移英日記（383）玩具

 最近某東瀛公司展示最賺錢嘅項目…

高達，好明顯唔係賣俾小朋友，而係大人。

就算好多復刻玩具，目標對象也是大人。

冇五張野，你都唔會知道是甚麼？於是有個疑問，明明我哋已經咁老餅，為何仍然依戀過去呢？

確實幾十年前，我確實流晒口水，奈何父母都係低奴窮鬼，就算自己儲錢去買玩具，一旦發現都會被罵，一則太浪費，二則無心向學，於是長期心理上無法滿足，長大後有能力，便會報復式購買。

我自問唔係太聽話，幫阿媽做家務，有一蚊，儲下儲下零用，唔買飯食，自己煮公仔麵，怎也買到些玩具，雖然係老翻天朝模型：高達、宇宙大帝、六神合體、百獸王、金毛獅王…夾口麻麻哋，細路仔有得玩就算。

第一部遊戲機係世嘉五代，二手的，到了會考前，更去了老麥工作，買了超任及doctor磁碟機，我又唔係去偷去搶，靠自己努力工作賺錢，有甚麼問題？不過在知識型社會，唔讀書就係壞。

以下機王，想都冇想過…

將街機帶入屋企，太大想頭了。

現在又出復刻版，原汁原味。餅帶咁Q大，賣嘅都係情懷，如果純粹要玩遊戲，用模擬器老翻已經可以。以前部Neo Geo嘅零件已停產，要重新設計，用新零件，出返部35年前嘅機、games，都有人買，而且仲係有翻咁上下嘅老餅才會買，現在嘅遊戲，已勝35年前街機了，世界唔係應該向前望麼，但許多人仍然懷緬過去。

「幸運嘅人用童年治癒一生，不幸嘅人用一生治癒童年」今日我哋嘅一切都係心理補償，我可能幸運一點，老翻玩具都滿足過，老翻遊戲抄碟都滿足過，以致我唔會病態咁去儲玩具，有的甚至要租個倉去放玩具，我絕對唔會咁，我對於欲望嘅控制也較好，應使得使，我仲用緊「埃峰11」，直至壞為止。

（我個仔對變型金剛，情有獨鍾，明明這些模型是不能變型，也十分想買，要成3鎊，我每星期俾1鎊零用錢，佢自己決定，我唔會過份壓制佢嘅欲望，我更希望佢憑自己努力去得到自己想要嘅野，老豆以前都係做老麥賺錢買超任，如果好像某啲人，四十幾歲人仲唔做野，靠老豆俾錢，咁就該煨啦！）