移英日記（五七）開始工作了

 BNO移英人士可以在英國工作，點解有人要乞食？一係唔清楚能夠工作的要求，一係唔肯放下身段。

要英國工作，要有以下五樣野：

護照一定有，唔係偷渡。Share code或BRP，BNO移英人士一定有。NI只要網上申請一定有。有申請英國銀行戶口一定有，有租屋住一定有地址証明，唔係瞓街一定有。

有晒工作的資格及條件，英國脫歐，許多東歐人走了，勞動力不足，工作就一定有，問題是我們是否能放下身段，博士、高管都係去工廠整餅，校長都係執房，始終這裡不是我們主場，我所知除了IT、護士可以降薪做番自己老本行，很多都要做低下工作，當然這裡不會如漁村的眼光咁睇，如果有一門專門手藝，藍領薪資是高過白領的，如果我可以做番地盤，人工絕對不低，只不過要重新考過D牌，加上語言未咁精通，十分危險，以前「講豬奧大橋」，尼泊爾工人拆了金屬棚架鐵線，我差點用我條命祭橋。

現時做執房Housekeeper，一般都有最低工資9.5鎊一小時，今次高過，已屬感恩，朝九晚三，六小時，中間半小時休息，應無薪，由於間酒店細，沒有飯堂，有的人索性唔食，食支煙便算，返五至六日，一個月一千幾百鎊左右，發達就不會，純粹是體驗，工作是對這地方有貢獻，有交稅，又可融入這裡，迫自己講多些、聽多些英文，不再做聾啞文盲人士，絕對是一件美事。

（英國我都見過他們的金屬棚架，大多得幾層樓高，完全冇難度，我係IFC𨋢膽搭架仲高，不過算吧，做簡單工作便算。）

（移民的衝擊係大㗎，所以要想清楚，做好準備，打好個底，方為正路。至於有人成功，有人失敗，有人有工，有人乞食，去到那裡也是一樣，各有前因莫羨人，自己要分辨是非對錯。我已故父親在天朝也屬知識分子，漁村話都唔識，曾用自己化學知識自制洗潔精等產品，如果有誠哥的營商觸覺，一早做了有錢人，最後咪做工廠工人，我們這一代去大不列顛，根本與上一代一樣，會面對很多困難，最重要是如何解決，戰勝困難。）