IB投資系列：散戶輸錢原因

 點解散戶成日輸錢？有四個原因：資訊差、資金差、策略差、知識差。

資訊差異，當我哋呢啲低奴都知嘅事，等於冚世界都知道，要渣貨，啲價就扯高晒，要沽貨，啲價跌到慘不忍睹，點樣賺錢呢？

資金差異，大戶嘅資金充裕，可以分階段入貨，取得平均價，唔會有貨入唔到，要沽貨獲利，又可分階段沽貨，唔會有錢賺唔到。

策略差異，大戶可以分散全球不同範疇去投資，平衡風險，亦善用各式工具作為投資策略，如期權、認沽証等，能夠因應不同情況作出部署。

知識差異，大戶都是專業人士組成，有嚴密分工，要死都好難。散戶講句唔好聽係盲毛，如果唔識投資就做銀行定期便算，今時今日，間唔中又會有倫敦金騙案、大陸樓騙案、祈福性交轉運騙案、虛擬貨幣騙案等等，以為你識買虛擬貨幣都算係智奴，竟然為高息將虛擬貨幣放在人哋嗰度，人哋仲唔失蹤咩！唔好話賺錢，保住自己僅有嘅財產都難！

還記得自己初投資，買得一注，幾時揸？幾時沽？往往很難判斷，高的未算高，低的未算低，「追高殺低」經常出現，意思係買貴貨、賣平貨，經常咁樣操作，點賺錢呢？一旦入了蟹貨，往往hold住多時，浪費時間，還是棄車保帥，盡快攞番錢投資另一隻，往往很難判斷。

另外，投資還會有錯覺及盲點，當贏錢時，我們會認為自己眼光準，當輸錢時，我們會認為運氣差、隻股票唔生性、個老闆唔識做生意，正仆街！想真一點，點解贏錢就是因為自己好，眼光好、分析準、判斷佳？輸錢就是運氣差、環境惡、老闆衰…？投資所有決定都係自己，勝敗都要歸咎自己，反省自己，如果輸錢只識埋怨別人，永遠唔會進步。

（甚麼係贏？甚麼係輸？跟自己年輕一倍嘅拳手打，結果早就知道，但究竟係咪真係輸？泰臣嘅出場費有2000萬，無論輸贏都有，能夠最後站在擂台，已經贏了。投資怎樣才算贏？係保住你嘅財富及購買力，意思係至少贏通脹才算贏。）

（某些商鋪基金收費極高，收取毛租金的25%作為基金管理費及舖位買賣後淨利潤的25%作為表現費。即使巿況好，食水都好深，何況現在美元強勁，港元在聯繫匯率下也強，港人紛紛北上消費，投資商鋪，只係倒錢落海，加上這些吸血基金，只有死路一條。你買QQQ投資美帝科技股，都係收0.2%，賺到笑。咁低智信「你巾馨」，咁都冇辦法。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。