IB投資系列：有錢佬慳到你唔信

 大家都知股神巴菲特以慳聞名，住舊屋、用舊手機、揸舊車…佢老婆更公開大駡4美元的咖啡太貴，以佢地財力去看，真係十分孤寒！

確實財富是慳番來，今日我都係揸舊車（Honda civic 1700鎊) 、戴爛手錶（Casio幾百元那些）、舊手機（iPhone 11) 、舊沙發、個仔架單車係二手（頭盔反而新，因難買又要合size，價錢跟舊單車差不多）…

係咪真係咁窮，等某些人唱去英國的人都是二等公民麼？我講講今個月收入：

IB利息收入$11774（至月尾應多一點），股息$18501，銀行利息三百鎊多（每月約$3000）買賣股票約賺兩皮，酒店執房賺皮幾，本月賺約六皮幾講幣，我唔做都唔會餓死，不過咁，盡沽漁村股票唔見三十幾萬，都要補血的，唔好當自己真係賺錢，除了美股，全球都係負數，蘋果、微軟…等變賣都係用來補血，陰公！

我以前曾做某集團快餐店經理，佢地一個區有幾間分店，都唔係間間賺錢，都係拉上補下，日日俾區域經理將軍都冇計，弱鋪係困難，最緊要條大數交到俾羅老闆。股票投資也是一樣，又股票，又債劵，又基金…不可能樣樣賺錢，最緊要條大數係ok就可以。

(漁村真係等死，口講要經濟好，但次次都攪到一鑊泡，郵輪碼頭，第一次要旅客等，跟住都要等，日日趕客，不如執咗去算吧！如果不當機立斷，盡沽股票，今日損失只會更大。雖然我是已走的人，但眼見有人將我以前的故鄉摧殘，都感到勞氣！）

網上有人公開慳錢大法：

如果做到類似的慳錢清單，何愁不能致富。我自己人生都衰了幾鑊，被護士學校踢出校、做生意失敗、投資失敗、工作失敗、事奉失敗、地盤失敗、政治變遷等等，以致接近五旬仍要從事體力勞動工作，不過我想：處理好不良資產以後，資產量夠多及結構穩健以後，財務自由之路就可做到。

（有些人出身比我們好，讀名校，有最出名的大律師做師傅，前途無可限量，也會不住犯錯，走上絕路。人生就是這樣，透過錯誤去學習，未到最後都不能蓋棺定論。）

（最近加密貨幣騙案令許多人失去金錢，最容易被騙的人，是曾經被騙一次的人，因為他們不甘被騙的事成為事實，最終失去更多。要發達，點解唔正正經經學投資？大不列顛銀行做定期都有五厘半，以前恆大垃圾級債券才有12厘，20厘以上豈不是仲勁過股神，一睇就知騙局，何必一錯再錯？）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。