汽車大病難自救

 大不列顛，人跟車都一樣，小病自救，大病才找GP，車壞了，都要找整車佬（Mechanic）。

我架Honda思域錢七，2010年車，上年買已12年車，今年已13年了，行17萬公里，1700鎊，行得走得便算，不求其他。但後來架車漸覺冇力，要俾好大油，高轉數，送個仔放學回家，有燶味，問下熟悉汽車某弟兄，佢叫我先做檢查，check下偈油夠唔夠等等，最後撻車入一波，立放離合器，竟不死火，你知私家車唔同貨Van，馬力、扭力差很遠，放離合器要好溫柔才得，立放離合器都唔死火，一定係離合器出問題。

換離合器，要升起架車，拆零件才能，我地這些凡人一定整不了，一定要找車房。在格價網頁找，得到的結果，距離也很遠，架車狀況怎駕到呢？後來找到某Mechanic網站，四百幾鎊，換番個離合器，架車用多一年半載也好。

不過Mechanic拆了離合器後，飛輪（Flywheel）也出問題，要換埋，上網見到二手零件，但他不接受，因他要保證離合器一年，倘若接住離合器的飛輪上一手又唔知用成點，就難以保證。

部車要用番，要買全新飛輪，Honda原廠要四百幾鎊，輔廠也平不了幾多，是否找到也成問題。整埋其他小問題，差不多要一千鎊，真係騎虎難下。

新車，貴買平用，舊車，平買貴用，個個零件都七勞八損，排住隊要換，每年MOT要過關，一定要執到企企理理，仲唔死。

讀過經濟學，我當然知買新車跟舊車的成本係一樣，雖然新車價錢貴，頭幾年折舊甚高，但別忘記頭幾年有原廠保用，唔洗煩。如果架車成日壞，要容忍、要檢查、要維修，都係要成本，只不過人假設自己係零成本，講真唔攪架車，多了時間研究股票，條數都回了，多了時間做家務，夫婦關係都和諧些，多了時間讀聖經、祈禱，靈性再創高峰！

（某偽英國車（因已被天朝收購），大約30萬港幣，七年保養，假設七年後賣出仍有2萬，即七年要28萬成本，每年4萬。買舊車要維修，一年也用不了4萬，因此直覺認為成本較低，但別忘記時間係無價，除非你喜歡車，整車也有快感，嗅到汽油味都興奮，願意長時間花在車，咁樣仲值得概。）