IB投資系列：AI可能係劇本？

 「歪芺」（wife) 話我冇錢唔去做野，但是大不列顛低技術勞工，一個月千幾鎊，即係萬零蚊講紙，兩皮都冇，杯水車薪，填唔到氹，我一個星期嘅期權都兩皮，咪忍下先囉！

資產下跌咁多，係一回事，本金得兩球多，每星期賺兩皮，一年賺一球多，約50厘，風險系數係點，自己想像一下，三至四厘係近乎零風險，以此觀之，風險相當高。「痕大」債券12厘都違約，亂咁抄功課會死人，只不過人在江湖，身不由己。

這裡生活，每月要三皮講紙，一年三十幾皮，一球交稅廿幾皮，因此一年賺一球，戶口只不過增加三十幾皮，要買樓遙遙無期，至少十年。因為人始終要生活、要交稅，賺少啲都唔得。「虛幣」不升，「拆掠」MSTR必亡，大家攬住一齊死！

正所謂「成哥走得快，一定有古怪」，成哥賣埋「嬰國」電訊業務、火車、賣晒全部港口⋯根據過去經驗，走完之後，立刻出現奔盤，自己執生吧！

另一方面，AI嘅火車，好像沒辦法停下來，AI嘅智慧已經超越全人類嘅總和，只要落實到應用，人類存在價值歸零。

未來國與國嘅角力，關鍵也在AI，「尾帝」仍掌握最先進技術及較低成本，「天朝」買同一張GPU要經幾多人？付多幾多手續費？要組合幾多張「嘩維」才等於一張「揮撻」？要用幾多部舊光刻機才砌到一部低階光刻機？對比要向ASML買貴幾多倍？嗰啲消耗品要經幾多重手續？經過幾多間公司隱藏？多付幾多手續費才買到？除了電力較平，其他全部都係天價乘倍數去買，最終拖垮國力，就好像當年「鬚攣」為了跟「尾國」爭做太空一哥，最終倒下。

（「鬚攣」太空穿梭機：暴風雪號。）

今日「尾帝」邊招虛？邊招實？凡人睇唔清楚，就好像「尾國」有冇登陸月球？根本無人知，5000億投資AI，係真？定係假？真係無人知，我淨係知，「鬚攣」跟「尾國」鬥而亡，今日會否用同一個劇本去推翻佢唔喜歡嘅政權呢？

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。