詠春由秘密拳術變為公開，由不為人知的拳術及招數，變為人所共知的招數，要做到同樣效果及成就，便需要與其他拳手有同樣訓練水平及素質。如果仍停留在「玩手」，或者「黐手」，等於在大人面前玩泥沙一樣。
「天朝」馬大師的醜事，在今日絕大部分的詠春都會出現，只不過「漁村」的詠春仍有少少自知之明，加上未練到騙人的最高境界：「自欺欺人」，所以絕不會蠢到自殺行徑，最多是強說詠春不適合搏擊，載拳套無法發揮之類避戰藉口。
今日的詠春，明知唔得，詠春師傅比我更清楚，仍厚顏無恥教人，一係講到明唔得，只不過對付唔識功夫的無膽匪類。一係講到明唔係用來打，只不過強身健體。一係逆水行舟，訓練拳手出戰，將不可能變可能，無論結果如何？第三類拳館，我都會無比敬意及尊重。
詠春以往所以得？有兩個原因，第一，隱秘拳術，別人對此一無所知，死咗都唔知甚麼事。第二，將功夫放到實戰，宗師鼓勵門人四出爭戰，以求真知。
今日詠春秘密已經公開，第一個優勢已冇。另外，社會環境已催穩定，街頭打鬥已少見，取而代之是合法的擂台搏擊，詠春派拒絕派員出賽，自然自絕於搏擊舞台，第二個優勢也同時消失。
詠春跟大不列顛一樣，已經不再是日不落帝國，早早已經日落了，你所緬懷佢的光輝，只不過係過去，係回憶，你講得出的搏擊比賽：K1、泰拳、MMA等，永遠不會有詠春的名字，唔好賴拳套、賽例，俾你詠春唔使拳套，都係做砲灰，我私人送條「祝君安好」白毛巾，敬奉拳手自殺的勇氣，如果有的話。
詠春係咪冇得救？如果崇禎皇帝當年冇殺袁崇煥，明朝仲有得救，何況詠春！然而人係咪想詠春好？還是自己好？拍詠春電影，拍到爛為止，賺到最後一分錢，繼續教垃圾詠春，教到冇人學為止，佢係咪真功夫，重要嗎？
黐手係其中一個功法，但不是唯一或絕大部分，主要是感覺及反應，故大家冇用真力都冇問題，甚至為了大家更敏感，越放鬆、越細力、攻擊預兆越少越好，因為咁微弱的力都感應到，咁實際環境就更加冇問題。不過這正是走火入魔位，大家都不用力，手法也習慣做個樣便算，日字衝拳作狀打人便算，拳面接觸便當打到，做到膀手個樣，日字衝拳也要停，咁樣玩法，越來越失真，越練越假，活在平行時空。
許多人學了半世人詠春，你叫佢「收皮」，會唔會啊？許多人俾了咁多年學費，只求學畢三套拳、三器械，現在開始教拳，獲利回吐，你叫佢「收皮」，會唔會啊？就算明知係假，也要假下去，明知做戲，也要做埋台戲。「漁村」的詠春師傅未至於達到「自欺欺人」的最高境界，否則已像「天朝」的功夫大師出晒陽相，不過仍然清醒，就不單功夫有問題，而是道德的問題。
李小龍回港拍戲，知道自己沒有時間指導門人，決定關閉所有截拳道的武館，咁點解李小龍死後，截拳道武館自動復活，難道李小龍的門人功夫比李小龍更優越，更有能力指導嗎？大家心照不宣。我以前曾經認識截拳道門人，他說每個級別也要做到一些動作要求，例如單手二指掌上壓云云，我一聽，明晒，原來是龍哥生前的動作或示範，不過講真，做到單手二指掌上壓就代表好打嗎？我所知道，終極格鬥王者霍斯格雷斯、拳王泰臣、泰拳播求…一概做唔到，難道你會質疑佢地概實力嗎？我告訴你，就算你做到倒立「二指禪」或「一指禪」，都會被業餘拳手打敗。
其實，我何嘗想抱殘守缺，只是想當初，學黐手的時候，不是覺得興奮嗎？橋手能夠自行作出反應動作，多麼神奇呢？若不是有這份情意結，早早已拒絕再玩。
沒有留言:
張貼留言