IB投資系列：埋怨唔會賺到錢

 投資係個人決定，無論勝敗都唔應怪人，YouTuber 不過是人，「老燒」又好、「高高哥」又好，如果真係咁叻就做真嘅股神，一注All in已經發達，何必賺你果啲雞碎錢呢？

個個都係撘雞棚㗎啦！啱聽咪聽，唔啱聽咪走人囉！只不過「老燒」講得太實，太有信心，亦因此被人插得最應，反之「高高哥」就滑頭得多，講明純粹分享，真情流露，沒有投資建議。

股票係無常，就是我以前個經濟學老師都輸錢，真係讀經濟賺錢，一係純教書，一係做分析師，真係可以炒股賺錢只有「腍本脷」，佢都講上巿公司都係「天仙局」，大家都係cap水，你死你嘅事。

從來尾國政客都比股神更勁，根本冇必要信YouTuber ，早前「𡃁屍婆蘿屍」嘅回報，股神根本冇得比，可以話神中神。今日「突朗浦」也是一樣，只是當你知道嘅時候已經太遲了！

(仲勁過「彪抱500」，真正嘅「神中神」。）

新嘅財政年度表現也不錯，一個月賺十皮、八皮，我都唔會特別開心，因為要蝕一兩球都係短時間發生，「贏粒糖、輸間廠」，投資真係唔係個個適合嘅遊戲。

五月份賺到13皮，破了單月賺錢紀錄，但要賺番買樓錢，仍有一點距離。炒股票就係「三更貧、五更富」，一個月只賺390講元又有，一個仙都冇都試過，蝕一兩球又有，你心臟頂得順先好玩。

本星期賣了11張期權，全部無秘密，Delta都在0.1至0.2左右，接貨機會都有一兩成左右，唔好太大風險，至於0.291都有較大機會強制變賣，全部都係刀口下搵食，清算警告一日響數次，賺4522尾元，即35271講元，純粹分享，生死各安天命。

風險跟回報係成正比，初創企業一上巿，不知賺幾多錢，但做生意嘅陣亡率係99.99%。如果要唔輸錢，不如做定期存款便算，與其埋怨人，不如花多些研究、檢討，作出決定更好。

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。