愛丁堡詠春：改道

 詠春嘅防守，其中一個方法係改道。

當然沒有漫畫北斗之拳嘅「二指真空把」咁誇張，可以將箭嘅攻擊方向，180度改道，反擊對方。只不過稍稍改變少少角度，令對方嘅拳打得冇咁應，力量減弱，已經做到效果，至於好瀟灑咁將對方嘅攻擊完全落空，其實並不容易，又或者實力相差很遠才會出現。

真實搏鬥互中係理所當然，問題係點解有人可以站住？有人卻是倒下？打中多、打得應、被中少、中不應。其中，打得應與打不應，差很遠，好像拳王羅唐對史密斯，明明見到互中，但對手爆晒肛，而羅唐外觀上完全無事，因此有「鋼鐵人」嘅稱號，我知道戴上法器嘅泰拳拳手係可以刀槍不入，好似神打咁，但拳賽係嚴禁戴上法器，否則不分勝負，無意思。再者，羅唐與武尊互有勝負，武尊告別戰也打敗羅唐，因此絕對抗打是不存在。

（邪靈附體，超自然嘅方式例外）

高手過招，大家都係行緊鋼線，睇下邊個跌落去先，只要一不小心露出破綻，勝負就分了。

我曾聽過一位食煙詠春師傅說：一隻手指就可改道，他亦叫徒弟作狀打一拳示範一指改道，因此手法唔使用力，都有效果云云⋯⋯。

「師傅」，老吹都唔好吹到咁大，人哋作狀打一拳，當然可以用一指改道，倘若對方正經打一拳，你外門拍，唔小心用手指接，即使有四指，都有機會斷手指，一定用掌根拍手才可以。

飛機是透過擾流板、襟翼，控制氣流，達至改道，船嘅陀、車嘅軚，都是一樣道理，唔需要好似引擎咁大力，但也要相當力量，改道才能成立。拳也不會例外。

改道分三個層面：

1. 完全改道 （我優人劣）

2. 半改道 （勢均力敵）

3. 完全不改道 （人優我劣）

純黐手詠春嘅底層邏輯，唔使用力或極少嘅力就可以改道，因此設定係完全改道，放在實戰搏擊就完全死晒。我哋應假設所有人都比我強，屬完全不改道，對方嘅拳重，你係完全無辦法改變，唯有將力回饋返自己，用搬龍門嘅方式，避開攻擊。要推開一個人，叫佢死開，雙掌就最好，但移得太多，但用在格鬥，單掌嘅力就差不多，移半格就可以，決非唔使用力或一隻手指嘅力，而係至少推動你嘅身體移動半格嘅力，避開攻擊，方為正路。

傳統教拳係口傳心授，似明非明，就最易呃錢，我咁樣畫公仔畫出腸，並非賺錢之道，我承認自己唔識做人，撈唔起，人哋做大師傅、大判頭，我有雙大工牌，卻是老散，「忠忠直直，終須乞食」。有好多所謂「詠春師傅」明明無料，可以戴勞力士地通拿，你就明甚麼事，真正練拳嘅人，邊有一忽皮膚係完整㗎！怎會戴名貴手錶？我移英前做了七八年地盤，咁耐都係戴爛鬼膠手錶，G-Shock都壞埋，我仲記得廣告中被貨櫃車衝擊都無事，呃人嘅！不過幾百蚊貨仔，投訴都嘥時間啦！