移英日記（100）移英一年

 上年十月黎到愛丁堡，現在九月尾，足足住了一年，好好回顧及反思。

我成世人沒有離開自己出身、成長的地方生活，一走就走到地球另一邊的大不列顛，一住就住了成年，工作也做了七個月，沒有經過考察，心口得個勇，英文又水皮，怎樣生活呢？

入得大不列顛，佢都要求你有至少半年的生活費用，有充足時間適應及找工作，除非你懶惰、消極，咁去到邊度都死路一條。

我早在漁村前一年就變賣爛樓，租屋一年，籌備事宜，有幾個地方選擇：曼撤斯特、伯明翰、列斯、李斯特城、布里斯托、愛丁堡等，最終鎖定愛丁堡，因為治安好，文化氣氛濃厚，雖然我冇文化，但都想兒子好，雖然樓價較高，但大學免費，顯然是好選擇。有列斯的弟兄說夜晚千萬不要出街，治安很差，會有危險，咁又何必選這地方呢？有的中部的人說間屋要整幾多個防盜系統，愛丁堡未聞之！

住屋豐儉由人，外圍一點小鎮如利雲斯頓Livingston，百多萬港元也有，但要治安好一點，校區好一點，方便多一點，近巿中心多一點，就要付多一點代價。食物，外出食貴，自家煮平，一碟干炒牛河17鎊（約162港元）超貴，但面包、牛奶、肉類超平，雖然通脹，39便士一條方包，也加至45便士（約4.3港元），可吃幾日，出街飲咖啡都要幾鎊，但用咖啡機，都係幾鎊卻可飲多杯，一杯約5.3港元。

（部咖啡機32鎊（306港元），咖啡膠囊4.5鎊包一啡一奶（43港元）可沖8杯，約5.3港元一杯，配合英式餅仔，十蚊都唔使！開心唔一定用很多錢。）

（去聖占士廣場食日式料理，也是開心，我吃了地獄拉麵，加壽司。）

（兩拉麵，一壽司組合，兩大一細，埋單40.3鎊。）

住愛丁堡交通便利地方，冇車也是可以的，巴士月票60鎊（可撘埋輕鐵），通脹加至66鎊（630港元），漁村狗巴都要780港元，至於駕車，油錢一定這裡平。

大不列顛稅率高，收入過了免稅額收20%（仲有國民保險及退休Pension），除了必須食物免稅，一切消費品要交消費稅20%，所以有部分收入是重複交稅，交了40%，Council tax巿政稅，有地方住都要交，瞓街才唔使，每月兩三千港紙也少不免，我計算到每月合共交了約八千港紙稅，真係好誇張，不過睇醫生、免藥費（只限蘇格蘭）、小朋友Nursery讀到University（只限蘇格蘭），如果你個子女成績超班卓越，學校保送去牛津、劍橋（只限蘇格蘭），蘇格蘭政府俾錢，Pension交夠十年有退休金攞番，對唔識理財、投資的人，是一份保障及好事。

大不列顛，走難、受政治迫害，固然要黎，如果有一個子女，應該要黎，兩個子女或以上，有賺，更加要黎，擁抱自由，自由無價，更加要黎，退休，這裡有上門看護，唔會死了無人知，更加要黎…千萬不要像某些人，少少困難就退縮，咁樣做，去到邊都不會成功。

（有些人移民當玩泥沙，去下這裡，去下那裡，令自己拍片有話題、有內容，增加擊點，難為了子女到處走。三個月試到甚麼？住夠一年的人，你才好相信。）