IB投資系列：期權車輪策略

 我一直期權嘅操作，原來係有專門名稱，叫「車輪策略」。

方法係先賣出 put options ，收期權金，上得山多終遇虎，總會有一次要接貨，有貨就賣出call options，收期權金，上得山多終遇虎，總有一次俾人call走晒啲貨，又回到最初步驟。

以「迴猩猩」SATS操作為例：

17/4 賣出看跌期權125元put ，收1.34，100股即134尾元。

24/4 中招要行權，被迫要用125元買入，股價試過低於120元。不過無需過份緊張！

27/4 用持有100股，賣出看升期權，收189尾元。

2/5 沒有行權。即係白收期權金。

4/5 繼續賣出看升期權，收325尾元。

我唔計中途有同步賣看跌期權，只睇這車輪循環，由17/4收134尾元、27/4收185尾元、4/5收325尾元，合計收了644尾元，5023講元。所需成本係100股「迴猩猩」，以125元計，12500尾元，97500講元，或孖展槓桿戶口信用額度，十皮，一個月唔使，收幾千元，一年收六七皮，係60-70厘，好過去收息，工都好返嘅！

不過，做人做事唔可以只睇一面，賣出看跌期權嘅風險係無限，你無聽錯係無限，你嘅投資戶口都會清楚展示給你知道。

當你用好高嘅價錢去買價值歸零嘅物品，即係你嘅財富亦會歸零，所以風險係無限。當然要歸零係好難，但跌95%，你都夠死，好似當年NFT，五億跌至現在16萬，你都想死喇！

我唔會報喜不報憂，我講講自己慘烈例子，我曾賣遠期某核電嘅看跌期權，140元put，期權金53.63尾元，賣了10張，53630尾元，41萬8314講元期權金，今日該股票跌至一半。

要平倉，要在巿場買回十張期權，現價76.99，即係76990尾元，即60萬522講元，收41萬期權金都唔夠俾，蝕18萬2208，我唯有等該股票上升，個價好啲才平倉。

所以期權唔係咁簡單，一般人要選Delta在0.1至0.2嘅期權，行權機率大約10-20%，即使接貨，跟巿價不遠，走也容易，白收期權金，平平安安！

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。