我知道我是詠春血統唔純正嘅人，咁又如何？功夫有純種的麼？今日嘅詠春，已經跟少林功夫完全唔同，除了師祖五枚師太改拳，也經各代詠春傳人改良嘅結果。
你以為雜種嘅唐狗唔好麼？佢哋生命力頑強，也很少病，機智、可訓練，幫到手，而且忠誠護主。純種狗雖然可愛，但卻有各種遺傳病，又難養，又多病，又幫唔到手做野。
既然最好嘅功夫都係不住跟不同門派打鬥，混雜各種技能，採長補短，咁雜種又有甚麼問題呢？點解一定要強調正宗、正派？講到尾都係個錢字，「多個香爐多隻鬼」，既然有人整色整水，標奇立異，正好群起攻擊，整走呢個香爐。
其實套路跟實際應用係有分別，就好像經濟學理論，股升則債跌、股跌則債升，今鋪股、債、滙齊跌，幕後玩家一網打盡。如果依書直解，基督教就唔會咁多異端，如果套路可以直接使用，我就唔會說「涼亭」解錯拳。這些事，先賢一早知道，但沒有修正，一則本門原先係秘密拳術，怕被人偷學武功，錯就由得佢錯，等人哋偷學咗都冇用，二則就算套路有少少漏洞，教拳嘅時候修正即可，三則改拳事關重大，會被賦予欺師滅祖之罪，冇人敢行呢條路，所以「綜獅」即使有所創建、有所改良，亦含糊其辭，偽托先師之類。「蝗公」改拳也先經「綜獅」允許，小念頭加上間手一段，至於搏擊一些特殊動作亦刻意用詠春手法（其實原本手法不是咁用），以示自己冇用其他功夫等。
當今世上，只有師伯「瘟鑫涼」師傅敢大刀闊斧去改拳，我們可能容易接受差嘅「傳統詠春拳」，多過接受改了嘅「實用詠春拳」，有周家螳螂拳嘅影子，詠春手，好像變了螳螂手咁樣，有不倫不類嘅感覺，然而套路跟應用變成一樣，貫徹到實用嘅特質，沒有中間轉換，起步快了，形成先天優勢，再加上佢手法跟傳統有別，別人短時間無法適應，倘若一不小心，就會短時間敗陣。
當然我唔係話呢門詠春拳玩晒，一門拳術打唔打得，全在乎人自己，有的很埋㬹，但為咗埋而埋，咁都冇用㗎！而且因為下下要食到盡，頭部有明顯擺動，小念頭要練嘅係不動如山，手郁，其他地方一概不動，要保持動作嘅隱蔽性也是重要，不盡㬹也限制了攻擊距離及力量嘅灌注，再者，真係打得，都係嗰幾個，人人都打藍球、踢足球，但頂級，永遠只屬少數。
沒有留言:
張貼留言