愛丁堡詠春：風骨

 任何人都係演員，只不過你演得好唔好，你演得好，人哋信你，你就成功，係咪真都唔重要。

跟過「蝗公」，唔識打都識吹，加多減少，符合現代人口味，都市人習慣，加上宣傳，巿場策略，點都有人落疊。至於功夫如何？你哋自己判斷。

如果按照詠春標準，二字箝羊馬，馬開步半，闊度唔得，腳尖距離要窄過腳㬹，膝部要微微收窄。呢個「師傅」樣樣都做唔到，這個馬，行內稱為「擘馬」，係無料詠春必定具備嘅特徵。

正常功夫埋牙，一定坐好個馬，至少馬步加闊，增強穩定性，呢個「師傅」有番咁上下高度，用一般站姿，點都講唔通，再者該「師傅」以「純」自居，唔似我呢啲「雜種」，既係純種、純正，咁唔該站好個馬先啦！

我都知做生意的第一性原理係巿場需求，並非個人喜好，巿場喜歡乜嘢，你就俾乜嘢，咁咪發囉！消費者嘅底層邏輯從來都唔係要好辛苦去得到真功夫，而係好容易去顯示耀眼嘅技術，所以純粹「霹靂啪啦」黐手才有真正巿場價值，才真正搵到食。

力由地起，就應該由個馬開始練起，跟住係核心肌群，然後再傳到手臂⋯，好像廚師由預備食材開始，一步步去做⋯咁樣當然搵唔到錢，人人都用預制菜，慳錢、慳時間，仲即炒粉麵飯，揸兜乞食啦！

我係100%炒股票搵食，呢啲道理我點會唔知呀！但係如果連少少嘅堅持都唔守住，作為武術家應有嘅風骨也不存在。

但現實係，風骨唔可以當飯食。