六旺，我相信仍可以東山再起！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。