愛丁堡詠春：為了黐手？還是實戰？

 唔知點解全球詠春，一係變「擘馬詠春」，一係變「瘟系詠春」…

你哋幾時變陣入晒「瘟系」？全部變晒平衡馬，如果係瘟系平衡馬，冇問題，你至少都要坐馬，屈膝135度，企到直晒，咁即係冇馬，師傅食屎㗎，咁大件事，都當冇事，仲掛住「詠春傳正統，華夏振雄風」，正統詠春就係咁扑街㗎！定係扑街才算詠春呢！

真正嘅詠春二字箝羊馬，腳尖距離一定要細過腳㬹距離，腳尖拉條線出嚟可以有交點，成為三角型。做唔到，唔該快啲收皮，甚麼「詠春傳正統」嘅字，唔該一一除去，因為一啲都唔正宗、唔正統。

本門嘅詠春由於要打盡㬹，如上圖，任你點埋㬹㬹嘅位置一定不會在中線，而實戰嘅優劣係睇「相對埋㬹」，「實用詠春拳」嘅斜45度不盡㬹拳，下下食到咁盡，差不多去到「絕對埋㬹」，咁點玩呢？

問題我要問，你學詠春，係為了黐手？還是為了實戰？就好似做人，係為了短暫嘅開心？還是永恆嘅福樂？你要做嘅野，要走嘅路已經可以完全唔同，如果單單目標以同門黐手，好似妨間霹靂啪啦，好似好勁，好似好犀利，但馬都冇，咁荒謬都得嘅，咁你點玩都冇問題，如果要實戰，拳拳都要到肉，拳拳都要盡㬹。

我活在邪惡嘅西方世界，癡肥問題相當嚴重，佢哋唔係富到肥，而係窮到肥，因為窮，或者資源有限，而要買便宜嘅食物，這些食物又能滿足人嘅口感滿足，全部都係化學野，最終食到人人變咗怪物。為了短期好處而犧牲了長期嘅健康，今日嘅詠春都係咁㗎咋，黐手霹靂啪啦咁開心，使乜理實戰有冇用，啲拳啲馬咪走晒樣囉！好像我有個師叔有一次跟人衝突，與他衝突嘅人都唔覺得佢學過功夫，因為佢嗰啲係「飛機拳」，純詠春黐手用，掂到就當贏，人哋唔覺得痛，件事上晒新聞紙㗎！

十個詠春九個流，學嗰個都戇居，我哋啲老屎忽幾十年前俾呃咗入局就冇辦法啫，好人好者學泰拳、巴柔好過啦！